بەپەلە

ئەرێ بەدیلەكانی ریفراندۆم چین؟

مەریوان عەلی محەممەد - 21-09-2017 - 5870 جار خوێندراوەتەوە

ماوەیەكە كردن و نەكردنی ریفراندۆم بۆتە باس وگفتوگۆی نێو سەراپای خێزان و ماڵباتی هەرێمەكەمان و هەمووشیان لەبارێكی  دەروونیی ناجێگیردان و نازانن  ئایا ریفراندۆمەكە دەكرێ ؟ ئەگەریش بكرێ كاردانەوەكانی دراوسێ و دەرەو چین و چۆن دەبن؟  ئەم هەموو ئەگەرانەش زۆر ئاسایی و بگرە كەمبایەخیشن بەرامبەر بە كردارێك كە بەرەو سەربەخۆیی راستەقینەو  و ئەو ئامانجە نیشتمانییەمان بەرێت كە لەپێناویدا رووبارێ خوێنی بۆ دراوە. كەوابوو وەك پرەنسیپ و هەستی نەتەوایەتیی و نیشتمانیی هیچ گەلێك بەگەلی كوردیشەو نییە و نابێت لەگەڵ سەربەخۆییدا نەبێت. بۆ یەكلایی كردنەوەی یەكجارەكیی ئەو دەستكەوتە نیشتمانییەش  رۆژی  25 ئەم مانگە دیاریكراوە بۆ ئەوەی هاونیشتمانیان دەنگی خۆیانی لەبارەوە بدەن. 

گومانی تێدا نییە  بەرامبەرەكان بە حكومەتی ناوەند بەتایبەتی و پایتەختی وڵاتانی دراوسێ بەگشتی  لەبەر كۆمەڵێك ئیعتیباری شۆڤێنیی و نالۆژیكیی بەربەست و لەمپەری هەمەچەشن و هەمەجۆر دروست دەكەن بۆ شكستپێهێنانی ئەو خواستە . لەحاڵەتی وەهاشدا كۆمەڵی نێودەوڵەتی بەهەر مەبەستێك بێَت  دێنە سەرخەت و كۆمەڵێك پێشنیار و بیرۆكە دەخەنە ڕوو بۆ بەئاشتی چارەسەركردنی پرسگەلێكی وەك پرسی ریفراندۆمەكەی لای ئێمە . بۆ ئەو مەبەستە ماوەیەكە كەسانی ئاست باڵای ئەمریكا و بەریتانیا و فەرەنسا و نەتەوەیەكگرتووەكان و هەندێ وڵاتانی عەرەب و كەنداو سەردانی هەرێمیان كردووە و لەبەرامبەر دواخستنی ریفراندۆم كۆمەڵێك پێشنیاریان خستۆتە ڕوو . سەركردایەتی كوردیش زۆر بێباكانە سەرلەبەری دەستپێشخەرییەكان رەددەكەنەوە و بێ ئەوەی هیچ تاكێكی گەلەكەمان بەبەشێكی زۆری بەپرسەكانیشمانەوە نازانن ناوەرۆكی دەستپێشخەرییەكان چین .

ئەمە مایەی هەڵوەستەلەسەركردنە چونكە هاوڵاتییەك كە ئامادەبێت خۆی بخاتە بەر هەرەشەی نەیارانی سەربەخۆیی، ئەلبەتە مافی یاسایی و ئەخلاقیی و بگرە نیشتمانیشی هەیە بزانێت ئەو دەستپێشخەریان چین و كامانەن كە بۆ دواخستنی ریفراندۆم خراونەتەوە ڕوو. ئایا دەكرێت هاونیشتمانیی هەرێمەكەمان بۆ زانینی پرسێكی هەستیاری لەو جۆرە لە نێو ئەكاونتی ئەم و ئەو لە فەیسبوكدا بگەرێت؟ یاخود دەبێت بەشێوەیەكی فەرمیی سەركردایەتی سیاسی كورد وورد و درشتی پێشنیارە پێشكەشكراوەكان بۆ هاوڵاتیان بخاتە  ڕوو بۆ ئەوەی هاوڵاتی دەنگدەر  لە رۆژی دەنگداندا تێگەیشتن و زانیاری هەبێت و بەقەناعەتەوە یەكێك لە بژاردەكان هەڵبژێرێت . لەو لاشاوە ئەگەر سەركردایەتی سیاسی كورد هیچ حیساب و بایەخێك بۆ رۆڵی ئەو وڵاتانە دانەنێت   كە هاتوونەتە سەرخەت بۆ ئەوەی هیچ نەبێت بەشیك لە پێشنیارەكانیان جێبەجێ بكرێَن، كە سبەینێ داوای متمانەی نێودەوڵەتیی بۆ دەرئەنجامی ریفراندۆمەكە بكەیت, ئەزانی چ جۆرە وەڵامێكیان دەبێ!.         
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP