چارەسەر گۆڕینی یاریزانەکان و چوارچێوەی یاریگاکەیە "داوای مۆدێلی بەرهەم ساڵەح بکەن"

بەهرۆز جەعفەر - 20-10-2017 - 10556 جار خوێندراوەتەوە

سەرکردایەتی سیاسیی کورد و حزبە کوردستانییەکان، ئەو یاریچیانەی پێویستە لە گۆڕەپانەکە دا بن، کردویانن بە تەماشاکەر، ئەوەشی پێویستە لە ناو جمهورا بێت فانیلەیەکیان کردۆتە بەر، بۆ خۆی دێت و ئەڕوات. هەموو ئەوانەی ئیمڕۆ بە پارێزگاری پێشووی کەرکوک "نەجمەدین کەریم" ئێژن خیانەتی کردووەو، بە دوایدا ئەگەڕێن، دوێنێ هەموو پاڵپشتیەکی نەجمەدین کەریم یان ئەکرد تا بچێتە بەغدا دژی دکتۆر بەرهەم ساڵەح خۆی بپاڵێوێ و، ڕێگر بێت لەوەی کاراکتەرێکی گونجاوی وەک بەرهەم ساڵەح بە دەوری گرنگی خۆی هەڵبسێت.!. ئەوانەی ئەڵێن نەجمەدین کەریم خائین بووە، یان ئەوانەن کە چاویان لە پۆستەکەی بووە، یان ئەوانەن کە شەریک و پاڵپشتی بوونە پێشوتر.

کلیک کردنی ئێمە لەسەر " دکتۆر بەرهەم" لە خۆوە سەرچاوەی نەگرتووە، نە بە بێ ئارگیۆمێنت دوای هاتوهەرا کەوتوین، نە دوور و نزیک لە هیچ حزب و گروپێکا بیر لە پۆست و کارکردن و کاندید بوون ئەکەینەوە. 

عەزیزەکەم، لە دەستدانی دکتۆر بەرهەم بۆ یەکێتی خەسارەتێکە شتێک لە مام جەلال کەمتر، دوای تاڵەبانی هیچ کاراکتەرێک ئەوەندەی بەرهەم ساڵەح گرنگ نییە بۆ کورد... بۆچی؟

نەک هەر لەبەرئەوەی بەرهەم ساڵەح نە کوڕ و نە برازای لە خۆی نە ئاڵاندووە تا کۆمەڵگە بەدەست خۆیان و دارودەستەیانەوە لە ڕەزالەتا بێت، لە بەرئەوەی ئەم ناوچەیە لەنگەری شکاوە، مەسەلەکە لەوە دەرچووە گەندەڵی و نەدارایی و بێدادی هەیە، ئەو فاکتەرانە ترسن لە سەر ماڵ ی هاوڵاتیان، ئێستا نەک هەر کار گەیشتووە بەوەی ترس لە سەر (سەر) ی هاوڵاتیانیش هەیه، بەڵکو عێراق و ئێران و ئەمریکاش لە قەلەقی و ڕاڕایی گەورەدا ئەژین، لەوەی ناوچەکە بەتەواوی ببێتە گۆڕەپانی جەنگ و پێیان کۆنترۆڵ نەکرێت، جا دروستکردنی هاوسەنگی هێز " Balance of Power" تاکە پرۆسیدێکە کە باری لاری ناوچەکەی پێ ڕاست بکرێتەوە.

لەواقیعدا بەدرێژایی مێژوو موژدەی ئەوە بە مرۆڤایەتی ئەدرێ کە سبەی خۆر هەڵدێ، کە ڕۆژانی دواتر دونیا چاک ئەبێت، بەڵام تا هاتووە مرۆڤەکان چارەنووسیان باشتر نەبووە، بۆیە بۆ ئەوەی لای کەمی دۆخەکە لێرەدا کۆنترۆڵ بکرێت، بەرهەم ساڵەح زەرورەتێکە ئەوە ئەهێنێ کە شەقامی کوردی هاواری بۆ بکەن و، ڕۆڵ ببینێت لەم گێژەنگەدا، ڕۆڵەکەش ئەوەیە هەم ئێران هەست ئەکات ئەم ناوچەیە تێک ناچێ و، بەهۆی ئەم تێکچونەوە ئیسرائیل و سعودیەو ئەمریکا ئیحتیوای بکەن و، بگەنە سنورەکانی، وە هەم ئەمریکیەکان گرەنتیەک وەرئەگرن کە بەرژەوەندییان پارێزراوە، لەوەش گرنگتر بەرهەم ساڵەح لە توانایدایە ئەو نەزیفە دارایی و قەرزە دەرەکیانەی کۆمپانیاکانی نەوت ڕابگرێت و، زیاتر نەبن. ئەوەش "بە پاڵپشتی ئێمەو مانان ئەکرێت".

بەپێچەوانەوە، دابنیشن بە دیار دۆخەکەوەو، لە ئاستێکی نزمدا چاوەڕێ بکەن گوایە پارێزگارێکی نوێ لە کەرکوک دائەنرێ و، ئەم لەوی پێشوتر باشترەو، واو وا، ئەوە چارەسەر نییە بۆ کەرکوکیەکان و ئەبێت بێژن (سەت ڕەحمەت لە...)
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP