بەپەلە

پەرلەمانتارێكی توركیا: ئەردۆگان لە ئیستانبوڵ پڵنگە و لە لەندەن پشیلە

- 12/8/2019 9:14:00 PM 1869 جار خوێندراوەتەوە

خەندان-

ئەندام پەرلەمانێكی سەر بە پارتی گەلی كۆماری، گەورەترین پارتی ئۆپۆزسیۆن لە توركیا سەبارەت بە جیاوازی هەڵوێستەكانی سەرۆك كۆماری وڵاتەكەی رایگەیاند "دو هەڵوێستی تەواو جیاوازی هەبو لە ئیستانبوڵ و لەندەن".

پێش ئەوەی بچێتە لەندەن وەك پڵنگێك بە توندی وەڵامی ماكرۆن-ی دایەوە

ئۆزگیور ئۆزێل، یەكێك لە پەرلەمانتارانی پارتی گەلی كۆماری، گەورەترین پارتی ئۆپۆزسیۆنی توركیا سەبارەت بە هەڵوێست و كاردانەوە جیاوازەكانی رەجەب تەییب ئەردۆگان، سەرۆك كۆماری وڵاتەكەی بەرامبەر وتە توندەكانی ئیمانوێل ماكرۆن، سەرۆكی فڕەنسا لەمیانی لێدوانێكی رۆژنامەوانیدا رایگەیاند "پێش ئەوەی بچێتە لەندەن بۆ بەشداریكردن لە لوتكەی ناتۆ، ئەردۆگان وەك پڵنگێك بە توندی وەڵامی ماكرۆن-ی دایەوە".

ئەردۆگان رازیبو بەو پلانەی ناتۆ كە یەكینەكانی پاراستنی گەل (یەپەگە)ی بە تێرۆریست نەناساند

ئاماژەی بەوەشكرد "لەكاتێكدا ئیمانوێل ماكرۆن لە لەندەن توركیای بە كاركردن لەگەڵ داعش تۆمەتباركرد و دواتریش ئەردۆگان رازیبو بەو پلانەی ناتۆ كە یەكینەكانی پاراستنی گەل (یەپەگە)ی بە تێرۆریست نەناساند، وەك پشیلەیەك بو".

هاوكات ئەو پەرلەمانتارە وتی "وتەكانی سەرۆكی فرەنسا و نەبونی وەڵام و كاردانەوە لەلایەن ئەردۆگانەوە لە لەندەن، پێچەوانەی لێدوانە توندەكانی بو كە لە ئیستانبوڵ دژ بە ماكرۆن ئەنجامیدا".

راشیگەیاند "ئێمە پێمان وایە ئەو جۆرە هەڵسوكەوتانە، لاوازییە بۆ دەنگی توركیا، ئێمە وەك پارتی گەلی كۆماری كە پارتێكی ئۆپۆزسیۆنین هەڵوێستمان بەرامبەر ماكرۆن هیچ نەگۆڕاوە، بەڵام وەك بینیمان، پارتی داد و گەشەپێدان بە سەرۆكایەتی ئەردۆگان، لە ئیستانبوڵ پڵنگ و لە لەندەنیش پشیلە بو".



Copyright © 2016 Xendan.org all rights reserved

designed and developed by AVESTA GROUP