ئایا 2018 بارودۆخەكە دەگۆڕێت

له‌تیف فاتیح فه‌ره‌ج - 30-10-2017 - 4633 جار خوێندراوەتەوە

كوردو خەونی دەوڵەت:

ئەمەریكا و ئەوروپاو دەرو دراوسێ‌ هەموو ئەوە دەزانن، كە كورد خەونی دەوڵەتی هەیەو لەو خەونە پەشیوان نابێتەوە، رەنگە بۆ گەیشتن بەو خەونە هەزار كەند و لەند ببڕێت، بیر لە رێگەی جۆراو جۆربكاتەوە، لێ‌ خەونەكە بەردەوامی هەیە، ئەو پەندەش درۆیە كە دەڵێت كورد ناتوانێ‌ حوكمڕانی بكات، نەوەی نوێ‌ی كورد لە باكور "هەدەپە"  لە رۆژئاوا "یەپەگە" و لە باشورو رۆژهەڵاتیش سەلماندیان كە ئەگەر بواریان هەبێت، دەتوانن نموونەی حوكمڕانی دیموكرات و پێشكەوتوو پێشكەشبكەن، لە رۆژهەڵاتی كوردستان لە دەرەوەی دیموكرات و كۆمەڵەو پژاك، كە وەك حزبی ئۆپۆزسیۆن و بەرهەڵستكاری رژێم هەن، كارەكتەری وەك موهەندیس ئەدەب "بە هادینی ئەدەب" لە قۆناغێكدا دەركەوت و نمونەیەكی بێوێنەی نوێنەرایەتی كردنی نیشانداین.

 ئەمە بۆ "عوسمان بایدەمیر ، سەڵاحەدین دەمیرتاش و هاوڕێكانیان" هەمان وێنەیە، لە رۆژئاوای كوردستان خەباتی رزگاری و رادەستكردنی شوێنە ئازاد كراوەكان بە ئەنجومەنە میللەیەكان نمونەیەكی بەرزی دیموكراسیەو مرۆڤ ناتوانێت هەڵوەستەی لە سەر نەكات، لە باشوریش لە ماوەی رابردودا دەركەوتنی بزوتنەوەی گۆڕان لەنێو ئەو هەموو فشارو زەبرو زەنگەداو دواتر هاوپەیمانەتیەكەی دكتۆر بەرهەم ساڵح و هەروەها دەركەوتنی نەوەی نوێ‌ ئەگەر چی هێشتا دیارنیە پێگەو شوێنیان لە ئایندەدا چۆن و چەندە، هەموو ئەو گۆڕانكاریانە بە ئێمە دەڵێن، كورد توانای زۆری خۆبەڕێوەبەری هەیەو دەتوانێ‌ دەوڵەتداری بكات، گەرچی ئێستا نەیارەكانی ئەو خەونە زۆر توند و ستەمكاریش بن، لێ‌ ناتوانن بەری پێبگرن .

ئەمەریكا و هاوپەیمانە كوردەكەی :

لە ساڵی 1991ەوە بە هەموو كێماسیەكەوە كورد یەكێك لە هاوپەیمانە سەرسەخت و نەگۆڕەكانی ئەمەریكاو ئەوروپایە، ئەم هاوپەیمانە هەركات ئەمەریكاو رۆژئاوا ویستبێتیان شەڕی سەدام بكەن ئامادەبووە، بۆ شەڕی تیرۆر ئامادەبووە، لە شەڕی داعشدا لە رۆژئاڤاو باشوری كوردستان لە سەنگەری پێشەوەی شەڕەكە بووە و قوربانی زۆری داوە، كورد هەرگیز نەیویستوە دەسبەرداری ئەو هاوپەیمانەتی و دۆستایەتیە بێت، راستە هەندێجار كێشەو گرفت دروست بووە، دواجاریان پێداگری بارزانی بوو لە سەر ریفراندۆم، لە كاتێكدا ئەمەریكا هێشتا شەڕی داعش و سەركەوتنی عێراق لە پێشینەی كارەكانی بوو، لە دۆستایەتی و هاوپەیمانەتی كوردو ئەمەریكادا كێشەو گرفت هەن، بەڵام ناكرێت ئەم دۆستایەتیە پەرەی پێنەدرێت ، بۆ كورد زۆر گرنگە بنكەی سەربازی ئەمەریكی لە هەولێرو سلێمانی هەبن ، هەر بنكەی سەربازی نا، دەكرێت لە بواری رۆشنبیری و سیاسی و وەرزشیشدا پەرە بە پەیوەندیەكان بدرێت بوونی هاوپەیمانێكی وەك ئەمەریكا بۆ كورد زۆر گرنگە، هەڵبەت بوونی كوردیش بۆ ئەمەریكا گرنگی خۆی هەیە لانیكەم لەو ڕوەوە كە دەكرێت ئەمەریكا دۆستێكی دیكەی  دیموكراتخوازی لە ناوچەكە هەبێت، پشتكردنە ئەو دۆستە لە لایەن ئەمەریكا بێویژدانیەكی گەورەیە .

كورد هەڵدەستێتەوە: 

لە دەستدانی 51%ی خاكی كوردستان، لە دەستدانی هەموو ئەو شوێنانەی لە 2014ەوە بە دەست كوردەوەن لە كەمتر لە 2هەفتەدا، لە دەستدانی كەركوك و بەشێكی زۆری پارێزگای موسڵ و ناوچەكانی دیالەو سەلاحەدین ،ئەمە راستەو خۆ پەیوەستە بەو قیرسیچمەیی و پێداگریەی بارزانی و هاوپەیمانەكانی سەبارەت ریفراندۆم ، پرسی خیانەت و فرۆشتن و شتی ژێر بە ژێر هەمووی بیاو هێنانەوەیە ، ئەگەر ریفراندۆم بەو جۆرە پێداگری لە سەر نەكارباو ئەگەر ئەو هەموو تكاو داوایە قەبوڵبكرایە ، نەخیانەت ڕویدەداو نەشكست و نەفرۆشتن ، بەڵام كورد ئێستاش ئومێدێكی گەورەی لەبەردەمدایەو لەم شكستە هەڵدەسێتەوە، ئەوەی وەك دیفاكتۆ ئێستا بە دەست كوردەوەیە ، لە 1991ەوە خۆی بەڕێوەی دەبات، سەرەڕای ستەمكاری و شەڕی ناوخۆو نادادی و گەندەڵیەكان وێنەیەكی جیاوازی بەڕێوە بردن بوو لە ناوچەكە ، رەنگە ڕووەخراپەكانی هەر ئەوە بووبێ‌ كە هێزی پێشمەرگەی نەكرد بە سوپایەكی نیشتمانی و هەر بە میلیشیای حزبی هێشتیەوە، جگە لە دەزگاكانی پاراستن و زانیاری و هەر وەها كوشتنی رۆژنامەنووسان و دەركەوتنی مافیای نەوت، ئەمانە ڕووە ناشرینەكەی ئەم دەسەڵاتەبوون، بەڵام جۆرێك لە خۆخاوەنیشی هەبوو، ئێستا ئەو بەشەی كەماوە پێویستی زۆری بە گۆڕینی عەقڵ و ئاوەزو دەم و چاوەكانە، ئەم ئاوەزو دەم و چاوانەی ئێستا لە حوكمڕانیدان ، ئیدی ناتوانن ئەسپەكەبەرەو پێش تاوبدەن، بۆیە گرنگترین شت گۆڕینی ئەم ئاوەزو دەم و چاوانەیە، ئەوەش هۆیەكی سەرەكی دەبێت بۆ هەستانەوەی كورد .

گەڕانەوە بۆ بڕیاری 688:

فەڕەنسیەكان رۆڵێكی گەورەیان لە دەركردنی بڕیاری 688دا بینی، فەڕەنسیەكان دۆستایەتیان لە گەڵ كوردا پەیوەستە بەوەی تاچەند كورد دەتوانن دیموكراتی بن و جیاوازیەكان قەبوڵبكەن .

بڕیاری 688ی ئەنجومەنی ئاسایش، بۆ پاراستنی كورد، وەك خۆی دەمێنێت، كەواتە دەكرێ‌ كورد لە سایەی ئەم بڕیارەو ئەوەی لە رابردوودا بونیادی ناوە وەك حكومەت و پارلەمان و پەیوەندی بە هەموو كەم و كوڕیەكەوە پەرەی پێبدات و باشی بكات، بۆ ئەمەش دەكرێت سەرلە نوێ‌ پەیوەندیەكی تەندروست لە گەڵ دەرو دراوسێ‌ و دنیای دەرەوە دابنێت، من لاموایە بۆ ئەم قۆناغە حكومەتێكی نوێ‌ بە سەرپەرشتی كەسێكی دیارو شایستە رۆڵی گەورەی دەبێت لە گێڕانەوەی شكۆو خودخاوەنی، هەڵبەت بە رەنگە بەرهەم ساڵح بۆ ئەم قۆناغە باش بێت بە مەرجێك هەموو ئەوانی تر پشتگیری بكەن .

نەتەوە یەكگرتوەكان و مادەی 140:

كاتێك ماددەی 140 لە دەستوردا دەنگی پێدرا، ئێمە رەخنەكانمان لە رێو شوێنەكانی ئەو مادەیە نەشاردەوەو بەردەوام كەم و كوڕیەكانی ئەو مادەیەمان دەدایە بەر رەخنەی ئەرێنی، كە بارزانیش لە 2014 گوتی مادەی 140 تەواو ئێمە رەخنەی ئەو بۆچوونەمان كردو پێمان وابوو، ئەوە بیركردنەوەیەكی دروست نیە بۆ چارەسەری كێشەی ناوچە پێكناكۆكەكان ،ئەوەی ئێمە ناومان ناوە ناوچە دابڕێنراوەكان ،ستیڤان دیمستۆراو نەتەوە یەكگرتوەكان بە وردی كاریان لە سەر دۆسیەی مادەی 140 كردووە، پێویستە بۆ هەر ناوبژیوانیەك نەتەوە یەكگرتوەكان و لایەنە نێودەوڵەتیەكان ئامادەییان هەبێت ، جۆرێكە لە گەمژەیی سیاسی حكومەتی عێراق پێی وابێت دەكرێت كورد لە ناوچە كوردستانیە دابڕێنراوەكان بسڕێتەوە، هەر بۆیە تەنها رێگە كاركردنە بە دەستور بە هەمان ئەو بابەتەی حكومەتی عێراقی كاری لە سەر دەكات ، بە دەستوری عێراقی :

كەركوك و ناوچەكانی دیكەی پێكناكۆك بە ئەندازەی یەك حكومەتی عێراقی و هەرێمی كوردستان خاوەنین لە ئێستادا .

هەرێمی كوردستان لە دەستوردا دان پیانراوە .

عێراق وڵاتێكی فیدڕاڵیە .

ئەم بابەتە پێویستی بە هەڵوەستەو قسەی زیاترە .

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP