کام ئەزموون و دەستکەوتانە بپارێزرێن؟

دەلیل جەمال - 20-12-2017 - 2976 جار خوێندراوەتەوە

هەرکەتێک دەسەڵاتی ستەمکاری وگەندەڵ وپیسخۆری ڕووبەڕووی فشاری جەماوەری و ڕەخنەی جدی دەبێتەوە یان لەلێواری ڕوخان وداروخانی قەڵای ستەمکاریان دەبنەوە،هەوڵ دەدەن لەڕێگەیەکی دیکەو لە گوتارێکی دیکەدا خۆیان نمایش دەکەن بەچەند دروشمێک دەیانەوێت ئاراستەی فشارو ڕەخنەی جەوهەری بگۆڕن ئەمە تاڕادەیەک لەڕابردوودا توانراوە سودی هەبێت بۆمانەوەی ستەمکاری بەداخەوە توانراوە دڵسافی گەل بقۆزرێتەوە نابۆئەوەی دەسەڵات سودلەم دڵسافییە وەرگرێت بۆجاک بوون وچەسپاندنی دادپەروەری بەڵکو بۆدرێژەدان بەتاڵانی وپیسخۆری.

ئەگەر سەیرکەین چ لەڕابردوو چ لەئێستادا دەسەڵات داوای پاراستن ومانەوەی ئەزموون و دەستکەوتەکان دەکات لێرەدا پرسیارە جەوهەری و واقعییەکە خۆی بەیان دەکات (کام ئەزموون ودەستکەوتانە؟)ئەزموون دوفۆڕمە ئەزموونێک مایەی شانازی وپاراستنە کە میللەت خۆی بەشێکە لێی وپێشموایە خۆی دەیپارێزێت چونکە خۆی دروستکەرو بونیادنەرییەتی.

ئەزموونێکی دیکە کەلەدەرەوەی خواست وویستی میللەتە وبۆخۆی هاتووەو خۆی فەرسکردووە،کەئەزمونێکی زاتییەو هی دەسەڵاتێکی بێباک ومافیاگەرە هیچ کات میللەت مەحکومی پاراستنی نییە بگرە پێویستە ئەم جۆرە ئەزموونە نەخرێتە ناوبازنەی چاکەی گستییەوە چونکە خاوەندارییەتییەکەی هی گەل نییە

یاخود دەوتریت دەستکەوتەکان بپارێزن لێرەشدا دەپرسین کام دەستکەوت؟دەسکەوتێک کەشایەنی پاراستن بێت دیموکراسی ودادپەروەری وئازادی ودەسەڵاتێکی رەشیدو ژیانێکی باش بۆتاکەکان ئەمە دروستە.

دەستکەوتێکی دیکە ئەوەیە کەسەروەت وسامان وموڵک وکۆمپانیای چەند بەرپرس ودەسەلاتدارێکە کە بەرێگەی ناشەرعی کۆکراوەتەوەو دەرئەنجام میللەت کەوتووەتە ڕەزالەت وباری خراپی بژێوییەوە

خۆدەکرێت بڵێین چی پیرۆزە لای ئێوە ؟خاک بێگومان دیمان چۆن بەشێکی زۆری خاکتان دۆڕاند،یان شەهید یان پێشمەرگە بێگومان ئەوەی تۆزێک وریاو واقع بین بێت دەزانێت هیچ لەوقسانەو دروشمانەی باسی دەکەن لەجەوهەردا پێچەوانە بیردەکەنەوەو پێچەوانە دەڕۆن 

کەوابوو ئەزموون ودەستکەوت لای ئەم دەسەڵات وگەندەڵ ونوخبە سیاسییە تەنها ژیان وسەروەت موڵک وداهاتیانە هەرئەوەشە هەوڵی مانەوەدەدەن هەرئەوەشە بۆمانەوە خوێنی ڕۆڵەکان حەڵاڵ دەکەن هەرئەوەشە هەموان دەڵێن داوای گەل ڕەوایە بەلام بۆ جێبەجێکردن نا.
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP