هەرئێستا

پەلەقاژەی پاکێجە" پینەسازیەکان"

شۆڕش خالید ئاژگەیی - 1-01-2018 - 2210 جار خوێندراوەتەوە

ئەم بارودۆخە نالەبار و قەیراناویەی زیاتر لە دوو ساڵ و نیوە رووبەرووی هەرێمی کوردستان بۆتەوە و ژیان وگوزەرانی خەڵکی خستۆتە نێو گێژاوێکی بێ ئاسۆی چارەسەرەوە، بە هەموو پێوەرەکانی عەقڵ و مەنتیق و زانستەوە، بەم پینە و پەڕۆکردنە بێ سەرووبەروو پەلەپڕۆزیەوە، نەک چارەسەر ناکرێ، بەڵکو قەیران دوای قەیرانیش بوونەتە دیاری بۆ کۆمەڵانی خەڵک و زیاتر ڕۆچوونی چینی موچەخۆر لە گێژاوی بێچارەیی و ژیانی پڕلە مەینەتی و هەژاریەوە.

لە وەتەی کوردستان کەتۆتە نێو ئەم گێژاوەوە، حکومەت و حزبە سیاسیەکان دەیان پڕۆژەو پاکێج و نەخشە رێگای چارەسەری دۆخەکەیان ئاڵوگۆڕ کردووە و لە کۆبوونەوەی بێ ئەنجام و سەردانی کردنی یەکتر و یاری قۆڵ قۆڵێنی بێ ئاکام بەردەوام بوونە.  ئەم هەموو پاکێچ و پڕۆژە و پێشنیار گۆڕینەوانەش لە زۆر حاڵەتدا کێببەرکێیەکی تووند و پڕ لە موزایەدەی خستۆتە نێوان حزبەکانەوە. 

کۆی گشتی پڕۆژەکان لە دەور یەک ئامانجی گەورەدا دەخولانەوە، کەوا خۆیان لە قەڵاچۆ کردنی گەندەڵی و هێنانەکایەی دادپەروەری و شەفافیەت و نەهێشتنی سیستەمی شازی نازانستی، نامەنتقی و بێدادی داهێنراوی پاشەکەوتدا دەبینیەوە.

ئەم پڕۆژەوپاکێجانە دواجار نەک خۆری بە ئەنجام گەیشتنینان نەبینی و بە هۆی زۆری و بۆریانەوە لە بیرکرن و پشتگوێ خران، سڕکران و دیراسە نەکران ونەخرانە بواری جێ بەجێکردنەوە، بەڵکو بوون بە هۆی موزایەدە کردن بە سەر یەکەوەو لە دەزگاکانی ڕاگەیاندنەوە کران بە پەیامی بە پەلەی دڵخۆشکەری موژدەبەخشی ( چارەسەری)ەوە. چارەسەرێک کەوا جگە لە نەهامەتی، قەرزداری، بێدەرەتانی و خەفەتی زیاتر هیچ دەرەنجام وپەیامێکی تری ڕاستگۆیانەیان بۆ ڕاست کردنەوەی دۆخەکە ئابوری و سیاسیە لارو ئاڵۆزەکە پێ نەبوو.

لە ناو هیچ لە گەلانی دونیا نەبووەو نیە و ڕووی نەداوە کۆمەڵێک لە هاونیشتیمانیان بە  بیستنی هەواڵی بڕینی موچە، یا کەمکردنەوەی بڕە موچەی بەشەکەی تری کۆمەڵگاوە، خۆشی دەرببڕن و لە ڕێگەی کۆمێنتەکانیانەوە دەست خۆشی لە حکومەت یا لایەنی پەیوەندیدارەوە بکەن.  نەبیستراوە بەشێک لە هاوڵاتیان بە هۆی نەمان یا کەمکردن یا هەڵوەشانەوەی موچەی توێژێکی تری کۆمەڵەوە، دەیان پۆست و کۆمێنتی شادی و کامەرانی و بەختەوەری لە تۆڕە کۆمەڵایەتیەکان دابەزێنن. 
ئەم حاڵەتە بە بۆچونی من دەربڕ و سەلمێنەری جۆرێکە لە نەخۆشی کۆمەڵایەتی درێژخایەن کەوا لە زەمەنی پۆست مۆدێرنیزم و جیهانگەرایی و پێشکەوتنە تێکنۆلۆژیە خێراکانی بواری ئای تی و .... بەداخەوە بۆتە مۆرکی پڕ لە شەرمەزاریی یەکێک لە دەردو نەخۆشیە گوێزراوەکانی کۆمەڵگەی وێرانی کوردی و پۆپۆلیزمی بۆماوەیی و دەرەنجامی ململانێ حزبیە درێژخایەنە بێ کۆتاکانەوە. ئەم دۆخە دڵتەزێنە وا خەریکە لە حاڵەتەوە دەبێتە یەکێک لە و دیاردە ناشرینانەی، کۆمەڵگەی کوردی ئەشێ تا زەمەنێکی نادیار بە دیاریەوە گیر بخوات و جۆرێک لە " پەتای ئێرەیی" و  " پۆپۆلیزمی ئابوری" بۆ بەرهەم بێنێت. 

لە هچ وڵاتێكی ئەم جیهانە پان و بەرینەدا نەبووەو ڕووی نەداوە، یەکێک دوای تەواو بوونی ئەرکی پەرلەمەنتاری یا وەزیربوون ( کە لە  هەناوی خۆیدا خاوەنی کۆمەڵێک تایبەتمەندی و خەسڵەتی ئابوری و کۆمەڵایەتیە)، یەکسەر بچێتەوە سەر پیشەی جارانی، جا ئەم پیشەیە مامۆستایەتی بێ یا فەرمانبەرێکی ئاسایی فەرمانگەیەکی حکومی بێ یا تازە دەرچووێکی زانکۆ. 

 بەڵکو بە پێی شایستەیی و تواناو بەهرەکانیەوە ئەتوانێ ببێ بە بەرێوەبەری کۆمپانیایەکی گەورەو لەکەرتی  تایبەت پیشەیەکی پڕلە داهات تر بۆ خۆی بدۆزیتەوە. ( ڕەنگە پێوەری ئەم تایبەتمەندیانە لە کوردستان بەو جۆرە نەبێت)

نەبووە پەرلەمەنتاری وەک پیشە سەیر بکرێت و دەست نیشان کردنی پەرلەمەنتار لە سەر بنەمای( موستەفید)، سوودمەند بوون یا نەبوونی بنەماڵەوە دیاری بکرێت، نەک بە پێی توانا و بەهرە و ئاستی شارەزایی و ڕەوانبێژی و ڕابردوو و ئەزمونی دەوڵەمەندی کار کردنەوە.

بەداخەوە ئێمە گەلێکین ئێرەیی بە هەموو دەسکەوت و پۆست وپلە و پایە و ئیمتیازاتی یەکترەوە دەبینین...چاومان بەرایی سەرکەوتنی یەکتر نادات... و تا بۆمان بکرێت دژایەتی ئەو کەسانە دەکەین بە قودرەتی قادر!! یا بە هۆی شیان و شایستە بوون و لێوەشاوەیی و هەوڵ و ماندوو بوونی خۆیانەوە، گەیشتووونەتە پلەیەکی حکومی یا کۆمەڵایاتی بەرزەوە. 

تۆرە کۆمەڵایەتیەکان پڕاوپڕن لە کۆمێنت و لێدوانی ژەهراوی و پڕلە سووکایەتی و جنێودان دژ بەو کەسانەی مووچەیەکی بەرزتر لە هی ئێمە وەردەگرن، یا پلەکەیان لە پلەی ئێمە بەرزترە. 

لەم بازارە بێ سەرووبەرەی موزایەداتی ئێمە لە لایەک و حزب و لایەنە سیاسیە ئەزەلیەکان لە لایەکی ترەوە لە تۆرە کۆمەڵایەتیەکان و مێدیاکانەوە کەوا مێشک و دڵ و دەروونی هەموومانی پڕ کردووە لە بەلێنی بێ سەرەنجام و گفتی بەتاڵی بێ ئەنجامەوە، ئەوەی حاڵی حازر بە خەیاڵی کەس دانایەت، چارەنووسی پڕۆژەو پاکێجەکانی چارەسەرکردنی گەندەڵیە زەبەلاحەکانە. ئەم گەندەڵیانەی ئابوری وڵاتی خستە سەر ئەژنۆ و کۆمەڵگەی لە ناخەوە داڕزاند و هەپروون بە هەپروونی کرد و کردیە وێرانەیەکی ئابوری و کەلاوەیەکی داتەپیوو شێواوەوە.

لە جیاتی کەم کردنەوە یا نەهێشتنی گەندەڵیە ماڵوێرانکەرە گەورەکان و ئاشکرا کردنی گەندەڵکارە بێ مۆڕاڵە بێ ویژدان و موفتەخۆرە تێر نەخۆرەکان، ئێستاکە خەیاڵی هەموو کەس بەوەوە مەشغول کراوە گوایە بڕینی موچەی نایاسایی و نائاسایی، هەرێمی کوردستان دەخاتە سەر راستە ڕێی گەشە سەندن و پێشکەوتن و دادپەروەریەوە و گەندەڵی چینی خەنی ناهێڵێ و گوزەرانی موچەخۆران و هاونیشتیمانیان دەخاتەوە دۆخێکی پڕ لە خۆشگوزەرانی و ڕەفاهیەت و پڕ لە خزمەتگوزاری و هەڵهاتنی خۆری نەمانی کێشەکان و سەرەتاکانی کامەرانیەوە. 

بەڵام بە دڵنیاییەوە و بە بێ گومانی خراپەوە،  بڕینی موچەی هەر چین و توێژێك ( یاسایی یا نائاسایی) لەم بارودۆخە هەستیارو تێکچڕژاوو گێژاوە سیاسیە و زەمەنە پڕلە تەنگژەیەدا، بە هیچ شێوەیەک چارەسەری کێشە قوڵە ئابوریەکان ناکات ونابێتە هۆکاری ڕەواندنەوەی دڵە ڕاوکێکان و بوونیاد نانەوەی بڕواو متمانەی دۆڕاو بە حزب و لایەنە سیاسیە کانەوە، بەڵکو قەیرانێکی تازە بە فۆڕم وناوەرۆک و مەغزا و سیامەیەکی ترەوە بۆ توێژێکی دیکەی کۆمەڵگە بە دیاری دێنیت و گەندەڵیە زەبەلاحەکان ( جارێکی تر) لە بیر خەڵک دەباتەوە و گەندەڵە خاوەن پارێزبەندەکان دەتوانن بۆ ماوەیەکی تر و زەمەنێکی ترەوە ( یا ئەبەدی) بە خەیاڵی ئاسودە و بە سوود وەرگرتن لە دۆخی ئاڵۆزکاوی سیاسی و نەزۆکی هەوڵەکانی " چاکسازی" ( پینەسازی)، درێژە بە ژیانی پڕلە بەختەوەری و پڕ لە داهاتی ئابوریان بدەن و لە کاتی پێویستیشدا بکەونە موزایەدە بەسەر ئەم هاونیشتیمانیانەی بەهۆی ئەمانەوە لە دۆخێکی پڕلە مەینەتی و بەدبەختیدا ژیان دەگوزەرێنن و هەر رۆژێکیان بەرامبەر قورسایی تەنگو چەڵەمەکانی ساڵێکە.  

 

ئەم وتارە دەربڕی رای نوسەر خۆیەتی و خەندان لێی بەرپرسیار نییە

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP