ھەردەست نا فرمێسك و برسێتی و مەرگی خەونی گەنجانیشی لەپشتەوەیە!

کاوسێن بابەکر - 22-12-2017 - 2512 جار خوێندراوەتەوە

كاتێ خەڵكی وەتەنگھاتوو دێتە سەرجادە،دەستەڵات واراھاتووە بەیەك ووشە خۆی لەبەرپرسیارێتی دەربازبكات و یەكسەربڵێ ((دەستیان لەپشتەوەیە!!)) لە 2011 دواتر 2015  و ئێستاش دەیبینین، حكومەت ودەستەڵات بێ ئەوەی ھیچ خۆماندوو بكەن لەسەر زاری نێچیرڤان بارزانی ،لەجیاتی دۆزینەوەی ڕێگاچارەیەك بۆ ئەو دۆخە پڕ نەھامەتیە،یەكسەر دێن وزۆر چاوقایمانە دەڵێن ئەوانە گێرە شێوێنن ودەستیان لەپشتە، داواكردنی مووچە كەمافی ڕەوای فەرمانبەر وپێشمەرگەو كەسو كاری شەھیدوكەمئەندام و خانە نشینانە دەستی بۆچیە؟ داواكردنی شەفافیەت وداھات وخەرجیەكانی ئەم ووڵاتە پێویستی بەچ دەستێكە؟داواكردن بۆ پاكردنەوەی لیستی دەنگدەران وئامادەسازی بۆ ھەڵبژاردنێكی پاك وبێگەرد كام دەستەی دەوێ؟ 

بەگژاچوونەوەی گەندەڵی وڕەوانەكردنی گەندەڵكاران بۆ دادگا قاچ ودەستی دەوێ لەپشتیەوە بێ؟داواكردن بۆبە وەفابوون بۆ بەڵێنە زۆرەكانتان پێویستی بەدەستە؟ تاكەی ئەم قەڵاگەندەڵانە دەپارێزن؟ئێوە لەسەددام وقەزافی وحوسنی موبارەك بەتواناترن؟ 

بەڵێ ئەم خۆپێشاندانانە زۆر شتیان لەپشتەوەیە؛

 

 برسێتیان لەپشتەوەیە كاتێ گەنجێك كاری دەست ناكەوێ ودەبینێ باوكی مووچەكەی پێنادەن ولەولاشەوە دینارێك لەگیرفانیدانییە وبە بۆڵەبۆڵ لەماڵەكەی دیتەدەرو روناكاییەك شكناباوناشیەوێ پەنابۆدزی وتاوان بەرێ،لە پەناشیەوە كوڕەكانی ئێوە گاڵەبەپارەو سەیارەی دوا مۆدیل دەكەن، ئیدی دێتە سەرجادە!

بەڵێ،حكومەتێكی بێ پلان وبێ بەرنامەی پەروەردەیەكی دروستی لەپشتەوەیە،كەكتێبەكانی پڕن لە توندوتیژی كۆمەڵایەتی و ئایینی وخاڵی خاڵین لەوانەی مرۆڤدۆستی.

بەڵێ دەزگای  حكومەتێكی لەپشتە،كە پۆلیس وھێزە سەربازیەكانی ڕانەھێناوە بەشێوەیەكی مرۆڤدۆستانەو لەچوارچێوەی یاسادا مامەڵە لەگەڵ ھاووڵاتیانی خۆی بكات وبەتووندوتیژی بەگژیان دادەچێتەوە !

بەڵێ فرمێسكی دایكی شەھیدو پێشمەرگەی لەپشتەوەیە كە دینارێكی پێ نییە منداڵەكەی پێ ژیركاتەوە یان كرێ خانوەكەی بدات!

بەڵێ مەراق وخەونی بەئاكام نەگەیشتووی ئەوژن ومنداڵ و گەنجانەی لەپشتەوەیە كە یان لەدەریای ئیجەدا خنكان یان خۆیان ھەڵواسی!

بەڵێ ئەو خوێندكارانەی لەپشتەوەیە كە سەرەڕای ئەم ھەمووداھاتە،لەجیاتی پارەیان پێ بدەن نەبنە بارگرانی بەسەر خێزانەكانیانەوە لەم قەیرانەدا پارەیان لێ دەستێنن!

ھەموو میللەتیان لەپشتەوەیە كە بەرمیلێك نەوتیان پێنادەن و ھەمووڕۆژان سەدان بەرمیل بەبەرچاویەوە ئاودیودەكەن و دەشبیستن لە پارەكەشی بە سەدان ملیاردینارتان لەبانكەكانی دونیادا قایمكردووەوھیج وەلامێكیشتان پی نییە!

گرێبەسەتەنەوتیەكان وسەرجەم مامەڵەداراییەكانتان لەتاریكیدا دەكەن وخەڵك ناچاردەبێ گومان لەھەموو كارێك وقسەیەكتان بكات!

میدیایەكی لەپشتەوەیە لەحزبەكان زیاتر سیاسەت دەكات ونەتانتوانیەوە بەیاسایەكی مەدەنی نیشتمانی ڕێكی بخەن!

ئۆپزسیۆنێكی لەپشتەوەیە قاچێكی لەناو حكومەت و وەزیرو گزیرت بۆداناوە و قاچەكەی تری لەسەر جادەیەو قایمقایمەكەی بەرد دەگرێتە فەرمانگەكەی خۆی!

 ھەركەسانی گێرەشێوێن؟ بەڵكو لەوانەیە سیخورو حەڵقە لەگوێی دوژمنانی كوردیش كەچاویان بەم سەربەخۆییە ھەڵنایە،خۆیان بخزێننە ناوی!بەڵام ئەگەر ئێوە تۆزێك خۆتان مادووكردباوكەمێك لەودزی وگەندەڵییەی خۆتان ودەست وپێوەندەكانتان گردبایەوە،ئەو خۆپێشاندانانە نەدەگیشتنە ئەو توندوتیژی وسوتاندنە كەلەكۆتاییدا بەزەرەری خۆپێشاندانەكان وكارێكی دواكەوتانەو نانیشتمانانەیەودەبێ بنبڕ بكرێ.بەڵام ئەگەر ھەروا كەمتەرخەم وكەڕەمسۆبن خۆپێشاندانەكان بەرەو ئاقاری خراپتردەڕۆن ولەكۆتاییشدا ئەو دەستكەوتانەی دەیان ڕوباری خوێنی لەپێناودا بەخشراوە دەدرێتە دەم ڕەشەبا! دووریش نییە ئەم دۆخە بیانووبداتەدەست بەغداو بەپشت بەستن بەدەستوور ھێزبنێرێتەوە كوردستان وئەو نیوەیەی ماویشە داگیری بكاتەوە.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP