ئوسترالیا لەنێوان ئاگرباران و زریانی بەهێزدا

- 2/7/2020 1:14:00 PM 4755 جار خوێندراوەتەوە

خەندان-

ماوەی چوار مانگ ئاگر لە دارستانەكانی ئوسترالیا بەردەوام  بو و ملیۆنان ئاژەڵی سوتاند، پاش ئاگرەكە بۆ ماوەی یەك هەفتە زریانێكی نائاسایی تەرزە و گەردەلولی بەهێز زیانی گەیاند بە خانو و ئۆتۆمبێلی هاوڵاتیان، پاش هەفتەیەك سەرلەنوێ ئاگر لانەی بە دانیشتوانی پایتەخت چۆڵكرد و دیسان وڵاتەكە لەبەردەم زریانی بارانێكی بەلێزمەدایە.

بۆ دوەمینجار، چوارشەممەی رابردو بەشێكی زۆر ئاگرەكانی ئوسترالیا خامۆشبونەوە و خەڵك و ئاژەڵ و روەكەكانی ناوچەكە پاش پێنج مانگ دەستیانكرد بە بوژانەوە، بەڵام تەنها دو رۆژ لە كوژانەوەی ئاگرەكان، زریانێك لە رەشەبا و بارانی بەلێزمە روی كردە رۆژهەڵاتی وڵاتەكە.
نزیكەی 20 لە كۆی ئەو 60 ئاگرە گەورەیەی لە ناوچەكەدا هەبوە كوژاونەتەوە

تۆری هەواڵی بی بی سی بریتانی لەوبارەیەوە رایگەیاندوە "لە شەوی رابردوەوە و بەهۆی بارانە بەلێزمەكەی ناوچەی ساوس وەیڵز، نزیكەی 20 لە كۆی ئەو 60 ئاگرە گەورەیەی لە ناوچەكەدا هەبوە كوژاونەتەوە.
سەبارەت بە دروستبونی لافاو لە سیدنی و شارەكانی دەوروبەری هۆشداریاندا

سەرەڕای ئەوەی بەرپرسانی ناوچەكە پێشوازیان لە كاریگەرییەكانی بارانە بەلێزمەكە كرد بەهۆی ئەو ئاگرەی ماوەی پێنج مانگە تەڕ و وشك پێكەوە دەسوتێنێت، بەڵام لە هەمانكاتدا سەبارەت بە دروستبونی لافاو لە سیدنی و شارەكانی دەوروبەری هۆشداریاندا.

نوسینگەی كەشناسی و مێتێۆرۆلۆجی لە ئوسترالیا رایگەیاند، هەندێك لە ناوچەكان زۆرترین رێژەی بارانبارینیان لەمساڵدا تۆماركردوە، شاری سیدنی-ش كە گەورەترین شاری ئوسترالیایە، ئەمڕۆ هەینی تەڕوبڕترین رۆژی لە 15 مانگی رابردودا تۆماركرد.

بە گوێرەی راپۆرتە هەواڵییەكان، دانیشتوانی ئوسترالیا سەرەڕی مەترسیداربونی كەشوهەوا بەهۆی رەشەبا و بارانی بەلێزمەوە، لەسەر شەقامەكان دڵخۆشی خۆیان دەربڕی.
ئاگرە چڕەكەی دارستانەكانی ئوسترالیا كە ملیۆنان كیلۆمەتر دوجا زەوی كردە خۆڵەمێش و بوە هۆی گیانلەدەستدانی نزیكەی ملیارێك ئاژەڵ

پاش ئاگرە چڕەكەی دارستانەكانی ئوسترالیا كە ملیۆنان كیلۆمەتر دوجا زەوی كردە خۆڵەمێش و بوە هۆی گیانلەدەستدانی نزیكەی ملیارێك ئاژەڵ، هەفتەیەك پێش كۆتاییهاتنی كانونی دوەمی ئەمساڵ، زریانێكی بەهێز لە باران و تەرزە روی ناوچەكە كرد كە سەرەڕای هاوكاریكردن لە كوژاندنەوەی ئاگرەكە، بەڵام كەشێكی نائاسایی بۆ ناوچەكانی نیشتەجێبون دروستكرد.

رێكەوتی 20ی كانونی دوەمی ئەمساڵ،  پاش ئاگر و زریانە بەهێزەكە، خۆڵبارینێكی نائاسایی روی لە ناوچەی ساوس وەیڵز كرد كە دەكەوێتە رۆژئاوای ئوسترالیا، بەهۆی خۆڵبارینەكەوە لە كاتی نیوەڕۆژدا هەندێك لە شارەكان بە تەواوی وەك شەو تاریك بون.
تەرزەیەكی بەهێز كە دانە-كانی هێندەی تۆپێكی گۆڵف دەبون لە ناوچەكە باری و ژمارەیەكی زۆر ئۆتۆمبێل و سەربانی ماڵان بەوهۆیەوە زیانیان بەركەوت

سێ رۆژ پێش خۆڵبارینەكە، زریان و رەشەبا و هەورە تروسكەیەكی بەهێز روی لە ناوچە جیاوازەكانی پایتەختی ئوسترالیا كرد، بەهۆیەوە تەرزەیەكی بەهێز كە دانە-كانی هێندەی تۆپێكی گۆڵف دەبون لە ناوچەكە باری و ژمارەیەكی زۆر ئۆتۆمبێل و سەربانی ماڵان بەوهۆیەوە زیانیان بەركەوت.

دواتر لە ئێوارەی 19ی كانونی دوەمدا، ناوەندی كەشناسی وڵاتەكە هۆشداریدایە زۆرینەی ناوچەكانی رۆژئاوا سەر بە نیو ساوس وەیڵز و رایگەیاندبو "بەهۆی رەشەبا و تروسكەی بەهێزەوە زریانێكی خۆڵبارین ناوچەكە دادەپۆشێت.

دیمەنی زۆرینەی وێنە و تۆمارە ڤیدیۆییەكانیش دەریخستبو، بەهۆی خێرایی زریان و رەشەباكە و تروسكەی بەهێزەوە، دیوارێك لە خۆڵ تەواوی ناوچەكانی ساوس وەیڵز-ی داپۆشیوە.
بەهۆی لە كۆنترۆڵ دەرچونی ئاگرەكەوە دانیشتوانی ژمارەیەك ناوچەی كانبێرا-ی پایتەخت لانەكانیان چۆڵكرد


دوای تەنها دو رۆژ، لە رێكەوتی 23ی كانونی دوەمدا سەرلەنوێ، ئاگر روی لە دارستانەكانی ئوسترالیا كردەوە و بەهۆی لە كۆنترۆڵ دەرچونی ئاگرەكەوە دانیشتوانی ژمارەیەك ناوچەی كانبێرا-ی پایتەخت لانەكانیان چۆڵكرد.

لە ناوچەكانی باشور و رۆژهەڵاتی ئوسترالیا، ئاگری دارستانەكان هێندە زۆربو، كە هێزەكانی ئاگركوژێنەوە و فریاكەوتن نەیانتوانی كۆنترۆڵی بكەن، پلەكانی گەرما بەرزبونەوە و بەوهۆیەوە دەسەڵاتدارانی وڵاتەكە داوایان لە دانیشتوان كرد خانوەكانیان جێبهێڵن، دواتریش شەقامەكانیان داخست.

 تا ئێستا 29 كەس گیانیانلەدەستداوە و 2500 ماڵ و خانو سوتاوە
بەهۆی ئاگرە بەردەوامەكەی ئوسترالیاوە، كە لە مانگی ئەیلولی ساڵی رابردوەوە بەردەوامە، تا ئێستا 29 كەس گیانیانلەدەستداوە و مەزەندەی گیانلەدەستدانی یەك ملیار ئاژەڵ و سوتانی 2500 ماڵ و خانو كراوە.
بوە هۆی دروستكردنی قەیرانی خۆراك سوتەمەنی

ئەو كەشە ناجێگیرەی ئوسترالیا، بە تایبەتی ئەو ئاگرەی ماوەی پێنج مانگی رابردو زۆرینەی ناوچەكانی تەنی و شارەكانی پڕ لە دوكەڵی خۆڵەمێش كرد، بوە هۆی دروستكردنی قەیرانی خۆراك سوتەمەنی، بەشێك لە بەرپرسانی شاری سیدنی-ش ئاماژەیان بەوەكردبو، ئاگرەكە مەترسی لەسەر سیستمی ئاوی ئەو شارە دروستكردوە.

لە کۆتا رۆژی ساڵی رابردوشدا، هەزاران هاوڵاتی ئوستڕالی لەکەناراوەکانی رۆژهەڵاتی وڵاتەکەیان کۆبونەوە، بۆ خۆپاراستن لەو ئاگرەی کە بۆ ماوەی زیاتر لە هەفتەیەکە دارستانەکانی ئەو وڵاتەی گرتوەتەوە.


نیشانەکردن :

#ئوسترالیا

Copyright © 2016 Xendan.org all rights reserved

designed and developed by AVESTA GROUP