مەراسیمێک بۆ ناساندنی کتێبی "شێخ حسێنی هەزار کانی" بەڕێوەچو

- 12/26/2019 10:54:00 PM 1349 جار خوێندراوەتەوە

خەندان- نیگار عومەر 

سەنتەری چالاکی ئاران لە شاری کەلار مەراسیمێکی بۆ ناساندنی کتێبێ "شێخ حسێنی هەزار کانی" کە لەنوسینی سمکۆ سابیرە ئەنجامدا.

سمکۆ سابیر، نوسەری کتێبی "شێخ حسێنی هەزار کانی" بەخەندان- ی راگەیاند، "ئەمڕۆ مەراسیمێکمان رێکخست بۆ ناساندنی کتێبی شێخ حسێنی هەزارکانی، کە ماوەیەکی زۆرە سەرقاڵی نوسینی ئەو کتێبەم، ئەم کتێبە باسی لە قوربانیدانی شێخ حسێنی هەزار کانی دەکات لە کارەساتی ئەنفالدا، هەروەها تەواوی ژیانی ئەو کەسایەتیە خراوەتەڕو".

شێخ حسێنی هەزار کانی، خەڵکی گوندی هەزار کانی بوە لەناوچەی گەرمیان، وەکو هەمو ئەو کەسانەی کە بەر شاڵاوی ئەنفال کەوتن شێخ حسێن و خانەوادەکەشی بەر شاڵاوێ ئەنفال کەوتن.

سمکۆ سابیر دەڵێت، "شێخ حسێن لەبەرئەوەی شێخێکی دیار ناوچەی گەرمیان بوە فەرمانی ئازادکردنی لە لایەن سەدام حۆسێنی بۆ هاتوە، بەڵام شێخ ئەم فەرمانەی رەتدەکاتەوە، داوادەکات هەمو ئەو خەڵکانەی لەگەڵی گیراوە ئازاد بکرێت، ئەو لەگەڵ خانەوادەکەیدا ئازاد نابێت بەتەنها".

باسی لەوەشکرد، "ئەم کتێبە باسی هەمو ژیان و قوربانیدانی ئەو پیاوە بەڕێزە دەکات، پێویستە  نەوەکانی داهاتو شێخ حسێنی هەزار کانی بناسن و قوربانیەکانی خەڵکی گەرمیان لەپرۆسەی ئەنفالدا بزانن چۆن بوە".



Copyright © 2016 Xendan.org all rights reserved

designed and developed by AVESTA GROUP