زیاتر لە 15 پەرلەمانتار سەرقاڵی خوێندنن بێ وەرگرتنی مۆڵەت
خەندان لە بەدواداچونێكدا نهێنی سەرسوڕهێنەر لە هەرسێ سەرۆكایەتیەكەی هەرێم ئاشكرادەكات

- 2/7/2020 10:37:00 AM 28408 جار خوێندراوەتەوە

خەندان- بڕیار جەلال

ژمارەیەك لە پەرلەمانتاران و بەرپرسانی باڵای حكومەت و قائیمقام و راوێژكار لە سەرۆكایەتی هەرێم و بەڕێوەبەری گشتی لەماوەی چەند ساڵی رابردودا بەبێ وەرگرتنی مۆڵەتی خوێندن لە زانكۆكانی هەرێمی كوردستان و دەرەوەی هەرێمی كوردستان سەرقاڵی خوێندنی باڵا (ماستەرو دكتۆرا) و بەكالۆریۆس بون، وەزارەتی خوێدنی باڵاش رایدەگەیەنێت بەهیچ شێوەیەك ئەوانەی مۆڵەتیان وەرنەگرتوە هەمواركردنەوەی بڕوانامەیان بۆ ئەنجامنادرێت. خەندان لەم راپۆرتەدا زانیاری ورد ئاشكرادەكات.

لە پەرلەمانی كوردستان، پەرلەمانتاری زۆرینەی فراكسیۆنە جیاوازەكان لەئێستادا سەرقاڵی خوێندنی دكتۆرا و ماستەر و بەكالۆریۆسن

 

بەگوێرەی زانیارییەكانی خەندان، لە پەرلەمانی كوردستان، پەرلەمانتاری زۆرینەی فراكسیۆنە جیاوازەكان لەئێستادا سەرقاڵی خوێندنی دكتۆرا و ماستەر و بەكالۆریۆسن، هاوكات ئەندامی پەرلەمانی كوردستانن و هیچ مۆڵەتێكی خوێندنیان وەرنەگرتوە.

لە بەدواداچونیدا بۆ ئەم پرسە خەندان زانیویەتی، كە زیاتر لە 15 پەرلەمانتاری كوردستان سەرقاڵی خوێندنی باڵان لە زانكۆكانی هەرێمی كوردستان و دەرەوەی هەرێمی كوردستان، ئەمە سەرەڕای ئەوەی ژمارەیەك بەڕێوەبەری گشتی زانكۆكان و وەزارەتەكان و راوێژكاری لە سەرۆكایەتی هەرێمیش بەهەمان شێوە سەرقاڵی پرۆسەی خوێدنن.

سودی لە پشوەكان بینیوە و بەهیچ شێوەیەك مۆڵەتی خوێندنی نەكردوە و سودی لە رۆژانی پێنج شەممە و هەینی و شەممە وەرگرتوە

 

لەماوەی چەند رۆژی رابردودا، ئومێد خۆشناو، پەرلەمانتاری پارتی لە وڵاتی قوبرس بڕوانامەی ماستەری بەدەستهێنا، وەك خۆشی دەڵێت،"سودی لە پشوەكان بینیوە و بەهیچ شێوەیەك مۆڵەتی خوێندنی نەكردوە."

هەر بەگوێرەی زانیارییەكانی خەندان هەریەك لە (ئاشنا عەبدوڵا، سەلما فاتیح، هێمن هەورامی) لە فراكسیۆنەكانی گۆڕان و یەكێتی و پارتی لەئێستادا خوێندكاری خوێندنی ماستەر و دكتۆران، لەهەمانكاتدا (زیاد جەبار) كە ئەندامی پەرلەمانی كوردستانە لە فراكسیۆنی یەكێتی، لەئێستادا خوێندكاری بەكالۆریۆسی قۆناغی چوارەمی بەشی میدیایە لە یەكێك لە زانكۆكانی هەرێمی كوردستان.

هەتا ئێستا هیچ پەرلەمانتارێك كە ژمارەیان زیاترە لە 15 پەرلەمانتارو نزیك دەبێتەوە لە 25 پەرلەمانتار نەهاتوە داوای مۆڵەتی خوێندن بكات

 

سەرچاوەیەك لە پەرلەمانی كوردستان لەبارەی وەرگرتنی مۆڵەت لەلایەن ئەو ئەندامانەی پەرلەمانی كوردستان بە خەندان-ی راگەیاند،"هەتا ئێستا هیچ پەرلەمانتارێك كە ژمارەیان زیاترە لە 15 پەرلەمانتارو نزیك دەبێتەوە لە 25 پەرلەمانتار نەهاتوە داوای مۆڵەتی خوێندن بكات لە سەرۆكایەتی پەرلەمانی كوردستان".

خوێندنی ماستەر پێویستی بە مۆڵەتی خۆتەرخانكردن هەیە، بەو شێوەیەش دەبێت بۆ ماوەی دو ساڵ ئەو پەرلەمانتارانە مۆڵەت وەربگرن و خۆیان بۆ خوێندنەكەیان تەرخان بكەن

 

ئەو سەرچاوەیە كە شارەزای كاروباری یاساییە وتیشی،"خوێندنی ماستەر پێویستی بە مۆڵەتی خۆتەرخانكردن هەیە، بەو شێوەیەش دەبێت بۆ ماوەی دو ساڵ ئەو پەرلەمانتارانە مۆڵەت وەربگرن و خۆیان بۆ خوێندنەكەیان تەرخان بكەن، ئەگەر نا دواتر بڕوانامەكانیان بۆ هەژمار ناكرێت، بەڵام هەتاكو ئێستا ئەو پەرلەمانتارانە داوای مۆڵەتیان لە سەرۆكایەتی پەرلەمان نەكردوە"

 لە سەرۆكایەتی هەرێمی كوردستان، بەرپرسی باڵا هەیە لە دەرەوەی وڵات سەرقاڵی خوێندنی باڵای دكتۆرا و ماستەر بوە، بەڵام بەهیچ شێوەیەك مۆڵەتی خوێندنی لە سەرۆكایەتی هەرێم وەرنەگرتوە

 

لەلایەكی دیكەوە خەندان زانیویەتی، لە ماوەی رابردودا لە سەرۆكایەتی هەرێمی كوردستان، بەرپرسی باڵا هەیە لە دەرەوەی وڵات سەرقاڵی خوێندنی باڵای دكتۆرا و ماستەر بوە، بەڵام بەهیچ شێوەیەك مۆڵەتی خوێندنی لە سەرۆكایەتی هەرێم وەرنەگرتوە.

لەناو حكومەتی هەرێمی كوردستان، راوێژكارو قائیمقام هەیە، لەئێستادا سەرقاڵی خوێندنە لە وڵاتی ئێران، بەڵام مۆڵەتی خوێندنی وەرنەگرتوە و رۆژانی پێنج شەممە و هەینی و شەممە، دەچێتە ئێران و دواتر دەگەڕێتەوە و لە رۆژانی دیكەدا دەوامی حكومی دەكات

 

هەر بە گوێرەی زانیارییەكانی خەندان، لەناو حكومەتی هەرێمی كوردستان، راوێژكارو قائیمقام هەیە، لەئێستادا سەرقاڵی خوێندنە لە وڵاتی ئێران، بەڵام مۆڵەتی خوێندنی وەرنەگرتوە و رۆژانی پێنج شەممە و هەینی و شەممە، دەچێتە ئێران و دواتر دەگەڕێتەوە و لە رۆژانی دیكەدا دەوامی حكومی دەكات و هەندێك لەو بەرپرسانەی حكومەت كە پلەی بەڕێوەبەریان هەیە لە زانكۆكانی هەرێمی كوردستان سەرەڕای ئەوەی مۆڵەتی خوێندنیان وەرنەگرتوە، بەڵام لەلایەن بەرپرسانی ئەو زانكۆیانە دەوامی لێدەكەن یارمەتی دەدرێن و وەك پێویست دەوام ناكەن.

لە بەشێك لە زانكۆكانی هەرێمی كوردستان، ژمارەیەك بەڕێوەبەری گشتی لەئێستادا سەرقاڵی پرۆسەی خوێندنن لە زانكۆكانی دەرەوەی وڵات

 

خەندان لە بەدواداچونیدا بۆ ئەم بابەتە، زانیویەتی كە لە بەشێك لە زانكۆكانی هەرێمی كوردستان، ژمارەیەك بەڕێوەبەری گشتی لەئێستادا سەرقاڵی پرۆسەی خوێندنن لە زانكۆكانی دەرەوەی وڵات بەتایبەت لە زانكۆكانی ئێران، هەندێك لەوانە مۆڵەتی خوێندنیان بەهیچ شێوەیەك نەكردوە و هەندێكی دیكەیان خۆتەرخانكردنی نیمچەیی( تەفەروخ جوزئی)یان هەیە.

یەكێك لەو زانكۆیانەی كە تیایدا ژمارەیەك لە فەرمانبەرەكانی لەئێستادا سەرقاڵی پرۆسەی خوێندنی باڵا (ماستەرو دكتۆران) زانكۆی پۆلیتەكنیكی سلێمانیە. خەندان لە زاری ژمارەیەك لە فەرمانبەرانی سەرۆكایەتی زانكۆی پۆلیتەكنیكی سلێمانی ئەوەی زانیوە كە هەریەك لە (بەختیار عوبێد شەریف) بەڕێوەبەری تۆماری گشتی و (سەبریە خالند) بەڕێوەبەری كارگێڕی لە زانكۆی پۆلیتەكنیكی سلێمانی سەرقاڵی خوێندنی دكتۆرا و ماستەرن لە وڵاتی ئێران.

لەو بارەیەوە، ئالان فەرەیدون، سەرۆكی زانكۆی پۆلیتەكنیكی سلێمانی بە خەندان-ی راگەیاند،"بەگوێرەی رێنمایی خوێندنیان ئەنجامداوە لە دەرەوەی هەرێمی كوردستان، سەبارەت بەو دو بەڕێزە، یەكیان ماستەرەكەی تەواوكردوە و وابزانم لەئێستادا سەرقاڵی یەكسانكردنەوەی بڕوانامەكەیەتی، ئەوی دیكەش ئێستا خوێندنەكەی گواستوەتەوە بۆ زانكۆی پۆلیتەكنیكی سلێمانی و ئێستا خوێندكاری دكتۆرایە و (تەفەروخی جوزئی)هەیە و فەرمانی وەزارەتی خوێندنی باڵای هەیە"

ئەمانە وەكو فەرمانبەری ئاسایی دەوام دەكەن و خوێندكاری دكتۆران و لە داهاتودا بۆ یەكسانكردنی بڕوانامەكانیان بەگوێرەی یاسای وەزارەتی خوێندنی باڵا و توێژینەوەی زانستی مامەڵەیان لەگەڵدا دەكرێت

 

سەبارەت بە كاوە رۆستەم كە بەهەمانشێوە سەرقاڵی خوێندنی دكتۆرابوە لە ئێران و ئێستا لە زانكۆی پۆلیتەكنیكی سلێمانی سەرقاڵی ئەنجامدانی توێژینەوەكەیەتی وتی،"بەڵێ ئەو بەڕێزەش بەهەمان شێوە خۆتەرخانكردنی نیمچەیی بۆ كراوە و ئێستا سەرقاڵی توێژینەوەكەیەتی لە زانكۆی پۆلیتەكنیكی سلێمانی" 

دەربارەی ئەوەی ئەم كەسانە لەئێستادا دەوام دەكەن وتی،"بەڵێ ئەمانە وەكو فەرمانبەری ئاسایی دەوام دەكەن و خوێندكاری دكتۆران و لە داهاتودا بۆ یەكسانكردنی بڕوانامەكانیان بەگوێرەی یاسای وەزارەتی خوێندنی باڵا و توێژینەوەی زانستی مامەڵەیان لەگەڵدا دەكرێت".

هەرکەسێک لە دەرەوەی وڵات بخوێنێت و خوێندنەکەی بگوازێتەوە بۆ یەکێک لە زانکۆکانی کوردستان دەبێتە خوێندکاری پارالێڵ و بۆ دکتۆرا پێویستە پێنج ملیۆن و بۆ ماستەر دو ملیۆن دینار بدات، بەڵام لە هەندێک لە زانکۆکان بەدەر لە یاسا و بەدەر لە دەسەڵاتی کارگێڕی سەرۆکی زانکۆکان بڕیاری لێخۆشبونیان بۆ هەندێك خوێندکار دەرکردوە

 

هەر بە گوێرەی زانیارییەكان، بە پێی یاساو ڕێنماییەکانی وەزارەتی خوێندنی باڵا، هەرکەسێک لە دەرەوەی وڵات بخوێنێت و خوێندنەکەی بگوازێتەوە بۆ یەکێک لە زانکۆکانی کوردستان دەبێتە خوێندکاری پارالێڵ و بۆ دکتۆرا پێویستە پێنج ملیۆن و بۆ ماستەر دو ملیۆن دینار بدات، بەڵام لە هەندێک لە زانکۆکان بەدەر لە یاسا و بەدەر لە دەسەڵاتی کارگێڕی سەرۆکی زانکۆکان بڕیاری لێخۆشبونیان بۆ هەندێك خوێندکار دەرکردوە.

من لەو كاتەدا كە دەمخوێند لە دەرەوەی وڵات ئەندامی پەرلەمانی كوردستان بوم، خوێندنی باڵاش وەكو بەكالۆریۆس نییە كە دەبێت هەمو رۆژێك دەوام بكەیت

 

لای خۆشیەوە، ئومێد خۆشناو، ئەندامی پەرلەمانی كوردستان بەخەندان-ی راگەیاند،"من لەو كاتەدا كە دەمخوێند لە دەرەوەی وڵات ئەندامی پەرلەمانی كوردستان بوم، خوێندنی باڵاش وەكو بەكالۆریۆس نییە كە دەبێت هەمو رۆژێك دەوام بكەیت، گونجاندن بوە لەگەڵ كاتی پشوەكانی خۆم و رۆژانی پشو كە (پێنج شەممە و هەینی و شەممان) بو هیچ مۆڵەتێكم نەكردوە، چونكە دەوامی پەرلەمان وەكو فەرمانبەر نییە، سودوەرگرتن بوە لە پشوەكان بۆیە درەنگیش تەواوبوم"

ئاماژەی بەوەشكرد،"من لە زانكۆی نێرێس لە وڵاتی قوبرس خوێندومە، ئەمساڵ توێژینەوەكەم وەرگرتوەتەوە، ئەو زانكۆیەی كە لێیم خوێندوە باوەڕپێكراو بوە لە هەرێمی كوردستان و منیش بە شێوە یاساییەكەی لەوێ خوێندنم پێشكەشكردو وەرگیرام"

تەنها من نیم كە پەرلەمانتاربوم و خوێندومە، دكتۆرای تێدایە، ماستەری تێدایە، بەكالۆریۆسی تێدایە

 

سەبارەت بەوەی بەرنامەی هەیە لە داهاتو داوای گۆڕینی بڕوانامەكەی بكات لە وەزارەتی خوێندنی باڵا بۆ ئەوەی بتوانێت وانەبڵێتەوە لە زانكۆكانی كوردستان وتی،"هێشتا ئەوە نازانم، بەڵام تەنها من نیم كە پەرلەمانتاربوم و خوێندومە، دكتۆرای تێدایە، ماستەری تێدایە، بەكالۆریۆسی تێدایە"

لەماوەی رابردوشدا ئەندامی ئەنجومەنی پارێزگا هەبوە لە وڵاتی ئێران خوێندنی ماستەری تەواوكردوە

 

هاوكات لەماوەی رابردوشدا ئەندامی ئەنجومەنی پارێزگا هەبوە لە وڵاتی ئێران خوێندنی ماستەری تەواوكردوە هاوكات سەرۆك شارەوانی و چەندین بەرپرسی باڵای دیكەی حكومی هەبوە كە مۆڵەتی خوێندنیان وەرنەگرتوە و لە زانكۆكانی دەرەوەی هەرێمی كوردستان خوێندنی ماستەریان خوێندوە.

(بریكاری وەزیر، بەڕێوەبەری گشتی، وەزیر، ئەندامی پەرلەمان، ئەندامانی ئەنجومەنی پارێزگاكان) ئەگەر هات و چون بۆ خوێندن بەبێ مۆڵەت، لەكاتێكدا خۆیان هەر مۆڵەتیان پێ نادرێت، بەڵام ئەگەر بەبێ مۆڵەت خوێندیان بەهیچ شێوەیەك یەكسانكردنی بڕوانامەیان بۆ ئەنجامنادرێت

 

د.جوان جەلال شەریف بەڕێوەبەرى گشتى فەرمانگەى نێردراوان و پەیوەندییە ڕۆشنبیرییەکان لە وەزارەتى خوێندنى باڵا و توێژینەوەى زانستى بە خەندان-ی راگەیاند،"ئەوانەی بە پلەی بەڕێوەبەری گشتی و بۆ سەرەوە (بریكاری وەزیر، بەڕێوەبەری گشتی، وەزیر، ئەندامی پەرلەمان، ئەندامانی ئەنجومەنی پارێزگاكان) ئەگەر هات و چون بۆ خوێندن بەبێ مۆڵەت، لەكاتێكدا خۆیان هەر مۆڵەتیان پێ نادرێت، بەڵام ئەگەر بەبێ مۆڵەت خوێندیان بەهیچ شێوەیەك یەكسانكردنی بڕوانامەیان بۆ ئەنجامنادرێت."

ئەگەر هاتو یەكێك لەوانە ئەگەر لە پرۆسەی خوێندندا بێت و لەو كاتەدا هەڵببژێردرێت بۆ ئەندامی پەرلەمان یاخود ئەندامی ئەنجومەنی پارێزگاكان، دەبێت یەكێك لەوانە هەڵبژێرێت، دەتوانێت خوێندنەكەی دوابخات تاكو ئەو كاتەی كاری پەرلەمانتارییەكەی تەواو دەكات

 

وتیشی،"ئەگەر هاتو یەكێك لەوانە ئەگەر لە پرۆسەی خوێندندا بێت و لەو كاتەدا هەڵببژێردرێت بۆ ئەندامی پەرلەمان یاخود ئەندامی ئەنجومەنی پارێزگاكان، دەبێت یەكێك لەوانە هەڵبژێرێت، دەتوانێت خوێندنەكەی دوابخات تاكو ئەو كاتەی كاری پەرلەمانتارییەكەی تەواو دەكات، یاخود بەڕێوەبەری گشتی بێت یان وەزیر یان بریكاری وەزیر، دەبێت خوێندنەكەی بەجێبهێڵێت، ئەگەرنا دواتر یەكسانكردنی بڕوانامەی بۆ ناكرێت ".

دەرگای خوێندن كراوەیە و هەمو كەسێك ئازادە پرۆسەی خوێندن لە دەرەوەی وڵات ئەنجامبدات، بەڵام هیچ یەكێك لە ئەندامانی پەرلەمان نەهاتوەتە وەزارەتی خوێندنی باڵا بۆ ئەوەی یەكسانكردنی بڕوانامەیان بۆ بكرێت

 

رونیشیكردەوە،"دەرگای خوێندن كراوەیە و هەمو كەسێك ئازادە پرۆسەی خوێندن لە دەرەوەی وڵات ئەنجامبدات، بەڵام هیچ یەكێك لە ئەندامانی پەرلەمان نەهاتوەتە وەزارەتی خوێندنی باڵا بۆ ئەوەی یەكسانكردنی بڕوانامەیان بۆ بكرێت، چونكە پرۆسەی یەكسانكردنی بڕوانامەیان بۆ ئەنجامنادرێت، لەداهاتوش ئەگەر بێت و بیانەوێت ببنە مامۆستا داوای مۆڵەتی خوێندنی لێدەكەین، دەبێت پێش ئەوەی ببێتە پەرلەمانتار لە كوێ فەرمانبەر بوە مۆڵەتی ئەو شوێنە بهێنێت، وەیاخود دەبو پەرلەمانی كوردستان رەزامەندی بۆ بكردایە".

ئەوانەی دكتۆرا دەخوێنن لە دەرەوەی وڵات دەبێت دابڕانی تەواوەتی بكەن لە دەوامەكەیان، ئەگەر لەناوخۆش بخوێنن دەبێت ساڵی یەكەم دابڕانی تەواوەتی بكات و ساڵی دوەم كە سەرقاڵی توێژینەوەكەیەتی، دەبێت (تەفەروخ جوئزی) بكات

 

سەبارەت بەو كەسانەی سەرقاڵی خوێندنی دكتۆران لە زانكۆكانی دەرەوەی هەرێمی كوردستان، لەكاتێكدا بەشێك لە خوێندنەكەیان لەدەرەوە وڵات ئەنجامدەدەن و بەشێكی دیكەی دەهێننەوە هەرێمی كوردستان وتی،"ئەو كەسانە ئەگەر مۆڵەتی خوێندنیان هەبێت ئەوە قسەیەكی دیكەیە، ئەگەر مۆڵەتی خوێندنیان نەبێت، ئەو كاتە یەكسانكردنی بڕوانامەیان بۆ ئەنجام نادرێت، ئەو كەسانەشی دەچن لە دەرەوەی وڵات دەخوێنن و دەگەڕێنەوە لێرە توێژینەوەكانیان ئەنجام دەدەن، دەبێت لەماوەی ئەو دوساڵەی دەخوێنن، نابێت لە سێ مانگ زیاتر لێرە بن ئەوەش بە رەزامەندی وەزارەت دەبێت ببێت. ئەوانەشی دكتۆرا دەخوێنن لە دەرەوەی وڵات دەبێت دابڕانی تەواوەتی بكەن لە دەوامەكەیان، ئەگەر لەناوخۆش بخوێنن دەبێت ساڵی یەكەم دابڕانی تەواوەتی بكات و ساڵی دوەم كە سەرقاڵی توێژینەوەكەیەتی، دەبێت (تەفەروخ جوئزی) بكات"

زۆرن ئەوانەی لە هەرێمی كوردستان بەهۆی خراپی باری ئابورییان نەیانتوانیوە درێژە بە خوێندنەكەیان بدەن، ئێستاش بە ناچاری هەندێك لەوانە كرێكاری دەكەن و هەندێكی دیكەیان لە چاوەڕوانی حكومەتدان بۆ ئەوەی دابمەزرێن

 

زۆرن ئەوانەی لە هەرێمی كوردستان خەون و ئامانجیان تەواوكردنی خوێندنی باڵای ماستەرو دكتۆرایە لە زانكۆكانی ناوخۆو دەرەوە، بەڵام بەهۆی خراپی باری ئابورییان نەیانتوانیوە درێژە بە خوێندنەكەیان بدەن، ئێستاش بە ناچاری هەندێك لەوانە كرێكاری دەكەن و هەندێكی دیكەیان لە چاوەڕوانی حكومەتدان بۆ ئەوەی دابمەزرێن.

زۆرن ئەوانەی كەسانی سادەی ناو كۆمەڵگەن و سەرەڕای تەواوكردنی خوێندنی ماستەر بەڵام هەتاكو ئێستا نەیانتوانیوە لە یەكێك لە زانكۆكانی هەرێمی كوردستان وانەبڵێنەوە و هەم بژێوی ژیانیان دابین بكەن، هەمیش ئەو زانست و زانیارییەی هەیانە بیگەیەننە نەوەی نوێی ئەم هەرێمە.

رۆژی 8/9/2019 كە چەند رۆژێكی مابو بۆ جەژنی قوربان، هاوڵاتیەكی سنوری پارێزگای هەولێر كە خۆی و هاوسەرەكەی بڕوانامەی ماستەریان هەیە، لەرێگەی خەندانەوە پەیامێكی ئاراستەی بەرپرسانی هەرێمی كوردستان كردو دوایكرد بەهانایەوە بچن و وتی، كوڕەكەم داوای جلی جەژنی لێكردوم، بەڵام من تەنها چوار هەزار دینارم پێبوە، هێندە بێزارین لەگەڵ خێزانم بڕیارمانداوە شەوی جەژن كۆتایی بە ژیانی خۆشمان و منداڵەكەشمان بهێنین.

من ساڵی 2016 ماستەرم تەواوكردوە و شوێن نەماوە روی تێنەكەم، چومەتە زانكۆكانی( زاخۆ و سلێمانی و هەڵەبجە و راپەڕین و سەڵاحەدین) پێیانوتم دامەزراندن نییە، وتم باشە بە گرێبەست، وتیان نییە، وتم باشە بە سەردان بۆم دابنێن، من مامۆستا دەناسم لە چوار شوێن دەوام دەكات، باشە بۆچی بۆ ئەو هەیە بۆ من نییە

 

ئەو هاوڵاتییە بە خەندان-ی وت"من ساڵی 2016 ماستەرم تەواوكردوە و شوێن نەماوە روی تێنەكەم، چومەتە زانكۆكانی( زاخۆ و سلێمانی و هەڵەبجە و راپەڕین و سەڵاحەدین) پێیانوتم دامەزراندن نییە، وتم باشە بە گرێبەست، وتیان نییە، وتم باشە بە سەردان بۆم دابنێن، من مامۆستا دەناسم لە چوار شوێن دەوام دەكات، باشە بۆچی بۆ ئەو هەیە بۆ من نییە، هۆكارەكەی ئەوەیە كە سەرۆك زانكۆكان و راگرەكان هاوڕێو ناسیاوەكانی خۆیان دەهێنن".

لای خۆیەوە، كاروان ئیبراهیم، رۆژنامەنوس و یەكێك لەوانەی لە دەرەوەی وڵات خوێندویەتی بە خەندان-ی راگەیاند،"من فەرمانبەری شارستانیم لە بەڕێوەبەرایەتی بەرەنگاربونەوەی توندوتیژی دژی ئافرەتان/ سلێمانی، مۆڵەتی بێ‌ موچەم كرد بۆ ماوەی دو ساڵ لە (7/8/2014 تا 7/8/2016) لەو ماوەیەدا لەسەر گیرفانی خۆم چومە وڵاتی هندستان بۆ خوێندن و بڕوانامەی ماستەرم بەدەستهێنا لە بواری ڕاگەیاندن، كە هەر پسپۆڕییەكەی خۆمە."

تا ئێستا هاوتاکردنی بڕوانامە بۆ من نەکراوە و هیچ حسابێک بۆ بڕوانامەکەم نەکراوە، لە کاتێکدا ڕەنجێکی زۆرم کێشا و بە هەژاریی خوێندم و ویستم لە ڕێگەی خوێندن و فێربونی زمانەوە، خزمەتی زیاتری کوردستان بکەم. هەروەها خەڵکم لەگەڵ بو ئەویش مۆڵەتی بێ موچەی کردبو وەک من، بڕوانامەکەی هاوتا کراوە

 

وتیشی،"من هەشت مانگ پێش دەرچونی بڕیاری سەرۆكایەتی ئەنجومەنی وەزیران ژمارە (28) لە (5/4/2015) مۆڵەتی بێ‌ موچەم كردوە، بڕیارەکە دەڵێت: لەو بەروارە بەدواوە مۆڵەتی بێ‌ موچە پەسەندكردنی بڕوانامەی بۆ ناكرێت، بەڵام ئەوانەی پێش ئەو بەروارە مۆڵەتی بێ‌ موچەیان كردوە و بەكاریانهێناوە بۆ خوێندن، پەسەندكردنی بڕوانامەیان بۆ دەكرێت. "

سەبارەت بە هاوتاكردنی بڕوانامەكەی وتی،"تا ئێستا هاوتاکردنی بڕوانامە بۆ من نەکراوە و هیچ حسابێک بۆ بڕوانامەکەم نەکراوە، لە کاتێکدا ڕەنجێکی زۆرم کێشا و بە هەژاریی خوێندم و ویستم لە ڕێگەی خوێندن و فێربونی زمانەوە، خزمەتی زیاتری کوردستان بکەم. هەروەها خەڵکم لەگەڵ بو ئەویش مۆڵەتی بێ موچەی کردبو وەک من، بڕوانامەکەی هاوتا کراوە."

ئایا ئەم كابینەیە توانای هەیە چاكسازی لە كەرتی خوێندنی باڵا بكات و خودی وەزیری خوێندنی باڵا چۆن روبەروی چارەسەركردنی ئەو گرفتانە دەبێتەوە كە بەم هۆیانەوە دێنە ئاراوە

 

لەئێستادا حكومەتی هەرێمی كوردستان سەرقاڵی پرۆسەی چاكسازییە و كابینەی نۆیەمی حكومەتیش وەك بەرپرسانی گۆڕان زۆرجار وتویانە لەسەر بنەمای روبەروبونەوەی گەندەڵی و ئەنجامدانی چاكسازی پێكهێنراوە، بەڵام ئایا ئەم كابینەیە توانای هەیە چاكسازی لە كەرتی خوێندنی باڵا بكات و خودی وەزیری خوێندنی باڵا چۆن روبەروی چارەسەركردنی ئەو گرفتانە دەبێتەوە كە بەم هۆیانەوە دێنە ئاراوە. داهاتو وەڵامی ئەو پرسیارانە دەداتەوە.

 


Copyright © 2016 Xendan.org all rights reserved

designed and developed by AVESTA GROUP