هەواڵی ئەمڕۆ

ترەمپ: کیم جۆن ئون پیاوێکە خاوەنی قسەی خۆیەتی

- 1/1/2020 4:53:00 PM 2259 جار خوێندراوەتەوە


خەندان -                

سەرۆکی ویلایەتە یەکگرتوەکانی ئەمریکا رایگەیاند، رێبەری کۆریای باکور گرێبەستێکی لەبارەی داماڵینی چەکی ئەتۆمی لەگەڵ ئەمریکادا واژۆکردوە، لەو باوەڕەشدایە کە ئەو پیاوێکە پابەندی بەڵێنەکانی خۆی دەبێت.

چەند کاتژمێرێک پێش زەنگی ساڵی نوێ، میدیای فەرمی کۆریای باکور بڵاویکردەوە، کیم جۆن ئون رێبەری کۆریای باکور نەخشە بۆ بەردەوامبونی پەرەپێدانی چەکی ئەتۆمی دادەڕێژێت، بەڵام بواری گفتوگۆ لەگەڵ ویلایەتە یەکگرتوەکانی ئەمریکا بەکراوەیی دەهێڵێتەوە.
لەو باوەڕەدام کە ئەو پیاوێکە پابەندی بەڵێنەکانی خۆی دەبێت لە داهاتوشدا ئەو شتە روندەبێتەوە

لەوبارەیەوە دۆناڵد ترەمپ، سەرۆکی ویلایەتە یەکگرتوەکانی ئەمریکا بە رۆژنامەنوسانی راگەیاند، "کیم گرێبەستێکی لەبارەی داماڵینی چەکی ئەتۆمی لەگەڵ ئەمریکادا واژۆکردوە، لەو باوەڕەشدام کە ئەو پیاوێکە پابەندی بەڵێنەکانی خۆی دەبێت لە داهاتوشدا ئەو شتە روندەبێتەوە".

بۆ ماوەی چوار رۆژە کیم جۆن ئون، رێبەری کۆریای باکور سەرۆکایەتی کۆبونەوەکانی وڵاتەکەی لەگەڵ گەورە بەرپرسانی حزبی دەسەڵاتدار دەکات، ئەوە لەکاتێکدابو سەری ساڵی نوێی وەک دوا وادە بۆ ویلایەتە یەکگرتوەکانی ئەمریکا دانابو لە کەمکردنەوەی داواکاریەکانیان لەدانوستانەکانی نێوانیاندا.

لەدوای تەواوبونی ماوەی کۆتایی، رێبەری کۆریای باکور رایگەیاند، "چیتر هیچ رێگریەک نەماوە بۆ وەستاندنی چالاکییە ئەتۆمیەکان و تاقیکردنەوەی موشەکی بالیستی کیشوەربڕ".

رێبەری کۆریای باکور پەیمانیشدا بەردەوام دەبێت لە بەهێزترکردنی توانا ئەتۆمیەکانی وڵاتەکەی و بەشێوەیەکی فراوانتر، بەڵام لەگەڵ هەڵوێستی ویلایەتە یەکگرتوەکاندا دەیگونجێنێت، ئەگەر واشنتن نەرمی بنوێنێت  ئەوانیش چالاکییە ئەتۆمیەکان کەمتردەکەنەوە.



Copyright © 2016 Xendan.org all rights reserved

designed and developed by AVESTA GROUP