هەواڵی ئەمڕۆ

سەرۆکایەتی کۆماری تورکیا: رێککەوتنی سەدە پلانێکی دوژمنکارانەیە بەرامبەر فەلەستین

- 1/29/2020 5:44:00 PM 735 جار خوێندراوەتەوە

خەندان-

سەرۆکایەتی کۆماری تورکیا رایگەیاند، رێککەوتنی سەدە کە دوێنی سەرۆکی ویلایەتە یەکگرتوەکانی ئەمریکا بڵاویکردوەتەوە پلانێکی دوژمنکارانەیە بەرامبەر گەلی فەلەستین و ئەوان رەتیدەکەنەوە.

 

ئیبرائیم کاڵن، وتەبێژی سەرۆکایەتی کۆماری تورکیا لەبارەی "رێککەوتنی ئاشتی" کە دوێنێ سەرۆکی ویلایەتە یەکگرتوەکانی ئەمریکا بۆ چارەسەرکردنی کێشەکانی نێوان فەلەستین و ئیسرائیل ناوەڕۆکەکەی بڵاوکردەوە، بۆ رۆژنامەنوسانی وڵاتەکەی رونیکردوەتەوە "ئەنقەرە ئەو نەخشەرێگایە رەتدەکاتەوە چونکە ناوەڕۆکەکەی بەرنامەیەکی دوژمنکارانەیە بەرامبەر گەلی فەلەستین".

 

رێککەوتنی سەدە  پێچەوانەی مافەکانی گەلی فەلەستین و یاسا نێودەوڵەتییەکانیشە

 

ئاماژەی بەوەشکردوە، بە بۆچونی حکومەتی تورکیا "رێککەوتنی ئاشتی" کە بۆ چارەسەرکردنی پرسی فەلەستین پێشنیازکراوە پێچەوانەی "مافەکانی گەلی فەلەستین و یاسا نێودەوڵەتییەکانیشە".

28ی کانونی دوەم لەکۆنگرەیەکی رۆژنامەوانیدا لەواشنتنی پایتەختی ئەمریکا، دۆناڵد ترەمپی سەرۆکی ئەمریکا و بنیامین ناتانیاهۆی سەرۆک وەزیرانی ئیسرائیل پلانی ئاشتی رۆژهەڵاتی ناوەڕاستیان راگەیاند.

دۆناڵد ترەمپ لە بارەی نەخشەرێگای ئیدارەکەی ئاماژەی بەوەکرد، "پرۆژەکە گرنگی زۆری بەبوژاندنەوەی باری ئابوری فەلەستین و ناوچەکە داوە، بەوپێیەش ئاستی هەژاری فەلەستینییەکان لەئاستێکی مەترسیداردایە، بۆیە پێویستە ژیانی پێکەوەیی هەڵبژێرن".


بەقەبارەی 50 ملیار دۆلار وەبەرهێنان لەفەلەستین دەکرێت

 

ئەوەشی خستەڕو، ئەگەر فەلەستین ژیانی ئاشتیانە هەڵبژێرێت بەقەبارەی 50 ملیار دۆلار وەبەرهێنانی تێدادەکرێت و یەک ملیۆن دەرفەتی کار دەڕەخسێنێت. 

ترەمپ وتیشی، "ئەوە بڕیارێکی قورس بوە بۆ پێشکەشکردنی چارەسەرێک بۆ کێشەیەکی سەدان ساڵە، بەڵام ئەو بۆ ئەوە هەڵنەبژێردراوە کە خۆی لەبڕیارە قورسەکان بدزێتەوە".



Copyright © 2016 Xendan.org all rights reserved

designed and developed by AVESTA GROUP