بەپەلە

وەزارەتی تەندروستی: لەگەڵ ڕێکخراوی تەندروستی جیهانی، چاودێری بارودۆخی ڤایرۆسی كۆڕۆنا دەکەین

- 1/24/2020 6:03:00 PM 2446 جار خوێندراوەتەوە

خەندان-

سەبارەت بەو ڤایرۆسە نوێیەی، لە چەند رۆژی رابردودا لە چین بە تایبەتی و هەندێك وڵاتی دیكەدا بڵاوبوەتەوە و بوەتە هۆی داخستنی شوێنە گشتییەكان لە چین، وەزارەتی تەندروستی هەرێمی كوردستان رونكردنەوەیەكی بڵاوكردەوە.

ئەمڕۆ هەینی، وەزارەتی تەندروستی هەرێم سەبارەت بە ڤایرۆسی كۆڕۆنای نوێ رونكردنەوەیەكی بڵاوكردەوە كە تێیدا هاتوە "هەواڵی سەرهەڵدانی جۆرێکی نوێ لە ڤایرۆسی کۆڕۆنا لە شاری وهان لە وڵاتی چین بڵاوبوەتەوە، کە بەگوێرەی دوا ڕاپۆڕتی ڕێکخراوی جیهانی WHO تاوەکو ئێستا 557 کەس توشبوون و 17 کەس گیانیانلەدەستداوە و ڕێژەی کوشندەیی تا ئێستا لەسەدا چوارە ، جگە لە وڵاتی چین، لە چەند وڵاتێکی دیكەی وەک یابان، کۆریا، تایلەند و سەنغافورا تۆمارکراوە".
لەنزیکەوە بەهەماهەنگی لەگەڵ ڕێکخراوی تەندروستی جیهانی WHO چاودێری بارودۆخی پەتاکە دەکەین

ئاماژە بەوەشكراوە "دوابەدوای بڵاوبونەوەی ئەو هەواڵە، لە هەرێمی کوردستان وەک سەرجەم وڵاتانی دیكەی جیهان لەنزیکەوە بەهەماهەنگی لەگەڵ ڕێکخراوی تەندروستی جیهانی WHO چاودێری بارودۆخی پەتاکە دەکەین و ڕێکاری پێویست دەگرینە بەر".

بە گوێرەی رونكردنەوەكەی وەزارەتی تەندروستی هەرێمی كوردستان، تا ئێستا ئەو زانیاری و راسپاردانەی هەیە بۆ بەرەنگاربونەوەی ڤایرۆسەکە، پێویست ناکات پشکنین و چاودێری لە فڕۆکەخانە و خاڵە سنوریەکان و شوێنە گشتیەکانی هەرێم بگیرێتەبەر.

لە درێژەی رونكردنەوەكشەدا هاتوە "ڕێکارەکان هەمان ڕێوشوێنی کۆنتڕۆڵ و خۆپارێزیە لە پەتای ڤایرۆسی ئەنفلوەنزا وەک پەتاگەری، زو دۆزینەوە و جیاکردنەوە و چارەسەرکردن و هۆشیاری تەندروستی لە خۆپارێزی کەسیی وەک، زو زو دەست شوشتن، خۆ بەدورگرتن لەشوێنی جەنجاڵ و داخراو لەگەڵ پابەندبون بە ئەتەکیەتی کۆکین و پژمین وەک داپۆشینی دەم و لوت".


نیشانەکردن :

#هه‌رێمی‌ كوردستان

Copyright © 2016 Xendan.org all rights reserved

designed and developed by AVESTA GROUP