‏(دولة العدل تدوم وإن كانت كافرة ودولة الظلم تزول ولو كانت مسلمة)

لە دوو رۆژی رابردوودا شەپۆلێکی نارەزایی بەشێکی ھەرێمی کوردستانی گرتووەتەوە، ھاووڵاتی و فەرمانبەران بۆ مافە ڕەواکانیان رژاونەتە سەر شەقامەکان، بەداخەوە دروستبوونی ئاڵۆزی لە نێوان خۆپیشاندەران و ھێزە ئەمنیەکان مایەیی نیگەرانییە چونکە ھەردوولا رۆڵەی ئەم گەلەن. 

خۆپیشاندان بۆ داواکردنی ماف کارێکی تەواو مەدەنییە و لەگەڵ بنەماکانی دیموکراسی یەک دەگرێتەوە، بۆیە پێویستە دەزگا ئەمنییەکان ھاووڵاتی و ئاسایش بپارێزن دور لە بەکارھێنانی توندوتیژی، بێ گومان خەڵک لە تاو برسێتی و نادادی لەم ولاتە پڕ خێر و بێرە تورە و نیگەرانە، جیاوازی چینایەتی لە نێوان ھاووڵاتی و دەسەڵاتدار ھۆکاری تورەیی خەڵکە. 

سیستەمی حومکڕانی لە ھەرێمی کوردستان توشی داروخانێکی تەواو ھاتووە، گەندەڵی و نا دادی و مافیاگەرایەتی و تاڵانکردنی سامانی وڵات ھۆکاری ئەم شکستە گەورەیە، بۆیە ناکرێت چیتر ئەم وڵاتە ھەروا بێباکانە بەرێوەببرێت و ھەر رۆژە بدریتە دەست قەدەرێک و کارەساتێکی بەسەردا بھێنرێت، کاتی ھاتووە بیرمەندان و دڵسۆزانی وڵات تەکبیرێکی جددی بکەنەوە لە چارەسەرکردنی بنەڕەتی کێشەکان و دابینکردنی بژێوی خەڵک و دەسەڵاتێکی باش و شایستە بھێنینە کایەوە کە شایستەی قوربانییەکانی گەل بێت. 

پێویستە خۆپیشاندەران لە پاڵ داوا ڕەواکانیان بۆ گەیشتن بە ئامانج کە خۆی لە دابینکردنی مافە سەرەتایەکان و بژێوی دەبینێتەوە ئارامی کوردستان و موڵک و ماڵی گشتی بپارێزن تا ئەجندای تر تێکەڵ بە داواکارییەکان نەکرێت.