باخەڵك فریونەدرێت ‌

نەبەز گۆران - 23-10-2017 - 11836 جار خوێندراوەتەوە

ئەو دیمەنانەی بینیمان و ئەو دیمەنانەش لەبەردەماندان و بریارە بیانبینین، دەبێت بەباشی لەوە تێبگەین بۆ كۆتایی هێنان  نییە بە پارتی و یەكێتیی، بەڵكو بۆ سنوورداركردنیانە، بۆ گۆڕینیانە لەحیزبی باڵادەستەوە بۆ فۆرمێكی دیكەی حیزب. ئەو فۆرمە دەسەڵاتەی كە پێشوترهەبوو، بەشێوەیەكی تەواو گۆڕانكاری بنەرەتی بەسەردادێت. ئێستا دوو وتار پەیدابووە.

وتاری یەكەم: وتاری فریودانی خەڵكە، وتارێكە لەلایەن میدیای حیزبییەوە پەخشدەكرێت، دەیەوێت تێكشكانەكان دابەشكات و، دەیەوێت وا لەخەڵك بگەیەنێت جارێكی تر بەهەمان فۆرمی پێشووەوە حیزبی كوردی دەبێتەوە دەسەڵات و، دەبێتەوە بەخاوەن ئابووری بەهێز و، خاوەن هێزی چەكداری جیاجیا و، خاوەن كۆنترۆڵكردنی بازار و ژیان. بەڵام لەراستیدا ئەم وتارە فریودەرانەیە زۆر نابات پێچەوانەكەی دەبینین، ئەویش ئەو كاتەی هەرێم كەوتە گفتوگۆ لەگەڵ عێراق و ئەنجامەكەیمان بینی، ئەنجامی ئەم فریودانەش دەبینین.

وتاری دووەهەم: ئەم وتارەیان تازە پیاكەوتەیەو و واخۆی نمایشدەكات دژە دەسەڵاتی حیزبی پارتی و یەكێتییە، خەریكی دابەشكردنی چكلێتی خۆشبەختیە و پێیان وایە ئیتر پارتی و یەكێتی كۆتاییان هاتووە و، هێزەكانی دیكە شوێنیاندەگرنەوە و هەمان مۆدێلی پارتی و یەكێتیی لەلایەن هێزەكانی ترەوە دووبارەدەبێتەوە. راستییەكەی ئەم وتارەش لەوەی حیزبە دەسەڵاتدارەكان دەچێت و جیاوازییەكی نییە، چونكە خۆشباوەریش تائەو رادەیە كە پێیان وایە هەمووشت كۆتایی هات، نیشانەی ئەوەیە نە وردبوونەتەوە لە رێككەوتنەكە و، نە سەرنج لەسەر گۆڕانكارییەكان دەدەن و نە ئەزمونێكیان هەیە لە سیاسیەتكردن.

بۆ ئەوەی خەڵك نەكەوێتە ژێركاریگەری ئەم دوو جۆر وتارەوە، كە هەردووكی فریودەرانەیە، پێویستە سەیری هێڵی ناوەراست بكات. هێڵی ناوەراست بریتییە لەوەی، هەوڵێك هەیە، هەوڵەكە نوێنەری هەر شەش لایەنەكەی تێدادەبێت. (گۆڕان، كۆمەڵ، بەرهەم ساڵەح، یەكێتیی، پارتی، یەكگرتوو.) ئەم لایەنانە لەم دۆخەدا سەرقاڵدەبن و، هیچ كامێكیان هێندە نالۆژیكی نابن ئەویتر بكاتە دەرەوەی بازنەكە.( كەسیان بۆی نییە ئەویتر بكاتە دەرەوەی پرۆسەی سیاسیی).
  
هەمووان ئەوە دەزانین  پارتی و یەكێتیی لەرووی ئیدارەدان، لەرووی سەربازی، لەرووی دیبلۆماسی، لەروی ناوخۆ و دەرەوە، هەم خۆیان شكستیان هێناوە و، هەم كۆمەڵگەكەیان توشی ئازار كردەوە. ئەما، نەخشەی گۆڕانكارییەكانی ئەم ناوچەیە لەوەگەورەترە هێزێك یان لایەنێك بێت خۆی بكات بە خاوەنی گۆڕەپانەكەی و بەبێ‌ هیچ حسابكردنێك بۆ ئامۆژگارییەكانی (ئەمریكا، هاوپەیمانان.. هتد) بەكەیفی خۆی چیبوێت بیكات. هەموو گۆرانكارییەكی نوێ‌ لەژێر ئامۆژگاری ئەواندا دەكرێت و، هیچ لایەنێك بەبێ‌ سەرنجەكانی ئەوان جوڵەی سیاسیی ناكات، چونكە ئەوەی ئێستا خاوەنی ئەم ناوچەیە حیزبی كوردی نییە، ئەو هێزەگەورانەن لەسەرەوە ناوم بردن. ئەوانیش رازی نابن سەرلەنوێ‌ هێزێك یان دوو هێز دروستبكەنەوە و نمونەی پارتی و یەكێتیی دروست بكەنەوە.
  
كەوایە بۆ ئەوەی وێنەكەمان لارونبێت. چ ئەو لیژنانەی دەچن بۆ گفتوگۆ، چ ئەو پرۆژەیەی بۆ حوكومەتی تێپەر لەم دۆخە دروستدەكرێت، بەهەماهەنگی ئەو لایەنانە دەكرێت. راستە دەموچاوە كۆنەكان لەم جوڵە سیاسییە بەژداریان پێناكرێت، وەلێ‌ حیزبەكانیان ناكرێنە دەرەوەی جوڵە سیاسییەكەوە. 

لەدەرەوەی ئەمە هەر دیمەنێكی تر، هەر وتارێكی تر، هیچ واتایەكی نییە جگە لە فریودانی خەڵك. هەرهێز و كەسێكیش پێی وایە نابێت بەم جۆرەبێت و دەبێت خۆی دەستبگرێت بەسەر گۆڕەپانەكەدا و هەموو ویستەكانی خۆی جێبەجێبكات، بابفورمێت بیكات. بەڵام دەبێت بیرنەچێت  (ئەمریكا و هاوپەیمانان... هتد) خاوەنی ئەم گۆڕانكارییە نوێیەن كە روودەدات، نەك هیچ حیزب و لایەنێكی دیكە. ئەوەی ئەواندەیانەوێت دروستكردنی حكومەتێكی دیموكراسی، لەسەر بنەمای سیستەمی پەرلەمانی، بەهەماهەنگی لایەنە كوردییەكان. ئەوەی ئەوان دەیانەوێت گۆڕینی فۆڕم و بونیادی دەسەڵاتی هەرێمە، نەك تەنها گۆڕنی دەمووچاوەكان، بەڵكو گۆڕنی عەقڵی فەرمانرەوایەتییە. ئەم كردەیەش بەكۆی لایەنەكانی دەكەن. 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP