مەكتەب سیاسییەكی كۆمەڵی ئیسلامی لەسەر بارزانی وەڵامی حەسەن نەسروڵا دەداتەوە

- 1/13/2020 10:34:00 PM 106904 جار خوێندراوەتەوە

خەندان-

محەمەد حەكیم، ئەندامی مەكتەبی سیاسی كۆمەڵی ئیسلامی كوردستان پەیامێكی ئاراستەی حەسەن نەسروڵا كردو رایگەیاند،"دژ بە ئیسرائیل ھەبویت و رۆڵت بینیوە، بەڵام دژایەتی سونەیشت لە لوبنان و عێراق و سوریا کردوە!"

محەمەد حەكیم لە نوسینێكدا وەڵامی حەسەن نەسروڵای داوەتەوە و دەڵێت،"راستە جەنەڕاڵ سلێمانی پشتیوانتان بو، پشتیوانی حەماس و جیھادیش بو، دژی ئیسرائیل .. راستە ھاوکاری عێراق و کورد بو لە شەڕی داعش و حەقتە نیگەران بیت بە نەمانی"

دەشڵێت،"کورد میللەتێکی بێوەفا نییەو چاکەی خەڵکی لە بەرچاوە، من خۆم بیستومە کە کاک مەسعود باسی کردوەو وتویەتی: لە دوای گرتنی مەخمور، سلێمانی فریاکەوت، بەڵام ئێمەیەک کە ئێوە مانان دەوڵەتمان پێڕەوا نابینن و خۆمان مەزڵوم و ژێر دەستەین، کەی ئاستی ئەوەین و چیمان ھەیە تا تۆڵەی سلێمانی لە ئەمریکا بكەینەوە؟"
 ئەی خۆت بۆ نافەرموی لە بەرژەوەندی ئەمریکا بدەیت لە بەیروت

 

ئەو مەكتەب سیاسییەی كۆمەڵی ئیسلامی راشیگەیاندوە،"سەیر ئەوەیە، بەڕێزتان لەو رۆژەوە عێراقییەکان ھان دەدەن تۆڵەبسێنن و حەز دەکەن عێراق ببێتە گۆرەپانی شەڕ، ئەی خۆت بۆ نافەرموی لە بەرژەوەندی ئەمریکا بدەیت لە بەیروت"

ئەوەشی خستۆتەرو،"ئاساییە رەخنە گرتن، بەڵام شێوازی دەڕبرینەکانت بەرانبەر مەسعود بارزانی، دورە لە ئەتەکیەتی قسەکردنی سەرکردەکان، ئەو قسەیەش گوایە دەڵێیت ئیرانیەکان وتویانە ”ان بارزانى كان يرتجف خوفا”، پێش تۆ بۆ ئیرانییەکان جوان نییە، دواتریش گەر وترابێت، بۆ تۆ جوان نییە بیگێریتەوە."

هەر لە وەڵامەكەیدا محەمەد حەكیم نوسیویەتی،"دواجار وێڕای تێبینی و نیگەرانی ئێمە لە باری ناوخۆی کوردستان و ئەدای بارزانی، بەڵام بارزانیش سەرکردەیەکی خەباتی رزگاریخوازی گەلی کوردە و لە شەڕی دژی داعش ڕۆڵی ھەبو، بەشی خۆم نەشمبیستوە شایەن بەو قسەیە بێت"

لەكۆتاییدا وتویەتی،"نازانم بۆ ئەوەندە ئاماژە بە کوردستان دەکەن، وەکو ئیسرائیلی دوەم وێنای دەکەن، لە کاتێکدا حەقە ئێوەومانان و باقی سەرکردە ئیسلامییەکانی دیكەی شیعەو سوننە، جاروبار ئاماژە بە مەزڵومیەتی میللەتی کورد بکەن و بە گاڵتەش بێت بڵێن: مافی ژیان و خۆبەڕێوەبردن و، گەر کرا بشڵێن: مافی دەوڵەتتان ھەیە"

 

نیشانەکردن :

#مەسعود بارزانی

Copyright © 2016 Xendan.org all rights reserved

designed and developed by AVESTA GROUP