مافی مرۆڤ: خۆپیشاندەرانی لوبنان روبەڕوی لێدان و دەستگیركردن بونەتەوە

- 1/17/2020 9:02:00 PM 1198 جار خوێندراوەتەوە

خەندان-

رێكخراوی جیهانی مافی مرۆڤ رایگەیاند، هێزە ئەمنییەكانی لوبنان بە شێوازێكی توندوتیژ مامەڵەیان لەگەڵ خۆپیشاندەرانی لوبناندا كردوە، داوای لە وەزارەتی ناوخۆی ئەو وڵاتەش كرد لێپێچینەوە لە كەسانی بەرپرسیار بكات.

لە راپۆرتێكیدا كە دوێنێ پێنجشەممە بڵاویكردوەتەوە، رێكخراوی جیهانی مافەكانی مرۆڤ رایگەیاند "لە خۆپیشاندانەكانی 15 كانونی دوەمی ئەم مانگەدا لە بەیروت-ی پایتەختی لوبنان، هێزە ئەمنییەكان و پۆلیس ئازاری خۆپیشاندەرانیان داوە و ژمارەیەكیشی زیندانیكردوە".

لەو خۆپیشاندانانەی 15ی ئەم مانگەدا، خۆپیشاندەرانی لوبنان بە مەبەستی ئازادكردنی 57 خۆپیشاندەر كە لە شەوی رابردودا دەستگیركرابون، روبەڕوی هێزە ئەمنییەكان بونەوە و لە ئەنجامدا پێكدادانێكی توند لەنێوانیاندا رویدا.
ئازاری خۆپیشاندەرانیان داوە و ژمارەیەكی زۆر لەوانە شوێنەواری ئەشكەنجە بە جەستەیانەوە دیاربوە

بەگوێرەی زانیارییەكان، هێزە ئەمنییەكان و پۆلیس بە غازی فرمێسكڕێژ ئازاری خۆپیشاندەرانیان داوە و ژمارەیەكی زۆر لەوانە شوێنەواری ئەشكەنجە بە جەستەیانەوە دیاربوە، لانیكەم 55 خۆپیشاندەریشیان دەستگیركردوە.

هەر لەو پێكدادانانەدا، هەشت رۆژنامەنوس كە سەرقاڵی گواستنەوەی دیمەنەكان و زانیارییەكانی نێو خۆپیشاندانەكە بون، لە لایەن هێزە ئەمنییەكانەوە روبەڕوی ئەشكەنجە بونەتەوە و سێ لەوانەش بۆ ماوەیەكی كاتی دەستبەسەركراون.

جۆ ستۆرك، جیگری بەڕیوەبەری مافی مرۆڤی جیهانی لە رۆژهەڵاتی ناوەڕاست لەوبارەیەوە رایگەیاند "ئاستی توندوتیژییەكان دژ بە خۆپیشاندەران جێگەی پەسەندكردن نیە و پێویستە بە زوترین كات و بە خێرایی و شەفافی لێپێچینەوە لەو هێزانە بكرێت كە توندوتیژییەكانیان ئەنجامداوە".

ئەو رێكخراوە، چاویكەوتوە بە شەش لە خۆپیشاندەرەكان و سێ رۆژنامەنوس كە شایەتحاڵی روداوەكانی 15ی ئەم مانگە بون لە بەیروت و دیمەنی تۆماركراوی راستەوخۆیان خستوەتە بەردەم رێكخراوەكە.

خۆپیشاندانەكانی لوبنان، هاوشان لەگەڵ خۆپیشاندانەكانی عێراق لە مانگی تشرینی یەكەمی ساڵی رابردوەوە دەستیپێكردوە و خۆپیشاندەران داوادەكەن چینی سیاسی و دەسەڵات بە تەواوی دوربكەونەوە و حكومەتێكی نوێی دور لەوان پێكبهێنرێت.


نیشانەکردن :

#لوبنان

Copyright © 2016 Xendan.org all rights reserved

designed and developed by AVESTA GROUP