کەنەکە لەساڵیادی دەستگیرکردنی ئۆجالاندا راگەیەندراوێک بڵاودەکاتەوە

- 2/14/2020 8:38:00 PM 2735 جار خوێندراوەتەوە

خەندان-
کۆنگرەی نەتەوەیی کوردستان (کەنەکە) رایگەیاند، 21 ساڵ لەمەوبەر نەیارانی کورد خواستی ئەوەیان هەبو بە دەستگیرکردنی عەبدوڵا ئۆجالان دۆزی گەلی کورد لەناوببەن، بەڵام ئەو هەنگاوە نەک کاریگەری نەبو بەڵکو خەبات لە رێگەی رێکخراوەکان لە چوار  بەشی کوردستان بەردەوامی هەبوە و "گەل تا سەرکەوتنی کۆتایی بەردەوام دەبێت".

لەو رۆژەدا دوژمن و هاوپەیمانە جیهانیەکانیان رێککەوتن مەزنێکی کوردان کە خەباتی بۆ ئاشتی دەکرد دەستگیربکەن 

کۆنگرەی نەتەوەیی کوردستان (کەنەکە) لە ساڵیادی دەستگیرکردنی رێبەری پارتی کرێکارانی کوردستاندا ئەوەشی خستوەتەڕو، "لەو رۆژەدا دوژمن و هاوپەیمانە جیهانیەکانیان رێککەوتن و ویستیان دەرگاکانی دنیا لەسەر بەڕێز ئۆجالان دابخەن و رێی هەناسەدانی لێبگرن، ئەوان بیریان لە ویژدان و مافی مرۆڤ و یاساو دادوەریی و ئەخلاق نەکردەوە، کاتێک بڕیاریان دا مەزنێکی کوردان کە بۆ ویژدان و دادپەروەریی، بۆ ئاشتی و یەکسانی و ئازادی و هەمو بەها مرۆڤایەتیەکان خەبات دەکات، بێدەنگ بکەن و رێی ژیانی لێبگرن".

ئەوەش هاتوە، "رێککەوتنی نێوان تورکیا و هاوپەیمانە جیهانییەکانی، هەر لە ئەمەریکاوە بگرە تا چەندین دەوڵەتی ناو یەکێتی ئەوروپا، یۆنان و هەتا روسیاو ئیسرائیل، میسرو کینیا، هەمو لەو بارەیەوە یەکیانگرت و بەرژەوەندی خۆیان لەوەدا بینی کە هەمو نۆرمە مرۆڤایەتی و ئەخلاقیەکانی بخەنە ژێر پێ، هەموو توانا و دەزگا سیخوڕیەکانیان لە دژی بەڕیز ئۆجالان بخەنە کار کە لە ژێر پاراستنی یۆنانی ئەندامی یەکێتی ئەوروپادا بو، بۆ ئەوەی بە فێڵ و خیانەت بیگرن و رادەستی تورکیای بکەن".

 

ئەوەی ئەوان چاوەڕێی بون لە ماوەی ئەم 21 ساڵەدا بە تەواوی پێچەوانە بو و گەلی کوردستان دەستبەرداری دۆزە رەواکەی نەبو 

 

لەبارەی کاریگەری ئەو هەنگاوەش کۆنگرەی نەتەوەیی کوردستان رونیکردوەتەوە، "ئەوەی ئەوان چاوەڕێی بون لە ماوەی ئەم 21 ساڵەدا بە تەواوی پێچەوانە بو، نە بەڕیز ئۆجەلان وازی لە تێکۆشان هێنا، نە خەڵکی کورد و کوردستانیانیش دەستبەرداری دۆزی رەوای خۆیان بون، وەڵامی خەڵکی کوردستان هەر لە هەمان ساڵدا دەرکەوت، کاتێک لە هەڵبژاردنی شارەوانییەکانی تورکیا لە ئازاری 1999دا، ژمارەیەکی زۆر شارەوانی کەوتە دەست کوردان لە ناو ئەوانیشدا شارەوانی ئامەد،  ئیتر هەر ئەو کاتە گەلەکۆمەکیەکە مایەپوچ دەرچو".



ئەوەش خراوەتەڕو، "گەلی کوردستان لە ئەزمونی مەزن و پێشەنگایەتی چەند ساڵەی خۆیدا قوربانی زۆریدا. بەردەوام رێز و ئامادەیی خۆی لەگەڵ رێبەر و سەرکردایەتیەکەی پیشان دا و لە دەوری پارت و رێکخراوەکانی خۆی کە سەربەرزانە پرسی کوردو کوردستان پێشدەخەن کۆبوەوە".

دوای مانەوەی بۆ ماوەی 19 ساڵ لە سووریا، ساڵی 1998 و بەهۆی پەرەسەندنی فشارەکان لەلایەن تورکیا و زیادبونی هێرشەکانی پارتی کرێکارانی کوردستان بۆ سەر هێزەکانی تورکیا، حکومەتی دیمەشق داوای لە عەبدوڵا ئۆجالان کرد وڵاتەکەی جێبهێڵێت.

 

15ی شوباتی 1999 ئۆجەلان لە شاری نایرۆبی پایتەختی کینیا دەستگیرکرا و بۆ تورکیا گەڕێندرایەوە

 

رۆژی  15ی شوباتی 1999 ئۆجالان لە شاری نایرۆبی پایتەختی کینیا هێرشکرایە سەر کاروانی ئۆتۆمبێلەکانی و دوای بێهۆشکردنی بۆ تورکیا گەڕێندرایەوە.

 

دادگای تورکیا بە  تۆمەتی خیانەتکردن لە نیشتیمان سزای زیندانی هەتاهەتایی بۆ ئۆجالان دەرکرد


دوای دەستگیرکردنیشی لە تورکیا رۆژی 28ی نیسانی 1999 دادگای ئەو وڵاتە بە تۆمەتی "خیانەتکردن لە نیشتیمان" سزای لە سێدارەدانی بۆ دەرکرد، بەڵام دواتر سزاکە بۆ زیندانی هەتاهەتایی گۆڕدرا.



Copyright © 2016 Xendan.org all rights reserved

designed and developed by AVESTA GROUP