تۆ بەختەوەری!!!

شۆڕش خالید ئاژگەیی - 28-11-2017 - 4051 جار خوێندراوەتەوە


ئایا تاکو ئێستا بیرت لەوە کردۆتەوە:

ئەگەر تۆزێک خۆراک و خواردەمەنی و هەندێ نانە رەقە ت لە ناو بەفرگرەکەی ماڵەوە هەیە، ڕووت و ڕەجاڵ و بێ بەرگ و پۆشاک نیت... ئەگەر سەرپەنایەکت هەیە گەرماو سەرمای وەرزەکان ئازارت نەدات و بێتاقەتت نەکات و شوێنێکت هەیە بۆ خەوتن و حەوانەوەو پشوو دان و مانەوە، بزانە لە 75 % ی دانیشتوانی سەر زەوی دەوڵەمەندترو خواپێداوترو بێ نیازتری. 

ئەگەر هەندێ پارەوپوڵت لە سەر ژمارەی بانکەکەت یا جانتا بچووکەکەی گیرفانت هەڵگرتووەو بێ پارە نیت، بزانە بەشێکی لەو 8% دەوڵەمەندانەی دوونیا.

ئەگەر ئەمڕۆ بەیانی لە کاتی لە خەو هەڵسان هەستت بە تەندرووستیەکی دوور لە ئێش و ئازارو دڵە راوکێ و لەشگرانی و بێزاری کرد، بزانە لەو یەک ملیۆن کەسەی کۆتایی ئەم هەفتە بە چاوی خۆیان نابینن، زۆر بەختەوەرتری. 

ئەگەر تا ئێستا نە چوویەتە بەرەکانی شەڕو جەنگ و پێکدادان و گولە باران و ئاگرباران و ماڵوێرانی و زامدار بوون و لە دەست دانی بەشێک لە جەستەت و پەککەوتەیی و نەخراویتە ناو ژوورە تاریکەکانی ئەشکەنجەدان و سووکایەتی پێکردن بە کەرامەت و بوون و ئایین و نەتەوەوئاڵاوباڵاو کەسایەتی و مرۆڤ بووونت، بزانە لە و 500  ملیۆن کەسە زیندووەی لە ژێر ئەزیەت و ئازار و ئەشکەنجەی ڕۆحی و جە ستەیی بەردەوامدا دەژین، زۆر بە بەختتری.

ئەگەر توانیت ئەم چەند دێڕە بخوێنیتەوە، دڵنیا بە لەو سێ ملیارد کەسەی نەخوێندەوارن و توانای خوێندن و نووسینیان نیە زۆر بە ختەوەرتر و بە بەخت ترو کامەرانتری.
 لە کۆتاییشدا ئەگەر هێشتا لە نێو چوار  دیوار وخانووی خۆت و ماڵ و منداڵ و شارو گەرەک و ئاوایی خۆتدا دەژی و ماڵ و حاڵ و بوون و نەبوون و مڵکت داگیر و وێران و خاکی شارەکەت سووتماک و ڕۆڵەکانی شارەکەت و براو هاوژین و جگەرگۆشەکانت نەکەوتوونەتە بەر شاڵاوی پاکتاوی ڕەگەزی و سڕینەوەی تائیفی مۆدێلی 2017 ، بە بەرچاوی کۆمەڵگەی داڕماوی نێودەوڵەتی لە ڕووی مۆڕاڵ و ئەخلاقی ئینسانی و بانگەشەکارانی پاراستنی مافی مرۆڤ (لە ئەسڵدا پاراستنی بەرژەوەندیە ئابوریەکان)، دڵنیا بە لەو براو خوشکە کوردانەت زۆر بەختەوەرتری کەوا بە هۆی کوردبوونیانەوە سەد ساڵە تاڵاوی پاکتاوی ڕەگەزی و دەمارگیری قێزەوەنی تائیفی و داگیرکاری و دوژمنکاری دەچێژن و بوونەتە قوربانی و بارمتەی بێدەسەڵات و داماوی کوردبوون و دابەشکاریە پڕ لە ستەم و شەمەزاریەکەی یەکەم جەنگی جیهانیەوە.
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP