"بەشێک لە گوندنشینە عەربەکان هاوکاری داعش دەکەن"
بەرپرسێکی باڵای پێشمەرگە: بۆشایی ئەمنی لەنێوان سوپای عێراقی و هێزەکانی پیشمەرگەدا هەیە

- 12/11/2019 7:27:00 PM 4993 جار خوێندراوەتەوە

 خەندان - نیگار عومەر 


لەچەند ڕۆژی ڕابردودا چەکدارانی داعش جموجۆڵ و هێرشەکانیان  بۆسەر هێزەکانی پیشمەرگە وسوپای عێراق لەسنوری کوڵەجۆ و خانەقین وگوڵاڵە زیادیکردوە، بەرپرسێکی باڵای پێشمەرگەش دەڵێت، " بۆشایی ئەمنی لەنێوان سوپای عێراقی و هێزەکانی پیشمەرگەدا هەیە."
بۆشایی ئەمنی لەنێوان سوپای عێراقی و هێزەکانی پیشمەرگەدا هەیە

بەوهۆیەوه وەزارەتی پیشمەرگە هێزێکی تایبەتی لەلیوای شازدەی سەربە وەزارەتی پیشمەرگە ڕەوانەی ئەو سنورانە کردوە، بەوتەی فەرماندەکانی پیشمەرگە داعش لەلایەن بەشێکلە  گوندنشینە عەرەبەکانەوە هاوکاری دەکرێن بۆیە دەتوانن بونیان هەبێیت لەم ناوچانەدا.
هێزێکی تایبەتی بەرگری لەلیوای شازدە هێنرایە سنوری کوڵەجۆ و خانەقین و ئەو ناوچانەی کە ئەگەری جمجۆڵی داعشی تێدا ڕودەدات

لەوبارەیەوە، عەمید دلێر شکور، فەرماندەی لیوای سێی پیادەی هێزەکانی پێشمەرگە، بەخەندان-ی ڕاگەیاند، " بەهۆی ئەو هێرشانەی لە ماوەی چەند ڕۆژی ڕابردودا کرایە سەر لیوای سێی پیادە و  بۆ زیاتر پارێزگاریکردن لەم سنورە، هێزێکی تایبەتی بەرگری لەلیوای شازدە هێنرایە سنوری کوڵەجۆ و خانەقین و ئەو ناوچانەی کە ئەگەری جمجۆڵی داعشی تێدا ڕودەدات.
ئەو هێزەی هێنراوە، وەک هێزێکی پشتیوانی لەم سنورەدا بڵاوەیان پێکراوە 

وتیشی ئەو هێزەی هێنراوە، وەک هێزێکی پشتیوانی لەم سنورەدا بڵاوەیان پێکراوە بۆ هەر ئەگەرێکی هێرشکردنی چەکدارانی داعش و روبەروبونەوەیان.

بەوتەی عەمید دلێر، ئەم هێزه کۆمەڵێ چەکی قورس و ئۆتۆمبیلی گولەنەبڕیان پێیە کە دەتوانرێت لەکاتی هەر هێرشێکدا بچن بەهانای پیشمەرگەوە لەم سنورە"

ئەوەشی ڕونکردوە، " لەدوای ئەو هێرشانەی کە ڕویاندا  خاڵەکانی بەرگریکردن توندوتۆڵ کراونەتەوە بو ڕوبەڕوبونەوەی هەر ئەگەرێکی هێرشکردنی داعش هێزیکی زیاتر پیشمەرگە بۆ پارێزگاری  لەم سنوره جێگیر کراوە"

لە ئیستادا هێزەکانی پیشمەرگە سەرقاڵی بەهێزکردنی خاڵەکانی بەرگریکردنن لەسنوری خانەقین و کوڵەجۆ.

لای خۆشییەوە، عەمید جمهور ڕوستەم، جێگری لیوای سێی هێزەکانی پیادە، بەخەندان-ی ڕاگەیاند، " چەکدارانی داعش بەهۆی ئەو بۆشایە ئەمنیەی کەلەناوچەکەدا هەیە لەنێوان سوپای عێراقی و هێزەکانی پیشمەرگە وایکردوه داعش بتوانیت دزە بکاته ئەم ناوچانە.

ئەو بەرپرسە باڵایەی داعش راشیگەیاند،  کۆی گشتی ئەو چەکدارانەی داعش لەسنوری گوندەکانی (دەکە و سەوزبڵاخ و چەمی سیروان) هەن نزیکەی 70 چەکدار دەبن، بەڵام چەکی قورسیان پێیە وەک کامێرای حەراری کە ئەمەش لە دورەوە دەتوانیت قەناس بگریت و ئامانج بپێکێیت."

باسی لەوەشکرد، " داعش لەلایەن گوندە  عەرەب نشینەکانەوە هاوکاری دەکرێن چونکە شوێنی مانەوەیان لەنێو ئەو داستانەدا چڕەدا زەحمەتە و ئەگەر هاوکاری نەکرێن ناتوانن بمێنەوە."

ئاماژەی بەوەش کرد، " بەهۆی هێرشەکانی ئەمدواییەوە، کوردنشینانی ئەو گوندە چۆڵیان کردوە و تەنها عەرەبە سونەکان ماونەتەوە لە گوندەکەدا."

هێزەکانی پیشمەرگەی کوردستان  دڵنیای دەدەن بە هاوڵاتیانی سنوری خانەقین و کوڵەجۆ کە پارێزگاری لە دانیشتوانی ناوچەکە دەکەن بەبێ جیاوازی، ڕوبەڕوی هەمو هێرشێکی چەکدارانی داعش دەبنەوە، هەروەک خۆیان دەڵین هێزێکی زۆر بەچەکی قورسەوە لە خاڵی بەرگریدا لە ئامادە باشیدان.


Copyright © 2016 Xendan.org all rights reserved

designed and developed by AVESTA GROUP