كەسایەتییەكی نزیك لە موقتەدا سەدر ئامانجی پشت خۆپیشاندانەكانی بەردەم باڵیۆزخانەی ئەمریكا ئاشكرادەكات

- 12/31/2019 8:09:00 PM 38618 جار خوێندراوەتەوە

خەندان-

كەسایەتییەكی نزیك لە موقتەدا سەدر ئامانجی پشت خۆپیشاندانەكانی بەردەم باڵیۆزخانەی ئەمریكا ئاشكرادەكات و رایدەگەیەنێت ئامانج لێی كۆتایی هێنانە بەو خۆپیشاندانانەی گەل لەپێناوی چاكسازیدا ماوەی سێ مانگە ئەنجامی دەدات.


 ئەو خۆپیشاندانە بە ئامانجی لەناوبردنی خۆپیشاندانە چاکسازی خوازەکەی ئێمەیە

پەیجی ساڵح محەمەد عێراقی کەسایەتی نزیک لە موقتەدا سەدر لە راگەیەنراوێکدا ئاماژەی بەوەشکردوە، "ئەمڕۆ بەشێک لە بەرپرسانی ملیشیاکان چونەتە سەر باڵیۆزخانەی شەیتانی گەورە (مەبەستی باڵیۆزخانەی ئەمریکایە) گوایە ئەوان پشتیوانی لە پیاوکوژەکان دەکەن کە مەبەستیان شۆڕشگێڕانە، ئەوەش ئاماژەی ئەوەیە ئەو خۆپیشاندانە بە ئامانجی لەناوبردنی خۆپیشاندانە چاکسازی خوازەکەی ئێمەیە، داواتان لێدەکەم پاریزگاری لە بەئاشتی هێشتنەوەی خۆپیشاندانەکان بکەن".

دڵ لە دڵ مەدەن کە دەبینن ناوچەی سەوز بۆ ئەوان کرایەوە و بۆ ئێوە داخراو بو

ئەوەش هاتوە، "دڵ لە دڵ مەدەن کە دەبینن ناوچەی سەوز بۆ ئەوان کرایەوە و بۆ ئێوە داخراو بو، ئێوە کە ئەمڕۆ لەبەر دەرگان سبەینێ گەل دەچێتە ناو".

ئێوە لە رێگەی سندوقەکانی دەنگدانەوە بچەنە ناوچەی سەوز، دڵنیاش بن گەندەڵی دواین هەناسەی خۆی دەدات

سەبارەت بە چارەسەری دۆخی عێراقیش ئەو کەسایەتییەی نزیک لە سەدر دەڵێ، "هەروەکو پێشوتریش داوامان کردوە پێویستە هەڵبژاردنێکی پێشوەختە بەڕێوەبچێت کە دەبێتە سەرەتای کۆتایی هێنان بە گەندەڵی و حزب حزبێنە، ئێوە لە رێگەی سندوقەکانی دەنگدانەوە بچەنە ناوچەی سەوز، دڵنیاشبن گەندەڵی دواین هەناسەی خۆی دەدات".

ئەوەش لەداوی ئەوە هات ئەمڕۆ خۆپیشاندان لەبەردەم باڵیۆزخانەی ئەمریکا لە عێراق بەڕێوەچو کە دەکەوێتە ناوچە سەوز و دواتر به‌شێك له‌ دیواری باڵیۆزخانه‌كه‌یان سوتاند، حه‌شدی شه‌عبیش له‌به‌یاننامه‌یه‌كدا ڕایگه‌یاند به‌هۆی ده‌ستدڕێژی پاسه‌وانانی باڵیۆزخانه‌كه‌و بۆمبی فرمێسك ڕێژه‌وه‌، زیاتر له‌ 20 خۆپیشانده‌ر برینداربون.

خۆپیشاندەرانی ئێمە لێرەیە و لە تەحریرەوە بەردەوام دەبێت، ئێمە هێچ پەیوەندییەکمان بە ناوچەوی سەوزەوە نیە

کەمێک لەمەوبەریش لە راگەیەنراوێکدا خۆپیشاندەران لەسەر بینای "چێشتخانە تورکیەکە" ئاماژەیان بەوەکردوە، "خۆپیشاندەرانی ئێمە لێرەیە و لە تەحریرەوە بەردەوام دەبێت، ئێمە هێچ پەیوەندییەکمان بە ناوچەوی سەوزەوە نیە".
هاوکات عەبدولکەریم خەڵەف وتەبێژی فەرماندەی گشتی هێزە چەکدارەکانی عێراق راگەیاند، "حکومەتی عێراق بەرپرسە لە پارێزگاریکردن لە باڵیۆزخانەکان و هێرشکردنە سەریان رەتدەکەینەوە".

نیشانەکردن :

#عێراق

Copyright © 2016 Xendan.org all rights reserved

designed and developed by AVESTA GROUP