هەواڵی ئەمڕۆ

ئەردۆگان بۆ روسیا: ئارامگرتنی تورکیا بەرامبەر بۆردومانەکانی ئیدلیب کۆتاییهات

- 1/29/2020 2:24:00 PM 1611 جار خوێندراوەتەوە

خەندان- 

سەرۆک کۆماری تورکیا روسیای تۆمەتباردەکات بە شکاندنی رێککەوتننامەی سۆچی و ئەستانە لەبارەی ئاگربەست لەسوریا و رایگەیاند، ئارامگرتنی تورکیا بەرامبەر بۆردومانەکانی ئیدلیب کۆتایی پێهاتوە.

رەجەب تەیب ئەردۆگان، سەرۆک کۆماری تورکیا لەمیانەی لێدوانێکدا بۆ تەلەفزیۆنی "NTV"ی تورکیا رایگەیاند، "روسیا پابەندی رێککەوتننامەی سوچی و ئەستانە لەبارەی ئاگربەست لەسوریا  نەبوە و بەردەوام رژێمی ئەسەد کە روسیا پاڵپشتی دەکات بۆردومانی ئیدلیب دەکات".

ئاماژەی بەوەشکرد، وڵاتەکەی بە روسیای راگەیاندوە، چیتر ئارام ناگرن لە بەرامبەر بۆردومانەکانی ئیدلیب.

ئەمە لەکاتێکدایە شەوی رابردو خلوسی ئاکار، وەزیری بەرگری تورکیا رایگەیاندبو، "تورکیا بەتوندی وەڵامی ئەو هێرشانەی سوپای سوریا دەداتەوە، کە بۆ سەر خاڵی چاودێری هێزەکانی تورکیا لەپارێزگای ئیدلیب کراوە".

پێشتر سێرگی لاڤرۆڤ، وەزیری دەرەوەی روسیا جەختیکردبوەوە، لەسەر پاڵپشتی مۆسکۆ بۆ سوپای سوریا، کە بەمەستی لەناوبردنی گروپە چەکدارەکان بۆ سەر پارێزگای ئیدلیب ئەنجامیدەدات.

وەزیری دەرەوەی روسیا باسی لەوەشکردوە، لەگەڵ تورکیا رێککەوتون لەسەر ئەوەی چەکدارە ئۆپۆزسیۆنەکانی سوریا نەخە لیستی تیرۆرستانەوە.

ماوەی پێنج رۆژە هێزەکانی حکومەتی ئەسەد کە لەلایەن روسیاوە پاڵپشتی دەکرێت، هێرشە زەمینی و ئاسمانییەکانی بۆ سەر پارێزگای ئیدلیب لە باکوری سوریا چڕکردوەتەوە، بەوهۆیەشەوە هەزاران هاوڵاتی ئەو پارێزگایە ناچاربون ماڵەکانیان چۆڵ بکەن و بەرەو سنورەکانی تورکیا هەڵبێن.

روانگەی سوری بۆ مافەکانی مرۆڤ لەلایەن خۆیەوە رایگەیاند، "لە رۆژی 25ی ئەم مانگەوە، سوپای سوریا بەردەوام بۆردومانی ناوچەکانی شاری ئیدلیب دەکات، توانیویەتی 14 ناوچەی ئیدلیب کۆنتڕۆڵ بکات".


Copyright © 2016 Xendan.org all rights reserved

designed and developed by AVESTA GROUP