لەخەونمدا سەركردەی حیزبەكان ئەمەیانكرد!

نەبەز گۆران - 30-09-2017 - 5495 جار خوێندراوەتەوە

ماندووبووم، نیوەرۆكەی هاتمەوە ماڵ، هەر بەو جلانەی لەبەرمندابوون پاڵكەوتم و خەوم لێكەت. لەخەونمدا بینیم  بارزانی تەلەفۆن دەكات!هەڵوەستەیەكم كرد، بەخۆمم وت: ئەوە چیدەكەم لێرە؟! چۆن نەیانگرتووم؟ خۆ من بۆم نییە بچمە ئەو سنوورەی دەسەڵاتی ئەوی لێبێت، بەهەرحاڵ: (( بەیانییەكی زوو بوو، تەلەفۆنێكی بەدەستەوەبوو قسەی دەكرد و لە حەوشەكە دەهاتوو دەچوو، دوای كەمێك كاتێكم زانی كۆمەڵێك كەس بەجلی گەریلاوە هاتن، كتوپر جەمیل بایەكم ناسییەوە، باش تۆزێك چرپە چرپ كەوتنە رێی و منیش لەگەڵیاندا. چون بۆ ماڵی مامۆستا عەلی باپیر، ئەویشیان لەگەڵ خۆیان هێناو چون بۆ لای مامۆستا سەلاحەدین، پاش كەمێك چاوەروانی هەرچواریان پێكەوە سواری ئۆتۆمبێلێك بوون، هێندە رووداوەكە كتوپڕبوو كاتێكمزانی لە پێچەكانی هەیبەتسوڵتانین، دوای تۆزێك بۆنی هەوای سلێمانی هات بەسەرما. گەیشتینە سلێمانی، بێوەستان رێك خۆیانكرد بە ماڵی كاك نەوشیرواندا، هەرلەوێ‌ ئاگام لێبوو كاك عومەری سەید عەلی و كوڕەكانی كاك نەوشیروان و كۆمەڵێك لەو دۆستانەی ئەمناسین لەگەڵیان هاتن و راستەوخۆ بۆ ماڵی مام جەلال. زۆری پێنەچوو ئەوێش قەرەباڵەغ بوو، ئەوەی تۆ بزانیت هات بۆ ئەوێ‌. چ سەركردایەتی حیزبەكان بوو رژابوونە حەوشەكەی ماڵی مامەوە. دوای كەمێك  پێكەوە چوونە شوێنی میوانییەكەی مام جەلال، نازانم چیانكرد، بەس ئەوەی كەباسدەكرا لەم هەفتەیە شتێك روودەدات.

زۆری پێنەچوو مقۆ مقۆ دروستبوو. وتیان ئەم هەفتەیە لەماڵەكەی شێخ مەحمود كۆدەبنەوە. پاشكەمێك هەواڵێك بڵاوبوویەوە، رۆژێك دیاریكرا خەڵك بچنە ئەو شوێنە. باش بیرم نییە چی رویدا، بەس رۆژەكەم بیرە. لای ماڵەكەی شێخ مەحمود ئەو دەشت و دەرو كێوە یەك كەسی تری نەدەگرت، هەر هەموو سەرۆك حیزبەكان  لەریزی پێشەوە وەك پۆلی ریشۆڵەی سەر دارتێل بەریز دانیشتبوون.(حەزیان لەریزی پێشەوەیە!) كچان و كوڕان بەجلی ئاڵوواڵاوە. شاییان دەكرد دوو ئاڵا دیاربوون، راستی سەرەتا پێمناخۆشبوو ئاڵاكەی عێراق دەشەكایەوە و ئاڵاكەی هەرێم لەخوارەوەبوو، زۆری نەبرد هەمووشت گۆڕا.

وتیان پێكەوە وتارێكیان نووسیووە. هەر ئەوەنەمزانی وتارخوێن هاتە پێشەوە. بەناوی هەموو هێزە سیاسییەكانەوە قسەی دەكرد، روخساریم نایەتەوە بیر. وتارەكە زۆر سەیربوو، هەر لەگەڵ دەستیپێكردن حەشاماتەكە بەجارێك هاواریدەكرد. لەگەڵ دەسپێكی وتارەكە، وابزانم نەوەیەكی شێخ مەحمود هەڵسا بەرەو ئاڵاكەی عێراق كەوتە ڕێ‌، نوێنەری حیزبەكانی تریش بەرەو ئاڵاكەی كوردستان. نەوەكەی شێخ ئاڵاكەی عێراقی داگرت و نوێنەری هێزەكانیش ئاڵاكەی كوردستانیان بەرزكردەوە، بەجارێك بوو بە چەپڵە رێزان و چاو پڕ لە فرمێسك.

وتار خوێنەكە گوێم لێبوو دەیگووت: " ئێمە هەر هەموومان پێكەوە بریارماندا لە ماڵەكەی شێخدا دەوڵەت رابگەیەنین.(منیش وتم حەزەكەی لەحەوشەكەی پشتەوەش رایبگەیەنن ئەوە كەی كێشەیە) پێكیشەوە بریارماندا هەرچی پێماندەكرێت بیكەین." ئەوەی زۆر خۆشبوو لەلام، وتارەبێژەكە داوایكرد لە ئەمڕۆوە هەموو كوردانی پارچەكانی تر، كوردانی جیهان، لەماڵەكانیان بێنە دەرو برژێنە سەر شەقام. كەس نەچێتەوە ماڵ تا هەموو جیهان ددان بەم مافەدا بنێت. هەر لەوێ‌ بیستم بۆیەكەمجار كوردان ناچنەوە ماڵەوە و لەسەر شەقامەكانن لە هەموو دونیادا و، دونیا پربووە لەدەنگی كورد. هەر لەوێش وتاربێژەكە وتی:" ئێمە هەر هەموومان، هەموو هێزە كوردییەكان بریارمانداوە لە ئەمرۆوە سنوورەكان دادەخەین، ئێمە ناتوانین سنوور لەگەڵ دراوسێك بكەینەوە ئێمەی وەك مرۆڤی ئازاد قبوڵ نەبێت و بیەوێت ژێردەستەبین، ئێمە خۆمان سنوورەكان دادەخەین با ئەوەی ئەوان دەماندەنێ‌ نەماندەنێ‌، نانەكەیان بۆخۆیان و ئازادییەكەی خۆمان بۆ خۆمان." ئەوەم زۆر پێخۆشبوو، دیاربوو كورد بریاری دابێت لەپێناو بەدەست هێنانی دەوڵەتەكەی مردنی پێخۆشبێت نەك هەرەشەی دراوسێكان. 

هەرلەوێ‌ ئاگام لێبوو، گەنجانێكی زۆر خۆیان بەستبوو بەرەو سنوورەكانی كەركوك ئەرۆیشتن و شەوق و زەوقێكی زۆر بەروخساریانەوە دەبینرا. هێزەكانی رۆژهەڵاتیش وا باسیاندەكرد لەسەر سنوورەكان ئامادەن هەرشتێك ببێت بچنە ناو خاكی رۆژهەڵاتەوە. دەرگا بەسەر پارەچەكەی رۆژئاوادا كرابوویەوە و جوڵەیەكی باش دەستی پێكردبوو، دەیان شەرڤانی پەیەدە هاتبوونە ئەمدیوو. گەریلاكان زۆربەیان بەرەو قوڵایی توركیا رۆشتبوون و ئامادەبوون بۆ هەر فەرمانێك. شەقامەكانی ئەوروپا پربوو لەكورد. شارەكانی باكور و رۆژهەڵات شڵەژابوون. هەموو جیهان هەستی بە جوڵەیەكی تازە دەكرد و سوننەكانیش نازانم چۆن لەگەڵ داعش رێككەوتبوون لەناوەراستی عێراقدا شەرێكی قورس دەستی پێكردبوو، ئەوانیش باسی هەرێمیاندەكرد. بەچاوی خۆم هەموو ئەم شتانەم بینی، ئیتر خەریكی سەیركردن و حەپەسان بووم، سەیرم لێدەهات بۆیەكەمجار كورد ببینم ئاوایە! بۆیەكەمجار هێزە سیاسییەكان ببینم خەمی ماڵ و مناڵ و كەس و كاریان نییە و هەرهەموویان پێكەوە خەریكی دانانی بناغەیەكن، پێم سەیربوو ماڵە بەرپرسەكان رایاننەكردوە و منداڵەكانیان لەوێن.))

هەر لەو كاتەدا سەرسامانە سەیری دیمەنەكانم دەكرد، كتوپڕ زەنگی مۆبایلەكەم بەخەبەری هێنام. كە بە ئاگا هاتمەوە زانیم ئەوەی بینم خەونبوو. نە بەراستی دەیبینم نە ئەوانەی ئەمرۆ حوكومرانن هەرگیز شتێكی وا دەكەن. بۆیە لە مۆبایلەكەمەوە لە كەناڵی رووداوەوە هەواڵێك هاتبوو، نووسرابوو: گوایە (شۆڤارۆ گەمارۆ) پشتگیری ریفراندۆمەكەی كورد دەكات. كە باش وردبوومەوە لە هەواڵەكە دەبینم ( شۆڤارۆ) ئەو بەنگلادیشیە داماوەیە كە لێرە سەرپەرشتی كۆمەڵێك خزمەتكاری ماڵە بەرپرس دەكات. 

لەداخا خەوم لێنەكەوتەوە و هەڵسام بەرەو بازار رۆیشتم، دەبینم دەمووچاوی هاورێكانم ترشاوە و كەس نازانێت چی روودەدات. دەوڵەت دروستدەكەن، یان دەنگەكان دەبەنەوە بۆ عێراق. رۆژنامەنووسە نەفرەتییەكانیش هەموویان باسی ئەوە دەكەن ئەمجارەش كورد دۆڕا و سەركردەكانیان میلەتەكەیان خستەوە بەردەم ئازار و بە لاوازییەوە بەرەو عێراق پەلكێشیاندەكەن.
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP