چەندین زانیاری لەبارەی پەیڕەوە هەمواركراوەكەی یەكێتی لەم چاوپێكەوتنەدا ئاشكرادەكرێت

- 1/28/2020 9:38:00 PM 9881 جار خوێندراوەتەوە

خەندان-بڕیار جەلال

جەزا سەید مەجید، ئەندامی ئەنجومەنی گشتی سەركردایەتی یەكێتی و یەكێك لە ئەندامانی لیژنە 20 كەسیەكەی پێداچونەوە بە پەیڕەوی ناوخۆی یەكێتی، لەم چاوپێكەوتنەی خەندان زانیاری گرنگ لەبارەی ئامادەكارییەكانی پەیڕەوی ناوخۆ و ناوەرۆكی هەندێك لە ماددەكانی پەیڕەوەكە و دەسەڵاتەكانی سەرۆكی یەكێتی و جێگرەكانی و ئەنجومەنی باڵای سیاسی یەكێتی و ئەنجومەنی گشتی سەركردایەتی یەكێتی ئاشكرا دەكات و دەڵێت كارێكمانكردوە بەشێوەی 33٪ دەسەڵاتەكان دابەشببێت، ئاماژە بەو هاوپێچەش دەكات كە لەگەڵ پەیڕەوەكە پێشكەشی ئەنجومەنی گشتی سەركردایەتی دەكرێت كە تایبەتە بە دەسەڵاتەكانی ئەنجومەنی باڵای سیاسی یەكێتی، ئاشكراشیدەكات كە دو كەسیان دیارییكردوە بۆ جێگری سەرۆكی یەكێتی، هەروەها چەندین بابەتی دیكەش دەخاتەرو:

كارەكانی پرۆژەكە گەشتۆتە كوێ، ئایا تەواو بوە؟
پرۆژەكەیان دا بە ئێمە كە لیژنە 20 كەسییەكە پێداچونەوەی پێدا بكات، ئەمڕۆ ئێمە تەواومانكردو دوای تەواوبونی بڕیارماندا بچینە سەر گڵكۆی مام و ئەو ئامانەتیەی پێیانسپاردوین، سبەی پێشكەشی كاك مستەفا چاو رەشی دەكەین كە وەك بەتەمەنترین كەس، سەرپەرشتی كۆبونەوەی ئەنجومەنی گشتی سەركردایەتی یەكێتی دەكات.

گۆڕانكارییە جەوهەریەكانی ناو پەیڕەوەكە چین؟
- گۆڕانكارییەكان زۆر نین، ئێمە پێداچونەوەمان كردوە و هەڵەچنیمان كردوە، هەندێك ماددە هەبوە زیاد بوە لامانبردوە، هەندێك ماددەی دیكە هەبوە زیادمانكردوە بۆ پرۆژەكە، لە هەندێك شوێندا دو ماددەی دیكە هەبوە هاوشێوەی یەكتربوە دامانەناوەتەوە، هەندێك بابەتی دیكەش هەبوە نەگەیشتوینەتە ئەنجام و رای جیاوازی لەسەر بوە، بۆ نمونە ئەنجومەنی سەركردایەتی شارەكان بێت یاخود مەڵبەند، ئەوە بە دو ئۆپشن ماوەتەوە و دەیبەینە ناو ئەنجومەنی گشتی سەركردایەتی و لەوێ دەخرێتە دەنگدان، كامیان زۆرینەی دەنگەكانی بەدەستهێنا ئەو ئۆپشنەیان جێبەجێ دەكرێت.

دەسەڵاتەكانی ئەنجومەنی باڵای سیاسی یەكێتی بەپێی ئەو پەیڕەوەی ئامادەكراوە چین؟
- ئێمە بەشێوەیەكی گشتی چاوەڕێمان دەكرد كە ئەو ئەنجومەنە پەیامێكمان بۆ بنێرن، یاخود لەگەڵ لیژنەیەكمان دابنیشن، چونكە ئێمە وەك لیژنەی پێداچونەوەی پەیڕەوی ناوخۆ، گەیشتوینەتە سەر كارەكانی هەر مەكتەبێك كە گفتوگۆی لەسەر بكەین، دەمان نارد بە شوێن مەكتەبەكەدا و ئەوان دەهاتن بەرچاورونیان پێ دەداین، ئێمەش لەسەر ئەو بەرچاورونیە و لەسەر ئەوەشی پێشتر نوسرابو گەڵاڵەیەكمان ئامادە دەكرد و پێداچونەوەمان پێدا دەكرد، هەمومان پێمانباشبوە كە بەهەمان شێوە بۆ ئەنجومەنی باڵای سیاسی یەكێتی هەمان رێگە بگرینە بەر، بۆیە پەیاممان بۆ ناردن كە وەرن و وەفدێك بنێرن یاخود پەیپەرێكمان بۆ بنێرن، كە كاری لەسەر بكەین، ئەمڕۆ تاكو كاتژمێر 11ی پێشنیوەڕۆش چاوەڕێمان كردن بەڵام هیچیان نەناردو هیچی شتێكی ئەوتۆمان پێنەگەشت، بۆیە كاتی خۆی ئەنجومەنی دانایانمان هەبو كە ئەو ئەنجومەنە دەسەڵاتەكانمان بۆ دیاریی كردبو، بۆیە ئەنجومەنی باڵای سیاسی جێگەی ئەنجومەنی دانایانی یەكێتی گرتەوە، ئەو دروست نەكراو ئەم دروستكرا لەناو كۆنگرە، هەندێك لە دەسەڵاتەكانی ئەنجومەنی دانایان لەگەڵ كۆمەڵێك بابەتی دیكە لە چوارچێوەی هاوپێچێكدا وەك پێناسەیەكی بچوك لەگەڵ پەیڕەوەكە ئامادەمانكردوە و پێشكەشی ئەنجومەنی گشتی سەركردایەتی یەكێتی دەكەین و تیایدا دەسەڵاتەكانی ئەنجومەنی باڵای سیاسی یەكێتی تێدا دیاریی كراوە و لەوێ گفتوگۆی لەسەر دەكرێت. هەرچەندە هێشتا چاوەڕێین كە خۆیان بێن و بە هەر رێگەیەك بێت رونكردنەوەمان بدەنێ كە هەردولا پێكەوە دابنیشین كە هیچ بەریەككەوتنێك نەبێت بەشێوەیەك بێت كە پێگەی ئەوان و دەسەڵاتەكانیان لەگەڵ هەمو ماددەكانی دیكەدا بگونجێت.

گرنگترین دەسەڵاتەكانی ناو هاوپێچەكە چین كە دراوە بە ئەنجومەنی باڵای سیاسی یەكێتی؟
-شتێكی ئەوتۆ نین، تیایدا نوسراوە كە ئەو ئەنجومەنە و ئەندامەكانی پارێزەری پەیڕەون، وەكو سومبولێكی یەكێتی نیشتیمانی كوردستان سەیریان دەكرێت، وەكو ئەنجومەنێكی راوێژكاری و كۆمەڵێك دەسەڵاتی دیكەی تیادا نوسراوە و چاوەڕێ دەكەین لە ئایندەدە بە هەر رێگەیەك بوە پێكەوە ئەو كارە جێبەجێ بكەین.

ئایا ناوی سكرتێری یەكێتی دەمێنێت یاخود دەگۆڕێت و دەسەڵاتەكانی چی دەبن و چەند جێگری دەبێت؟
- سكرتێرمان لابردوە و سەرۆكی حزبمان داناوە، لەناو هەموای پەیڕەوەكەدا دو جێگرمان داناوە كە دەبێت سەرۆك دو جێگری هەبێت، با شتێكی گرنگت پێ بڵێم، سێ دەسەڵات هەیە، یەكێكیان دەسەڵاتی ئەنجومەنی جێبەجێكاری یەكێتییە كە لە سەرۆكی حزبەوە تاكو لێپرسراوی مەڵبەندەكانی تێدا دیاریی كراوە، دەسەڵاتێكی دیكەیان ئەوەیە كە لە ئەنجومەنی گشتی سەركردایەتی دەمێنێتەوە و چاودێری حزب دەكەن و رێسا و یاسا بۆ حزب دادەنێن، دەسەڵاتێكی دیكەش ئەوەیە كە ئەنجومەنی باڵای سیاسییە و كاك كۆسرەت سەرۆكایەتی دەكات، ئێمە هەوڵمانداوە دەسەڵاتەكانی یەكێتی دابەشبكەین بۆ ئەو سێ دەسەڵاتە بەشێوەیەك كە هەرسێلا 33٪ی دەسەڵاتەكانی هەبێت بۆ ئەوەی بتوانن چاودێری یەكتر بكەن، ئێمە هەم بەشی دەسەڵاتمان دیاریی كردوە هەم بەشی دابەشكردنی دەسەڵاتەكانمان لەناو پەیڕەوەكە داناوە، كە بۆخۆی ئەمە دو تایبەتمەندی باشی سیستمی پەرلەمانییە.

پێشتر دەوترا كە چەند پێشنیارێك كراوە كە جێگرانی سەرۆكی یەكێتی لەنێوان 4 یان 5 یان 6 جێگردا بێت، ئایا ئێوە بۆ ئەوانەتان جێگیر نەكرد؟
- ئەوەی ئێمە جێگیرمان كردوە لەناو پەیڕەوەكە دو كەسە، ئەمە دەچێتە ناو كۆبونەوەی ئەنجومەنی گشتی سەركردایەتی و لەوێ گفتوگۆی لەسەر دەكرێت، رەنگە دو كەسەكە جێگیر بكرێت، یاخود رەنگە بكرێتە چوار جێگر، ئەوەی ئێمە دیارییمانكردوە لە پێداچونەوەكەدا دو جێگرە.

ئایا ئەنجومەنی سەركردایەتی دەسەڵاتی هەیە گۆڕانكاری لەم پەیڕەوە بكات یاخود تەنها دەنگ لەسەر ماددەكان دەدرێت؟
- بەڵێ دەسەڵاتی تەواوی هەیە، لەیەكەمین ماددەوە دەخوێندرێتەوە تاكو كۆتا ماددە و گفتوگۆی لەسەر دەكەن، ماددە بە ماددە دەنگی لەسەر دەدەن و تاكو ئەوان پەسەندی نەكەن ناڕوات.

جێگرانی سەرۆكی یەكێتی چۆن هەڵدەبژێردرێت و دەسەڵاتەكانیان چی دەبێت؟
- ئێمە ئەو دو جێگرەی دامانناوە بەپێی ئەو دەنگانەی دەیانبێت كامیان دەنگی زۆرتری هێنا دەبێتە جێگری یەكەم، لەحاڵەتێكدا ئەگەر سەرۆكی حزب ئامادە نەبو، ئەوا جێگری یەكەم شوێنی دەگرێتەوە، ئەو كاتە خۆیان بەرنامەیەك دادەنێن و سەرۆكی حزب كارەكان دابەشدەكات.

تا ئێستا چەند كەس بۆ سەرۆك و جێگری سەرۆكی یەكێتی بەرنامەیان هەیە خۆیان كاندید بكەن؟
-ناوی زۆر كەس دەهێنرێت، لەراستیدا ناوی كاك بەرهەم و كاك بافڵ و كاك لاهور و چەندین ناوی دیكەش دەهێنن، بەڵام هەتاكو ئێستا دیارنییە كە كێ خۆی كاندید دەكات.

بڕیارەی سبەی كۆبونەوەی ئەنجومەنی گشتی سەركردایەتی یەكێتی ئەنجامبدرێت، ئایا هیچ گۆڕانكارییەك كراوە؟
-هەرچەندە پێشتر سەرجەم ئەندامانی ئەنجومەنی سەركردایەتی یەكێتی ئاگاداركرابونەوە كە سبەی كاتژمێر 11ی پێشنیوەڕۆ لە هۆڵە تازەكەی ناو بینای مەكتەبی سیاسی كۆن كۆببینەوە، بەڵام ئەمشەو ئاگاداریان كردینەوە كە كۆبونەوەكە بۆ رۆژی شەممە دواخراوە.

لە كۆبونەوەكەی رۆژی شەممە گفتوگۆ لەسەر كام بەشانەی پەیڕەوەكە دەكەن، ئایا دەتوانن كۆی گشتی پەیڕەوەكە بخەنە دەنگدانەوە؟
-پێدەچێت بەشی یەكەم و دوەم گفتوگۆی لەسەر بكرێت، بەشی یەكەم باسی پرنسیپە گشتییەكان دەكات و بەشی دوەمیش باسی ئەندامێتی دەكات، ئەمانە بابەتی گشتین و كۆدەنگی هەیە لەسەری و پێداچونەوەی بۆ دەگەین و پێشموایە دەنگی لەسەر دەدرێت، بەڵام لەبەشەكانی دیكەدا گفتوگۆی زیاتر دەكرێت، ئێمە 76 كاتژمێر سەرقاڵی ئەم پەیڕەوە بوین و 12 كۆبونەوەمان بۆ ئەنجامدا، هەوڵمانداوە شێوازێك دابنێین كە كەمترین گفتوگۆی لەسەر بكرێت، چونكە ئەم پەیڕەوە كاتی خۆی لە 2014 نوسراوە و من خۆشم بەشدار بوم تیایدا، چەندین جار پێداچونەوەی بۆ كراوە و لیژنەی باڵای پەیڕەویش چەند جارێك پێداچونەوەی بۆ كردوە، ئێمە جارێكی دیكە لە رێگەی ئەم لیژنە 20 كەسیەوە پێداچونەوەمان كردوە، بۆیە پێموایە گفتوگۆ هەڵدەگرێت، بەڵام بۆ ئەوەی بتوانین كەمترین گفتوگۆی لەسەربكرێت و را جیاوازەكانیش كۆبكەینەوە و بەشێوەیەك بیخەینە دەنگدانەوە كە خێربێت دەنگدانی لەسەر، سەبارەت بە دەنگدانیش بە سەرۆك و جێگرانی یەكێتی باوەڕناكەم لە كۆبونەوەكەدا كە بڕیارە رۆژی شەممە ئەنجامبدرێت دەنگیان لەسەر بدرێت.


Copyright © 2016 Xendan.org all rights reserved

designed and developed by AVESTA GROUP