خەندان پۆستە نوێیەكەی لیوا عەبدولخالق تەلعەت ئاشكرادەكات

- 1/15/2020 10:00:00 PM 82761 جار خوێندراوەتەوە

خەندان-

دوای ئەوەی ئەمڕۆ بەڕێوەبەری پۆلیسی هەولێر بەفەرمانی سەرۆكی حكومەت گۆڕا، بەگوێرەی زانیارییەكانی خەندان لیوا عەبدولخالق تەلعەت دەكرێتە نوێنەری حكومەتی هەرێم لە سەركردایەتی ئۆپراسیۆنە هاوبەشەكانی عێراق كە دامەزراوەیەكی نوێیەو بارەگاكەی لەناوچەی سەوز دەبێت لە بەغداد.

بەڵێ وەك نوێنەری حكومەتی هەرێم لە سەركردایەتی ئۆپراسیۆنە هاوبەشەكانی عێراق دانراوم و هەفتەی ئایندە دەستبەكاردەبم

 

لەو بارەیەوە لە لێدوانێكی تایبەتدا بۆ خەندان، لیوا عەبدولخالق تەلعەت، بەڕێوەبەری پێشوی پۆلیسی هەولێر هەواڵەكەی پشتڕاستكردەوە و رایگەیاند،"بەڵێ وەك نوێنەری حكومەتی هەرێم لە سەركردایەتی ئۆپراسیۆنە هاوبەشەكانی عێراق دانراوم و هەفتەی ئایندە دەستبەكاردەبم".

بارەگای ئەم دامەزراوە نوێیەی لەناوچەی سەوز دەبێت لە بەغداد

 

عەبدولخالق تەلعەت وتیشی،"ئەمە دامەزراوەیەكی نوێیە، پێكهاتوە لە سەركردایەتیەكی هێزە ئەمنیەكانی عێراق، نوێنەری سەركردایەتی هێزە وشكانییەكان و ئاسمانییەكان و ئاوییەكان و دژەتیرۆر و حەشدی شەعبی، منیش وەك نوێنەری حكومەتی هەرێم ئەو پۆستەم پێدراوە".

راشیگەیاند،"بارەگای ئەم دامەزراوە نوێیەی لەناوچەی سەوز دەبێت لە بەغداد"

پێشتر سەرچاوەیەك لە بەڕێوەبەرایەتی پۆلیسی هەولێر بە خەندان-ی راگەیاند،"ئەمڕۆ چوارشەممە بە بڕیاری مەسرور بارزانی، سەرۆكی حكومەتی هەرێم لەسەر راسپاردەی رێبەر ئەحمەد، وەزیری ناوخۆ، عەمید دلێر نەجات یاسین نەجاڕ، لە شوێنی عەمید عەبدولخالق تەلعەت، كرایە بەڕێوەبەری پۆلیسی هەولێر.

پێشتر دلێر نەجات، پلەی عەقیدی هەبوە و ئەمڕۆ بەر لەوەی فەرمانی دەستبەكاربونی وەك بەڕێوەبەری پۆلیسی هەولێر بۆ دەربكرێت، وەزیری ناوخۆ بە یاوەری فرسەت سۆفی، لەسەر راسپاردەی سەرۆكی حكومەت پلەكەیان بەرزكردوەتەوە بۆ عەمید

هەر بەگوێرەی زانیارییەكانی ئەو سەرچاوەیە، پێشتر دلێر نەجات، پلەی عەقیدی هەبوە و ئەمڕۆ بەر لەوەی فەرمانی دەستبەكاربونی وەك بەڕێوەبەری پۆلیسی هەولێر بۆ دەربكرێت، وەزیری ناوخۆ بە یاوەری فرسەت سۆفی، لەسەر راسپاردەی سەرۆكی حكومەت پلەكەیان بەرزكردوەتەوە بۆ عەمید و دواتر كراوە بە بەڕێوەبەری پۆلیسی هەولێر.

هەر بەگوێرەی زانیارییەكان دلێر نەجات، خاوەنی بڕوانامەی بەكالۆریۆسە لە زانستەكانی پۆلیس و یەكێكە لە یەكەمەكانی كۆلێژی پۆلیسی هەولێر.



Copyright © 2016 Xendan.org all rights reserved

designed and developed by AVESTA GROUP