"پێش خنكاندنیان گۆرانی بۆ وتون"
ڤیدیۆ..بە تۆمەتی خنكاندنی هەرسێ منداڵەكەی، دایكێك دەستگیردەكرێت

- 1/22/2020 4:57:00 PM 33133 جار خوێندراوەتەوە

خەندان-

لە یەكێك لە ویلایەتەكانی سەر بە ویلایەتە یەكگرتوەكانی ئەمریكا، پۆلیس ژنێكی بە تۆمەتی كوشتنی هەرسێ منداڵەكەی دەستگیركرد.

پۆلیسی ویلایەتی ئەریزۆنا، سەر بە ویلایەتە یەكگرتوەكانی ئەمریكا ژنێكی دەستگیركرد بە تۆمەتی خنكاندنی هەرسێ منداڵەكەی، پاش ئەنجامدانی ئەو كارەش جەستەی بێگیانی منداڵەكانی خستوەتە سەر قەنەفەی ماڵی خۆیان [وای دەرخستوە كە خەوتون].

رەیچڵ هێنری تەمەن 22 ساڵ، ئەمڕۆ چوارشەممە لەلایەن پۆلیسی ویلایەتی ئەریزۆنا-ەوە دەستگیركرا، مێرسیدس فۆرتون، بەرپرسێكی پۆلیسی ناوچەی فینیكس لە ئەریزۆنا لەوبارەیەوە رایگەیاند "تۆمەتبارەكە دانیبەوەداناوە كە ئازاری منداڵەكانی داوە".
سەرەتا لە كچە گەورەكەیەوە دەستی پێكردوە

تا ئێستا هۆكاری كوشتنی ئەو منداڵانە لەلایەن دایكیانەوە نەزانراوە، بەڵام لەمیانی لێكۆڵینەوە لەگەڵ هێنری-دا، ئەو ژنە دانیبەوەداناوە هەرسێ منداڵەكەی (كۆرپەیەكی كچی تەمەن 7 مانگ، كچێكی یەك ساڵ و كوڕێكی 3 ساڵ)ی خنكاندوە و سەرەتا لە كچە گەورەكەیەوە دەستی پێكردوە.
برا سێ ساڵانەكەی تەماشای دۆخەكەی كردوە و هاواریكردوە بوەستێت، چڕنوكی لە دایكی گرتوە و مستەكۆڵەی پێداكێشاوە

هاوكات لە دۆسیەی لێكۆڵینەوە بەراییەكانی هێنری-دا كە لە لایەن پۆلیسەوە ئەنجامدراوە هاتوە "تۆمەتبار دەستی خستوەتە سەر دەم و لوتی قوربانییەكان و دەستی لانەبردوە تا هەناسەیان لەبەربڕاوە و گیانیانلەدەستداوە"، بۆ پۆلیس رونیشیكردوەتەوە "كاتێك كچە یەك ساڵانەكەی خنكاندوە برا سێ ساڵانەكەی تەماشای دۆخەكەی كردوە و هاواریكردوە بوەستێت، چڕنوكی لە دایكی گرتوە و مستەكۆڵەی پێداكێشاوە".

هەر لەو لێكۆڵینەوانەدا هێنری ئاماژەی بەوەكردوە "پاش كچە یەك ساڵانەكەی دەستیكردوە بە خنكاندنی كوڕە سێ ساڵانەكەی لەسەر زەمینی ژوری نوستنەكە و لەكاتێكدا منداڵەكە چڕنوكی لە دایكی گرتوە بۆ ئەوەی لەو كارەی بوەستێت هێنری گۆرانی بۆ وتوە تا بە تەواوی منداڵەكە هەناسەی لەبەر بڕاوە".
هەرسێ منداڵەكەی لەسەر قەنەفەی ژوری دانیشتن پاڵخستوە (وەك ئەوەی خەویان لێكەوتبێت)

هەر بەپێی دانپێدانانەكانی، پێش ئەوەی كۆپەكەی بچوكەكەی بەهەمان دەردی خوشك و براكەی ببات شیری داوەتێ و پاشان بە گۆرانی وتن بۆی هەمان كاری پێشوی ئەنجامداوە، دواتریش هەرسێ منداڵەكەی لەسەر قەنەفەی ژوری دانیشتن پاڵخستوە (وەك ئەوەی خەویان لیكەوتبێت)، دواتر باوكی منداڵەكان كە تەمەنی 30 ساڵە و یەكێك لە خزمەكانیان كە تەمەنی 49 ساڵە پاش ماوەیەك هەستیان بە گیانلەدەستدانی منداڵەكان كردوە و پۆلیسیان ئاگاداركردوەتەوە.

 

ئەو بەرپرسەی پۆلیس دەڵێت "هێنری پاش روداوەكە و پێش ئاگاداركردنەوەی پۆلیس بینراوە كە باری دەرونی زۆر تێكچوە و بە خەمباری گریاوە، كاتێكیش پۆلیس گەیشتوەتە شوێنی روداوەكە یەكەمین كەس بوە بۆ رزگاركردنی منداڵەكان بە هاوار و ناڵەوە رۆشتوەتە سەر جەستەی بێگیانیان".

تا ئێستا پۆلیس هیچ هۆكار و پاڵنەرێكی نەدۆزیوەتەوە سەبارەت بە ئەنجامدانی ئەو كارە لە لایەن دایكی منداڵەكانەوە، بەڵام بەگوێرەی وتەی خاوەنماڵەكەی هێنری و هاوژین و خزمەكەیان "هێنری ماوەیەكە ئالودەی مێتامفێتامین بوە، كە دەرمانێكە پەیوەندی بە مێشك و سیستمی دەمارەوە هەیە و لەماوەی چەند رۆژی پێش روداوەكەدا هەڵسوكەوتی نائاسایی و نامۆ بوە".

 


نیشانەکردن :

#جۆراوجۆر

Copyright © 2016 Xendan.org all rights reserved

designed and developed by AVESTA GROUP