"وتوێژ لەگەڵ حکومەتی کۆماری ئیسلامی شتێکی زۆر ئاساییە"
خالید عەزیزى: لە هەر گۆڕانکارییەکدا خودموختاری بۆ رۆژهەڵات چەسپێنراوە

- 12/9/2019 9:41:00 AM 1921 جار خوێندراوەتەوە

خەندان-

سکرتێرى حزبى دیموکراتى کوردستان (حدک) رایدەگەیەنێت، ئەوان وەکو پارتێکی سیاسی و لە پێناوی بەرەوپێشبردنی دۆسیەی نەوەتەوەیدا بەلایانەوە ئاساییە گفتوگۆ لەگەڵ حکومەتی ئێستای ئێرانیشدا بکەن، دەشڵێت، "بە گوێرەی رێککەوتنمان لەگەڵ لایەنەکانی ئێران لە هەر گۆڕانکارییەکدا خودموختاری بۆ رۆژهەڵات چەسپێنراوە".

خالید عەزیزى، سکرتێرى حزبى دیموکراتى کوردستان (حدک) بە رۆژنامەی زەمەنی راگەیاندوە، "لەماوەى 40 ساڵى رابردودا ناڕەزایەتیەکانى ئێران ناوە ناوە خۆپیشاندان لە ئێراندا هەبوە لە شارى جۆراوجۆر، ئەو خۆپیشاندانانە زۆرینەیان پەیوەندیان بە دو شتەوە هەبوە، یەکەم لایەنى ئابورى ژیانى خەڵک کە گرانى هەیەو دەوڵەت یاری دەکات بە ژیانى خەڵک، ئێران وڵاتێکى بە پیت و بەرەکەتە، بەڵام زۆربەى زۆرى داهاتەکەى بۆ خەرجى خزمەتگوزارییەکانى خەڵک نییە، بەڵکو بەزۆری بۆ ئاژاوەگێڕییە لە ناوچەکەدا کە بەشى زۆرى بۆ ئەمە تەرخانکردوە، بەڵام لەجیاتى دابینکردنى ئازادى سیاسى بە زیندان و سەرکوتکردن‌و لەسێدارەدان وەڵامى خەڵکیان دایەوە، بۆیە ئەم خۆپیشاندانانەى ئەم دواییە بێدەنگ نەبون".
ئێران وەڵامدەرەوەى ناڕەزایەتى و داخوازییەکانى خەڵک نییە، داخوازییە ئابورى و سیاسى و کۆمەڵایەتیەکانى خەڵکى بۆ جێبەجێ نابێت

 

ئاماژەی بەوەشکردوە، "ئێران وەڵامدەرەوەى ناڕەزایەتى و داخوازییەکانى خەڵک نییە، داخوازییە ئابورى و سیاسى و کۆمەڵایەتیەکانى خەڵکى بۆ جێبەجێ نابێت و خەمى لێ ناخوات و جێبەجێى ناکات لە ئەنجامدا دۆخەکە وەکو خۆى دەمێنێتەوە، بۆیە لەداهاتوشدا ئەو خۆپیشاندان و ناڕەزایەتیانە دەست پێدەکەنەوە، ئەمە لایەنێکى دیکەشى هەیە کە خەڵک لە ئێران ترسیان شکاوە ئەو تابۆیەى رژێمى ئێران هەیبو رۆیشت و نەما، ئێرانیش خۆى هەر لەوە نیگەرانە کە تابۆى شکاوەو ترسى نەماوە لاى خەڵک، بۆیە لە داهاتودا ناڕەزایەتیەکان بە هۆکارى جیاجیا سەر هەڵدەدەنەوە".
وتوێژ لەگەڵ حکومەتى مەرکەزى لەگەڵ حزبێکى سیاسی کە لە خەبات و تێکۆشاندا بێت شتێکى زۆر ئاساییە، پێویست ناکات ئێمە لەوە نیگەران بین

 

سەبارەت بە ئامادەیی حزبەکانی رۆژهەڵاتیش بۆ گفتوگۆکردن حکومەتی ئیستای تاران خالید عەزیزی باسی لەوەکردوە، "وتوێژ لەگەڵ حکومەتى مەرکەزى لەگەڵ حزبێکى سیاسی کە لە خەبات و تێکۆشاندا بێت شتێکى زۆر ئاساییە، پێویست ناکات ئێمە لەوە نیگەران بین، چونکە ئەگەر تۆ حزب بیت و سیاسەت بکەیت گفتوگۆش دەکەیت، بەڵکو ئەوەى گرنگە ئەوەیە چۆن مامەڵە لەگەڵ کێشەکە دەکەیت، ئەگەر سەیر بکەیت لە مێژوى حزبەکانى باشورى کوردستانیشدا بەردەوام گفتوگۆیان لەگەڵ حکومەتى عێراق هەبوە، کوردستانى عێراق و ئێران زۆر لەیەک دەچن لە زۆر بابەتەوە".
تێدەکۆشین لەسەر چۆنیەتى و شێوازى دەسەڵاتى سیاسى داهاتوى ئێران پێشتر رێککەوتنى بۆ بکەین

 

لەبارەی سیستەمی ئایندەی ئێرانیش سکرتێرى حزبى دیموکراتى کوردستان دەڵێت، "ئێمە تێدەکۆشین لەسەر چۆنیەتى و شێوازى دەسەڵاتى سیاسى داهاتوى ئێران پێشتر رێککەوتنى بۆ بکەین، رێککەوتنەکەش ئەوەیە دان بەوەدا بنرێت و دیکۆمێنتى نوسراو هەبێت کە داهاتووى کورد لە ئێراندا چۆن دەبێت، واتە دەبێت بە رێکەوتنى پێشوەختە لەسەر سیستەمى دیموکراسى بکەین، نەک قەزییەى کوردى بسپێرین بەوەى کە لەدواى نەمانى رژێمى ئێران هەڵبژاردن بکرێت و دوایی ئەنجومەنێک دروست بکرێت و باسى ئەوە بکەین کورد مافى چییەو چۆن دەبێت، ئێمە ئەمە ناکەین، چونکە ئەوکاتە ئێمە دەبین بە کەمینە، لە جەوێکى ئینقیلابی و ئاڵوگۆڕیدا کەمینە نەتوانێت بەرامبەر زۆرینەیەکی بەهێزدا داواکارییەکانى جێگیر بکات".


Copyright © 2016 Xendan.org all rights reserved

designed and developed by AVESTA GROUP