بەپەلە

بڕاستی ژی کریار شەرتە ؟

عەلی ئۆرەماری - 11-11-2017 - 4050 جار خوێندراوەتەوە

دسەریدا ھەر كەس دزانیت كۆمكرن و كەفتنە سەرئێكا سیاسەتێن دژبەربوونا ئێك و دو ، فشارئێخستن وب  چۆنەكرن و كرێتكرنا مێژو وبخیانەتدانا   خەباتا  ھەڤدوو ، پەیرەوكرنا وێ  زھینیەتا  كەڤنەشۆپا دبیردانكا سەركردەو پارتیێن باشۆردا ھاتیە جھگیركرن ( ئەز و ئەز ،  ئەگەر نەئەز نەكەس ) نەتنێ  بەرھەمی قۆناخا بیست و شەش سالێن حۆكمرانیا باشۆرە ،  بەلكی ئەوا نھۆژی ھێش  دەرئەنجام و  ڤەرێژا وێ خەباتا جەكداریا جیایی یە ، كە بەردەوام ھنەك جاران دوستبووینە و گەلەك جاران ژی سەنگەر ل ئێك دو شداندینە، سنگێ خۆداینە ئێك و پشتا خۆ داینە دوژمنێن گەل ، كۆ رژێمێن داگیركەرێن كوردستانێ بووینە،  لەوان نھۆ ژی كەفتنە سەرئێكا قەیرانێن سیاسی –ئابۆری – لەشكەری و دابێژی ژی دروستكرنا زومگەراتی و دەڤەرگەراتی و ئافراندنا ئاریانێن دەروونی و  گرێكێن جڤاكی ،  دیاربوونا نیشانێن  مەترسیدارن  لسەر ئاشتیا جڤاكی ،  ژداھێنانێن ڤان پارتیێن باشۆربووینە،  ب رێژە و بێی جۆداھی   ، دڤی تەڤنێ ئەم  دبێژینێ سیستمێ حۆكمرانیا ھەرێما كوردستانێ و سەتمیین  و وندابوونا بەرنامە و دەستپێشخەریێن عاقلانە ژبۆ چارەسەركرنا وان گرفت و قەیرانان ژ ڤالاتیەكێ نەھاتینە  و نەدەرئەنجامێ دژبەربوونێن دەركی بینە ب ئەگەرەك سەرەكی،  بەلكی دجەوھەردا ئەف قەیرانێن ھەنێ دەرئەنجامێ ئەقلێ شۆرەشگێرێن سەردەمێ جیایی بووینە ، لنك وانا سەركردێن شۆرەشێ نفشەكی پیروزە و ھەمی ئەوێن دیتر قەلبن و دنەزانن  ، ئەگەر ل زانكۆیان ژی ھاتبنە پەروەردەركرن و ڤیاینە بھەمان ئەقل و بھەمان سەنگەرگرتن ل ئێك و دوو و  بێی ئافراندن و ژدایكبوونا  فەلسەفەیەكا تایبەتا حۆكمرانیێ ،  دەوڵەتێ و دەوڵەتداریێ  ئاڤا بكەن .

لەوان نھۆژی بلا حیبەتی نەمینین دەما دبینین سیستمێ حۆكمرانیا باشۆر  نمۆنەیەكا جودایە ژ ھەمی وان سیستمێن ھەی ، سیستمەك بناف دیمۆكراسی یە و ب میناك ژی  برێكا سندوقێن دەنگدانێ برێڤەدچیت  ، لێ سندوق ژی  پڕدبن  ژ دەنگێن ساختە و  دەستا و دەست كرنا دەستھەلاتێ ژی  گەلەكا ب ئاستەنگە و دھندەك میناكاندا ھێش نائێتە قبوولكرن ، بانگێن ئازادیان دكەن و لپێش جاڤێن جیھانێ و ب رۆژا گەش روژنامەڤان تێنەتیروركرن و قەلەمێن ئازاد تێنەبێدەنگكرن ، خۆ بقبوولكرنا یێ بەرامبەر ددەنە نیاسین و بارەگایێن ئێكودوژی دشەوتینن ،  بسەرڤە خۆ بخۆدانێ گەل دزانن و بنھێنیڤەژی لسەر مێزێن داگیركەرا  قۆمارێ بناڤێ گەل دكەن ، لسەر شاشان پالەوانن و خۆەدیێن  پڕوژەیێن سەربەخۆیا ئابۆرینە و بكریاران ژی ب مافیایێن تالانكرنێ تێنە دیتن و ژڤەرێژا حنێرێن پڕوژەیێن وانا ، تنێ ڤلەیێن وان بلند و مشەدبن  ، دبەرامبەردا بێكاری زێدەدبیت و داھاتێ كەسی دپاشڤەچوونێدایە و مەھانەیێن مۆچەخۆران ژی ژ پاشكەوتكرنێ بەرف چارێك مۆچە و ژ چارێك مۆچەی ژی بەرف رەشۆ بدەستێن خۆ ئەگەر دێ ئاف تەبەت ، مەترسیێن تەڤنەكێ ھوسا یێ  حۆكمرانیێ  ژی دەرگە  لھەمبەر ھەمی ئەگەران ژ دەھمەنا ھەژاریێ و بێكاریێ ل تاق و دڤالانە ،  وبانگێن ئێك رێزیێ بلند دكەن و لپشت  پەرداژی تەبكان بۆ ئێكو دو دكۆلن و دفەلەكا ئەزو ئەزدا دژین   ، ھەر كەس دبێژە پێویستە ل ئاستێ قوناخێدابین و قوناخ ژی گەلەك ئالۆزو مەترسیدارە  و مە پێویستیا ب ئێك دەنگی و ئێك گوتاریێ و ئێك رێزیێ  و كارەكێ بھەڤرا ھەیە  ، لێ ھەمی ژی رێكا وێ ئێك رێزیێ د كۆچكا سولتانێ  حزبا خۆدا دبینن  .

ل ڤێرەدایە بێژین  بڕاستی ژی مە كریارەك و كردارەك دڤێتن ، خۆدیێ پڕوژەیەكێ نشتیمانی و خۆمالی بیت بڕامانا ژدەھمەنا سەربۆران ھاتبیتە داڕشتن و  مفا  ژھەمی وان سەتمینا  ھاتبیتە وەرگرتن ،  خۆمالی بیت  ب ڕامانا نەھاتبیتە بۆیاغكرن ب مایتێكرن وئەجنداو  سیاسەتەكا دەرەكی ، فریادرەسەك بیت بڕامانا كانسلكرنا وێ زھنیەتا كەڤنە شۆپ و ئەركێن وی ئاڤاكرن و پێگەھاندنا مرۆڤی بیت  ، پڕوژەیەك بیت گەلەك بلیزانین ھابیتە دانان بڕەنگەكی بازبدەت بسەر دەڤەرداریێ و زومگەراتی و ئایدلۆژگەراتیا سیكۆلار و ئیسلامی  و مینبەرەك بیت بۆ ھەمی وان كەسێن ریفۆرمخازو و دویر ژ ھەڤپەیمانیەكا دەمارگیرا حزبی كۆ پێشوەخت  رێكەفتنان لسەر پارڤەكرنا دەستھەلاتان و پشك پشكێنەیا داھاتی بكەن  و ددەستھەلاتێدا ژی ھەڤركێن سەرسەختێن ئێك بن و لسەر كیستێ ھەڤوەلاتی بژین  ، لجھێ ململانەیا پارتایەتیێ  گۆرەپان لھەمبەر ململانەیەكا عاقلانەیا پڕوژەیێن ھەلبژارنان بێتەڤەكرن، لجھێ درێژیێ ب حزبیكرنا جڤاكی بدەت، جڤاكی ئازاد و ئارام بكەت و رێكی لھەمبەر دایەلۆكەكا نەرم بێتەڤەكرن و پارتێن سیاسی ژی  بكەڤنە دخانەیا خۆیا دروست  دا ، دەستھەلات دئەركێن خۆدا پیروز ببیت و پارت ژی لجھێ خۆدا بێنەدانان ،  پرژەیەك بیت لسەر بنیاتێ بھەڤراكاركرن لسەر ھنگافتنا ئارمانجێن ھەفبەشیەك تێدا ھەبیت بتایبەت ھەفبەشی دپێشكێشكرنا خزمەتگۆزاریان و ھنگافتنا ئارمانجێن نشتیمانی و نەتەوەیی و خۆ دویكرن ل رێزبەندیێن سیكۆلار و ئیسلامی ، نەتەوەیی و ئایینی  ، پڕوژەیەك دەمارگیریا حزبی و ئایدلۆژی و نەتەویی و رەگەزی و ناوچەگەراتیێ بنخیڤیت و كاری ژبۆ دەستھەلاتەكێ بێتەكرن ،دشەرت و مەرجێن وێدا روومەتا كەسی بێتەبلندكرن  و گیانێ ھەڤوەلایتیبوونێ دناخێ ھەر كەسیدا  ئاڤابكەت و داھاتیێ نشتیمانی ژی بكەڤیتە ددەستەكی ئەمیندا و كەسێن ھەژی لجھێن ھەژی بێنەدانان  وبكریار حكۆمەتا ھەڤوەلاتی بێتەدامەزراندن  .

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP