شاسوار عەبدولواحید 48 کاتژمێر مۆڵەت دەداتە سێ پەرلەمانتاری فراکسیۆنەکەی

- 1/20/2020 12:15:00 PM 55684 جار خوێندراوەتەوە

خەندان- 
سەرۆکی جوڵانەوەی نەوەی نوێ رایگەیاند، ئەوان سوپاسی ئەو چوار پەرلەمانتارەیان دەکەن کە پابەندی بەرنامەی سیاسی جوڵانەوەکەیان بون و ئەگەر پەرلەمانتارەکانی دیکەیان لە 48 کاتژمێردا فۆرمی خانەنشینی رەتنەکەنەوە "لە فراکسیۆن و جوڵانەوەکەش دەردەکرێن".

شاسوار عەبدولواحید، سەرۆکی جوڵانەوەی نەوەی نوێ لە کۆنفرانسێکی رۆژنامەنوسیدا ئاماژەی بەوەشکردوە، "ئێمە هەر لەسەرەتاوە فۆرمێکمان بە کاندیدەکانی جوڵانەوەکە لە پەرلەمانی کوردستان پڕکردوەتەوە کە لە کاتی دەرچونیاندا دەبێت خانەنشینی و ئیمتیازاتەکانی دیکە رەتبکەنەوە، چونکە بەلای ئێمەوە متمانەی خەڵک و مەبدەئی ئەندامەکانمان لە هەمو شتێک گریگترە".

 

بۆ ئێمە گرینگ نیە هەشت یان شەش یان چوار پەرلەمانتارمان هەبێت، بەڵکو گرینگ ئەوەیە پەرلەمانتاری بە هەڵوێستمان هەبێت


ئاماژەی بەوەشکرد، "بۆ ئێمە گرینگ نیە هەشت یان شەش یان چوار پەرلەمانتارمان هەبێت، بەڵکو گرینگ ئەوەیە پەرلەمانتاری بە هەڵوێستمان هەبێت، بۆیە داوامانکردوە ئەو سێ پەرلەمانتارەی دیکەش کە لە فراکسیۆنی نەوەی نوێدان ئەگەر لە 48 کاتژمێردا فۆرمی خانەنشینی رەتنەکەنەوە لە نەوەی نوێ دەردەکرێن".

 

هەندێ کەس دەیانەوێت بەشتی لاوەکی ئێمە مەشغوڵ بکەن بەڵام ئێمە تەرکیزمان لەسەر بەرنامەی خۆمان دەبێت

 

لەبارەی رەخنەی لایەنەکانی دیکەش لە نەوەی نوێ، شاسوار عەبدولواحید رونیکردەوە، "ئێمە تەرکیزمان لەسەر دو پارتە دەسەڵاتدارەکەیە کە پارتی و یەکێتیین، دەزانین هەندێ کەس دەیانەوێت بەشتی لاوەکی ئێمە مەشغوڵ بکەن بەڵام ئێمە تەرکیزمان لەسەر بەرنامەی خۆمان دەبێت"، بۆ هەماهەنگی نێوان حزبەکانی دیکەی دەرەوەی ئەو دو پارتەش وتی "چەندینجار داوامانکردوە لە گۆڕان، کۆمەڵ و یەکگرتو هەماهەنگی بکەین، بەڵام تائێستا ئەنجامی نەبوە".

 

 

رەنگە لە مێژودا ئەوە یەکەمینجار بێت حکومەتێک لە میدیاکانەوە بۆڵەبۆڵ بکات


لەبارەی تۆمەتباکردنیشی بە "نەدانەوەی قەرزەکانی بە حکومەت" سەرۆکی جوڵانەوەی نەوەی نوێ ئاماژەی بەوەکرد، "ئەوە چەندینجارە ئەو تۆمەتەم ئاڕاستە دەکەن، من هەمو جارێک وتومە فەرمون شکات بکەن، رەنگە لە مێژودا ئەوە یەکەمینجار بێت حکومەتیك کە لە میدیاکانەوە بۆڵەبۆڵ بکات، من هیچ شتێک لە خۆمدا شک نابەم فەرمون شکات بکەن ، ئەگەر مەبەستان لێدان نیە لە پرۆژە سیاسییەکەی نەوەی نوێ".

 

دوێنیش چوار ئەندامی فراکسیۆنی نەوەی نوێ لە پەرلەمانی کوردستان رایانگەیاند، موچەی خانەنشینی پەرلەمانتاری رەتدەکەنەوە و دوای تەوابونی کاری پەرلەمانتاری دەگەڕێنەوە سەر کارەکانیان.

ئەوەش لە کاتێکدایە فراکسیۆنی نەوەی نوێ لە کۆی هەشت پەرلەمانتاری، چوار پەرلەمانتاریان بە جیاواز و سەربەخۆ کاری خۆیان دەکەن و سیروان بابان رایگەیاندوە، موچەی خانەنشینی رەتکردوەتەوە و پەرلەمانتاران شادی نەوزاد، مەم بورهان قانع و دیاری ئەنوەر تا ئێستا بێ دەنگن، لەگەڵ ئەوەشدا پەرلەمانتار شادی نەوزاد دەنگی بە یاسای چاکسازی داوە و بەوهۆیەش جوڵانەوەکە لە ریزەکانی دوریخستوەتەوە.


نیشانەکردن :

#هه‌رێمی‌ كوردستان

Copyright © 2016 Xendan.org all rights reserved

designed and developed by AVESTA GROUP