تەپەی پێی خێوی کۆنگرە دێت!

کاوسێن بابەکر - 18-11-2017 - 2442 جار خوێندراوەتەوە

کۆنگرە لەهەموو حزب وڕێکخراوێکدا وەک وێستگەیەکی بەخۆداچوونەوەو خۆڕێکخستنەوە، زەرورەتی ژیانی هەرحزب و ڕێکخراوێکە، هەڵسەنگاندنی چوارساڵ کاری ژیانی حزبە، رێکخستنەوەی هەڵوێست و دونیابینی حزبە بەرانبەر بە ڕوداوو ئاڵوگۆڕەکانی مەیدانی سیاسی وداڕشتنەوەی بەرنامەو دونیابینی حزبەکە بەپێی دەرهاویشتە سیاسی و سەربازی و ئابورییەکانی قۆناخەکە.

لەهەمانکاتدا بەپێی پرەنسیپەکانی دیموکراسی دەستاو دەستکردنی دەستەڵات و نوێبوونەوەی سەرکردایەتی وڕەخساندنی دەرفەتی یەکسان بۆ سەرجەم ئەندامانی حزب،بۆنوێکردنەوەی بیرو تواناکانی سەرکردایەتی وهێنانی خوێنو تەوژمی نوێیە.

یەکێتی و کۆنگرە؛

دەبوایە یەکێتی بۆ کۆنگرەی پێنجەم خۆی ئامادەبکات کەچی کۆنگرەی چوارەمیش هێشتا مشتومڕی لەسەر دەکرێ!ئەوانەی لەبەرژەوەندی تایبەتیدا نقوم بوون،نەک چوارساڵ بەڵکو لەوەتەی یەکێتی هەیە سەرکردایەتی ئەو حزبەن وبۆ تاقە یەک دەورەش نەهاتونەتە خوار،کۆنگرە وەک خێوێک دەبینن کە بۆ مەرگی سیاسی ئەوان هاتبێ!

مرۆڤ گیانەوەرێکی میزاجی سەیرە، ئەو گەنجەی تا دوێنێ ملی لەسێدارە دەسوو بەگژ کاری نەکردەدا دەهاتەوەو بەچەد چەکێکی ڕزیو و نانەڕەقەی شوانان بەغدای هێنابوە لەرزە، ئێستا ئەژنۆی لەترسی کۆنگرە شکاوەو ببڕای ببڕای نایەوێ کۆنگرەبگیرێ، لەپەرێزی خۆی رانابینێ ملی بخاتە بەردەم تیغی ویژدانی ئەندامانی حزبەکەی! دەزانێ خەم وخولیای لەدەوری کۆمپانیاو بەرژەوەندیا کەسیەکانی چڕبۆتەوەوچاوی  یەکێتی لاوازو بنێس نابینێ ،ئەو یەکێتیەی بە١٩ساڵ تەمەنەوە بوو بەتاقە ڕکابەری پارتی خاوەن ٥٦ساڵ تەمەن لەساڵی ١٩٩٢داو نیوەی دەنگەکانی بۆ خۆی برد!کەچی ئێستا لەسای سەری ئەمانە بۆتەوە بە١٨کورسی بەرانبەر ٣٨کورسی ئەو حزبە!

کەسی نادێموکرات هەر ئەوەندە کاری بەدیموکراسیە تا بەپەیژەکەیدا سەردەکەوێ بۆدەستەڵات،کەسەرکەوت شەقێک لەپەیژەکەدەدا بۆئەوەی کەسی تر جێگەکەی لەق نەکات،ئیدی دێموکراسی وەک ووشەیەکی جوان لەنێو زماندا دەمێنێتەوەو هیچ کەس بەقەد خۆی ئەو ووشەیە خەرج ناکات!

دەزانم هیچ حزبیک لەکوردستان ئازایەتی ئەوەی نییە پرەنسیپەکانی دێموکراسی پیادەبکات ودەستاو دەستکردنی دەستەڵات لەحزبدا پیادەبکات وبیکات بەنەریت،سەیرکردنی لیستی سەرکردایەتی حزبەکان بەئاسانی پێت دەڵێ ناوەکان هەرهەمان ناوی چەندان ساڵی لەمەوبەرن بەکەموکەک دەستکاریەوە،خۆ بەرپرسە یەکەمەکان هەر هیچیان نەگۆڕاون!

تکایەک بۆ سەرکردەکان؛

ڕووتان لیدەنێم وتکاتان لێدەکەم، ئێوە هێندێکتان خۆتان دەزانن ئیدی دەبێ دابەزن و تواناکانتان چۆڕەبڕو خەمەکانتان لەخەمی حزب ونیشتمانەوە گۆڕاوە بۆ خەمی دەستکەوت و کوڕو کچ ودەستوپێوەندەکان، جورئەت بدەنە بەر خۆتان ولەقیتارەکە دابەزن وکۆنگرەیەکی پاک وخاوێن ببەستن ونەخۆتان ونەهیچکەس ڕێ پێمەدەن دەستی تێوەربدات،خۆتان بەهەموو کەم وکوڕیەکانتانەوە مێژوویەکی پراوپر لەخەبات وگیان بازیتان هەیە، چیتر ئەو شانازیەتان کاڵ مەکەنەوە بەمانەوەتان وەک بەردی خڕ لەسەر ڕێی پێشکەوتنی یەکێتی وپرۆسەی سیاسی،خەرمانەی خەباتی خۆتان لەوە زیاتر مەشەمزێنن، با خوێنی تازەو بیری تازەو توانای نوێ بێتە ناویەکێتی وئێوەش بەئەزمونی زۆری خۆتان پشتگیرو هاوکار بن بەمەش هەم خۆتان هەم مێژووتان لەڕق و توڕەیی جەماوەر قوتار دەکەن و خەڵک ئاشت دەکەنەوە،هەم یەکێتی دەبەنەوە سەر سکەی سەردەمی زێڕینی مام جەلال.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP