ڕووە شاراوەكانی ریفراندۆم

مەریوان عەلی محەممەد - 31-08-2017 - 6460 جار خوێندراوەتەوە

لەگەڵ نزیك بوونەوەی رۆژی بەرێوەچوونی ریفراندۆمدا هەندێك لەئاماژەكانی كاردانەوەی بەغداو پایتەختەكانی دراوسێ و دەرەوە خۆیاندەنوێنن و هەریەكێكیشیان بەشێوەیەك گوزارشت لەنارازیی بوونی خۆیان پیشاندەدەن كە گوایە جوملەتەمن وەتەفسیلەن لەگەڵ ریفراندۆمدا نین، گوزارشتی هەندێكیان ئاماژە بۆئەوە دەكات كە گوایە جارێ كاتی نییە، گوزارشتی هەندێكی دیكەشیان لەبنەرەتدا ڕەدكردنەوەی داواكەیە

لەگەڵ ئەو هەموو بۆچوون و گوزارشتانەدا كەبەشێكی زۆری لەپایتەختەكانی ولاتانی زلهێز و یەكێتی ئەوروپا و هەرێمیی و دراوسێ نزیكەكانی خۆمانن، ئاڵا هەڵگرانی پرسی ریفراندۆم لەناوخۆدا سووربونی خۆیان بۆ پاشگەزنەبوونەوە و ئەنجامدانی ریفراندۆم دووپاتدەكەنەوە.

بەتاڵنەكرنەوەی سیحری ئەم دووپاتكردنەوانەش لە وەڵامدانەوەی پرسیارگەلێكی تۆكمە و كۆنكرێتی خۆی دەبینێتەوە ئەویش بریتین لەوەی ئایا هیچ كام لەو وڵاتانەی بەئاشكرا رای خۆیان راگەیندوە بەدواخستنی ئەنجامدانی ریفراندۆمەكە, ژێر بەژێر یاخود بەنهێنی هیچ جۆرە وەعدو بەڵێن و گفتێكیان داوە بەوەی گوایە لەكۆتایدا مامەڵە لەگەڵ ئەمری واقعیدا دەكەن.

لەولاشەوە دەكرێت ئەوەش بوترێت كەهیچ نەبووە و نەكراوە ولاتانی دەرەوە فەرموو لە ئەنجامدانی پرسگەلێكی لەو جۆرانە بكەن چونكە هەر گڵۆپێكی سەوزی لەوجۆرە دەچێتە قاڵبی دەستوەردان لەكاروباری نێوخۆی وڵاتاندا كە ئەمەش لە عورفی نێودەوڵەتیدا یاساغ و قەدەغەیە، بەڵام ئەوەی ئەمرۆ بۆ شەقامی ئەم وڵاتەی ئێمە پێویست و گرنگە دڵنیاكردنەوەو كەمكردنەوەی تەئسیراتی كاردنەوەكانن، چونكە ناكرێت بۆ سیاسەتكرنی  ئەمرۆ دۆخی كوردستاندا شاراوەكانی مەترسی ئەگەرەكانی دوای ئەنجامدانی پرسێگی گرنگی وەكو ریفراندۆم هاوسەنگبكەی لەگەڵ شاردنەوەی دۆسییەكانی نەوت و داهاتی ئەم وڵاتە. 

شاردنەوەی هەر گفتێكی دەرەكی و ئیقلیمی  بە ئەرێنی یان بەنەرێنی سەبارەت بە ریفراندۆم لەهاوڵاتیان نابێت وەك شاردنەوەی فەشەلی سێكتەرێكی خزمەتگوزاریی تەماشا بكرێت چونكە لەپای ئەو هەموو گوزارشتانەی دەرەوە بۆ دواخستنی ریفراندۆم, سووبوون بۆ ئەنجامدانی بكرێت بێگومان شاراوەیەك بەدی دەكرێت. چونكە لە ئەرزی واقعیدا بەرێوەبردنی پرۆسەكە گرنگ نییە لەبەر ئەوەی لەوانەیە لە ئێستادا بەغدا مولزەمنەكرێت بەكارپێكردنی دەرئەنجامەكەی بەڵكو گرنگ لە رێژەی ئەنجامەكەیە ئەگەر ئەنجامی وەڵامی گشتپرسییەكە لە 80% كەمتر بێت ناشرینی و خەجاڵەتییەكی زۆر بۆ ئەو 20 % ی هاوڵاتیانە دروست دەبێت كە بێگومان كاردانەوەی خەجاڵەتبوونی ئەو كەسانەی  كە دەنگ بە نەخێر دەدەن هیچی كەمتر نابێت لەوكەسانی كە دوورلەخواستی خۆیان بەشداریان لەشەری ناوخۆدا كردووە. 

هەڵبەتە لەبیرچوونەوەی شەرمازاریی ئەو كەسانەش لەنێو ویژدانی خۆایاندا ساڵانێكی زۆری دەدەوێت چونكە لە حەقیقەت و بنەڕتدا دڵسۆزیی بۆ وڵات و نیشتمانپەروەریی گروپی نەخێر هیچ كەمتر نییە لە گروپی بەڵێ بۆ نیشتمانەكەیان بۆیە دەڵێین زۆر پێویستە  هەڵگرانی ئاڵای ریفراندۆم لە ئێستادا كە خۆی لەخۆیدا سەروەرییەكی گەورەیان بۆخۆیان تۆماركردووە ئەوەی پێیانە و پێیان وتراوە بەراشكاوانە بەهاوڵاتیای رابگەیەنن  نەك  كارێك بكرێت  كە خەڵكەكە  بەرەو ئیجە بڕوات و مەلەش نەزانێت.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP