خه‌ندان زانیاری نوێ لەبارەی خانه‌نشینی هێزه‌كانی ناوخۆ بڵاوده‌كاته‌وه‌

- 1/15/2020 10:01:00 AM 56692 جار خوێندراوەتەوە

خەندان-

سه‌رۆكی لیژنه‌ی دارایی له‌ په‌رله‌مانی كوردستان جه‌خت له‌سه‌ر زیادكردنی موچه‌ی خانه‌نشینی هێزه‌كانی ناوخۆ ده‌كاته‌وه‌ و رایده‌گه‌یه‌نێت، له‌ناو پڕۆژه‌یاسای چاكسازی به‌ڵێنه‌كه‌ی حكومه‌تیان بۆ زیادكردنی موچه‌كانیان جێگیركردوه‌.

زیاد جه‌بار، سه‌رۆكی لیژنه‌ی دارایی په‌رله‌مانی كوردستان به‌خه‌ندان-ی راگه‌یاند، "وه‌ك لیژنه‌ی دارایی له‌گه‌ڵ سه‌رۆكایه‌تی حكومه‌ت گفتوگۆمان كرد، دو بژاردە هه‌یه‌ بۆئه‌وه‌ی موچه‌ی خانه‌نشینانی هێزه‌كانی ناوخۆ زیاد بكرێت".
بژاردەی یه‌كه‌م ئه‌وه‌یه‌، له‌ماوه‌یه‌كی نزیكدا حكومه‌ت یاسایه‌كی خانه‌نشینی یه‌كگرتوی هه‌رێم ده‌نێرێته‌ په‌رله‌مان

 

ئاماژەی بەوەشکرد، "بژاردەی یه‌كه‌م ئه‌وه‌یه‌، له‌ماوه‌یه‌كی نزیكدا حكومه‌ت یاسایه‌كی خانه‌نشینی یه‌كگرتوی هه‌رێم ده‌نێرێته‌ په‌رله‌مان، بژاردەی دوه‌میش، له‌ئه‌نجامی جێبه‌جێكردنی یاسای خانه‌نشینی چ پاره‌یه‌ك ده‌گه‌ڕێته‌وه‌ بخرێته‌ سه‌ر موچه‌ی خانه‌نشینان و له‌و روه‌شه‌وه‌، به‌ڵێنمان له‌حكومه‌ت وه‌رگرتوه‌و به‌بڕگه‌ی 15 له‌ناو پرۆژه‌یاسای چاكسازی جێگیرمان كردوه‌".

دوای دو رۆژ لە کۆبونەوە و گفتوگۆکردنی چڕ، بەرەبەیانی دوێنێ سێشەممە پەرلەمانی کوردستان خوێندنەوەی دوەمی بۆ پڕۆژە یاسای چاکسازی تەواوکرد و بڕیارە سبەی پێنجشەممە دوای خوێندنەوەی سێیەم دەنگ لەسەر پڕۆژە یاساکە بدرێت.
له‌ڕێگه‌ی ئه‌و بڕه‌ پاره‌یه‌ی له‌ئه‌نجامی جێبه‌جێكردنی یاسای چاكسازی ده‌مێنێته‌وه‌، موچه‌ كه‌مه‌كانی پێبه‌رزده‌كرێته‌وه‌

 

زیاد جه‌بار رونیکردەوە، "له‌ڕێگه‌ی ئه‌و بڕه‌ پاره‌یه‌ی له‌ئه‌نجامی جێبه‌جێكردنی یاسای چاكسازی ده‌مێنێته‌وه‌، موچه‌ كه‌مه‌كانی پێ به‌رزده‌كرێته‌وه‌، به‌جۆرێك موچه‌ی خانه‌نشینان له‌ 400 هه‌زار دینار كه‌متر نه‌بێت".

بەهۆی ئەوەی به‌شێكی زۆری موچه‌ی هێزه‌كانی سه‌ر به‌وه‌زاره‌تی ناوخۆ په‌یوه‌ست كراوه‌ به‌ ده‌رماڵه‌، له‌كاتی خانه‌نشینكردنیاندا موچه‌ی بنه‌ڕه‌تیان هه‌ژمار ده‌كرێت، به‌وه‌ش موچه‌ی خانه‌نشینیه‌كه‌یان له‌ 400 هه‌زار دینار كه‌متر ده‌بێت.


Copyright © 2016 Xendan.org all rights reserved

designed and developed by AVESTA GROUP