لە زیندان هەڵهات، خێزان و ژیانێكی نوێی پێكهێنا و پاش 38 ساڵ هەمو شتێك ئاشكرابو

- 2/10/2020 7:33:00 PM 30893 جار خوێندراوەتەوە

خەندان-

ساڵی 2015، هێزە ئەمنییەكان لە دەرگای ماڵی بۆبی ڵۆڤ-یان دا، كە تاوانبارێكی ویلایەتی كۆرۆلاینا بو دەیان ساڵ پێشتر لە زیندان هەڵهاتبو، ناوی خۆی گۆڕیبو و وەك كەسێكی تەواو جیاواز لە كەسایەتی پێشوتری دەژیا، بەڵام خێزانەكەی لەوبارەیەوە هیچ زانیارییەكی نەبو.

چێڕیڵ ڵۆڤ، هاوژینی بۆبی ڵۆڤ، چیرۆكەكەی گێڕایەوە و رایگەیاند "لە بەیانیەكی پێنج ساڵ لەمەوبەردا، بە شێوەیەكی ئاسایی ژیانمان بەڕێدەكرد و لەناكاو هێزە ئەمنییەكان لە دەرگایاندا، یەكێك لە هێزە ئەمنییەكان داوای لە هاوژینەكەم كرد ناوی خۆی بڵێت، ئەویش لە وەڵامدا وتی (بۆبی ڵۆڤ)، دواتر ئەفسەرە داوای لێكرد ناوە راستەقینەكەی بدركێنێت".

چێڕیڵ دەڵێت، گوێم لە بۆبی بو بە دەنگێكی زۆر نزم ناوێكی لژێر لێوەكانیەوە دەربڕی، دواتر هێزە ئەمنییەكان پێیان راگەیاند "ماوەیەكی زۆرە هەڵهاتویت".

بۆبی ڵۆڤ ناوی راستەقینەی هاوژینەكەی چێڕیڵ نەبو، بەڵكو لە راستیدا ناوی واڵتەر میڵەر بو و لە ساڵی 1977دا لە زیندانێكی كارۆلایناوە بەرەو نیویۆرك هەڵهاتبو، لەوێ ژیانی هاوسەرگیری لەگەل چێڕیڵ پێكهێنا، پاش ئەوەی چوار منداڵ و تێپەڕینی 37 ساڵ لە ژیانێكی نوێ، لەلایەن هێزە ئەمنییەكانەوە ئاشكراكرا.

چیرۆكەكەی بۆبی و چێڕیڵ لە یەكێك لە هەژمارە فەرمییەكانی تۆڕی كۆمەڵایەتی فەیسبوك بڵاوكرایەوە و بە شێوەیەكی بەرفراوان كاردانەوەی لە سەرتاسەری جیهانەوە لێكەوتەوە، بە زنجیرە بڵاوكراوەیەك و لە 11 پۆستدا تەواوی چیرۆكەكە بڵاوكرایەوە.

بۆبی لەكاتی گێڕانەوەی چیرۆكەكەیدا ئاماژەی بە ژیانی پێشوی خۆی كردوە كە "لە خێزانێكی هەژاردا گەورەبوە و حەوت منداڵ بون، تەنها دایكیان بژێوی ژیانی بۆ دابینكردون و باوكیان لایان نەماوەتەوە".

لە بەشی سێهەمی چیرۆكەكەیدا بۆبی سەرەتاكانی چۆنیەتی دەستكردن بە ئەنجامدانی تاوان باسدەكات: "لەگەڵ گروپێك گەنج و مێرمنداڵدا تێوەگلام، ئەو گەنجانە بانكەكانیان دەبڕی و بەوشێوەیە بژێوی ژیانیان دابیندەكرد، منیش بڕیارمدا هاوتاوانیان بم".

لەكاتێكدا میڵەر لەگەڵ ئەو گروپەدا خەریكی دزیكردن بون لە بانكێك لە باكوری كارۆلاینا، هەستیان بەوە نەكردوە سیستمی ئاگاداركردنەوەی بانكەكە سیستمێكی بێدەنگە و بەوهۆیەوە دەستبەجێ ئاشكرابون و لەلایەن هێزە ئەمنییەكانەوە دەستگیركراون، واڵتەر میڵەر 25 بۆ 30 ساڵ سزای زیندانی بەسەردا سەپێندراوە.

بەهۆی هەڵسوكەوتی لەسەرخۆی میڵەر و هەوڵنەدانی بۆ ئەنجامدانی ئاژاوەگێڕی، بەرپرسانی زیندان رێگەیان پێداوە لە بەشی رادیۆكە وەك كارمەندێك كاربكات و بردویانەتە ئەو بەشەی كا كەمترین چاودێریان لەسەرە.

"بەهۆی ئەوەی لە رادیۆكە كارمدەكرد، رێگەیان پێدەدام یەك قات پۆشاكی مەدەنی و دور لە پۆشاكی زیندانم پێبێت، لەورێگەیەوە شەوێكی دوشەممە لەژێر پۆشاكەكانی زیندانەوە بەرگە مەدەنییەكانم پۆشی، چونكە رۆژانی سێشەممە هەرگیز پاسەوانەكە بە وردی چاودێری زیندانییەكانی نەدەكرد لەكاتی چونیان بۆ دەموچاو شوشتن و ریش تاشین، سەرەنجام توانیم لە هەڵهاتنەكەم سەركەوتوبم" ئەمانە وتەی میڵەر-ە.
لەژێر ناوی بۆبی ڵۆڤ، میڵەر دەستیكرد بە ژیانێكی نوێ و میڵەر-ی لە ناخیدا بە نهێنی پاراست

دواتر لە شاری نیویۆرك و لەژێر ناوی بۆبی ڵۆڤ، میڵەر دەستیكرد بە ژیانێكی نوێ و میڵەر-ی لە ناخیدا بە نهێنی پاراست، ساڵی 1985 لەگەڵ چێڕیڵ ژیانی هاوسەرگیریان پێكهێنا و بون بە خاوەنی چوار منداڵ، بەڵام ساڵی 2015 پاش ئاشكرابونی هەڵهاتنەكەی بۆبی لەلایەن هێزە ئەمنییەكانەوە، گەڕێندرایەوە بۆ زیندانەكەی كارۆلاینا.

چێڕیڵ درێژەی بە چیرۆكەكە دا: "جیهان بەسەرمدا روخا، دەستگیركردنی بۆبی لەسەر پەڕەی یەكەمی رۆژنامەكان بو، نزیكەی 40 ساڵ لە هاوسەرگیری و چوار منداڵی گەورە، هەرگیز ئەو نهێنیەم نەزانیبو، زۆر توڕەبوم، بەڵام هەرگیز رقم لە بۆبی نەبو، دەمویست باری سەرشانی كەمبكەمەوە".

چێڕیڵ دەستبەجێ دوای دەستگیركردنەوەی میڵەر كاریكرد بۆ ئازادكردنی هاوژینەكەی، تەنانەت كار گەیشتە ئەوەی نامە بنێرێت بۆ باراك ئۆباما، سەرۆكی ئەوكاتەی ویلایەتە یەكگرتوەكانی ئەمریكا و بۆ پارێزگای ویلایەتەكە، لە سەرەنجامی هەوڵەكانی چێڕیڵ-دا ساڵی 2016 بڕیاردرا بە ئازادكردنی بۆبی.

ئاماژەی بەوەكرد "دەمویست هەمو لایەنە پەیوەندیدارەكان تێبگەن لەو پیاوەی من ناسیومە، ئەو بۆبی ڵۆڤ بو، كە لە كەنیسە بو و یارمەتی گەنج و منداڵانی دەدا تا باشتر رەفتار بكەن، هیچ نیشانەیەكی لە میڵەر نەمابو".

پاش ئازادكردنی، بۆبی ڵۆڤ بە رۆژنامەی دەیڵی مەیڵ-ی راگەیاندوە "هەستدەكەم بارێكی زۆر سەخت و گران لەسەر شانم نەماوە و ئارامم"، لەو هەژمارەی كە چیرۆكەكەی تێدا بڵاوكراوەتەوە، جێنیفەر گارنەر-ی خانمە ئەكتەر نوسیویەتی "سوپاستان دەكەم، ئەمە جوانترین چیرۆكی خۆشەویستیە كە لەماوەی 10 كاتژمێردا وەك زنجیرەیەك تەماشام كردبێت".

زۆرینەی بەكارهێنەرانی تۆڕە كۆمەڵایەتیەكانیش باس لەوەكەن چیرۆكەكەی چێڕیڵ و بۆبی شیاوی ئەوەیە بكرێتە زنجیرەیەكی تەلەڤزیۆنی یاخود لە نێتفڵیكس پێشكەشبكرێت.



نیشانەکردن :

#جۆراوجۆر

Copyright © 2016 Xendan.org all rights reserved

designed and developed by AVESTA GROUP