حزبی ده‌عوه‌ داوای كۆتایهێنان به‌داخستنی ڕێگاو ناوه‌نده‌كانی خوێندن ده‌كات

- 12/8/2019 4:10:00 PM 900 جار خوێندراوەتەوە

خەندان-

له‌به‌یاننامه‌یه‌كدا حزبی ده‌عوه‌ داوای كۆتاییهێنان به‌داخستنی ناوه‌نده‌كانی خوێندن و داخستنی ڕێگه‌وبانه‌كان ده‌كات و ڕاشیده‌گه‌یه‌نێت، ناكرێت چیتر قبوڵ بكرێت دۆخه‌كه‌ به‌و شێوه‌یه‌ بمێنێته‌وه‌، چونكه‌ ده‌بێته‌ هۆی زیادكردنی تیرۆری فكری و زانستی.
داواكاری خۆپیشانده‌ران بۆ چاكسازی و گۆڕانكاری له‌به‌رژه‌وه‌ندی عێراق و عێراقیه‌كاندایه‌

 

حزبی ده‌عوه‌ له‌به‌یاننامه‌یه‌كدا پشتیوانی خۆی بۆ خۆپیشاندانی ئاشتیانه‌ له‌چوارچێوه‌ی ده‌ستوری عێراق دوپاتكردۆته‌وه‌و جه‌ختیشیكردۆته‌وه‌ له‌سه‌رئه‌وه‌ی، داواكاری خۆپیشانده‌ران بۆ چاكسازی و گۆڕانكاری له‌به‌رژه‌وه‌ندی عێراق و عێراقیه‌كاندایه‌، دوریشه‌ له‌توندوتیژی و تێكدانی ئه‌منیه‌تی هاوڵاتیان و به‌رژه‌وه‌ندیه‌كانی داموده‌زگاكانی ده‌وڵه‌ت و په‌كخستنی دامه‌زراوه‌كان".

به‌داخه‌وه‌ به‌شێك له‌خۆپیشانده‌ران ڕێگه‌وبانه‌كانیان داخستوه‌و بۆته‌ هۆی په‌ككه‌وتنی داموده‌زگاكانی ده‌وڵه‌ت و كه‌رتی تایبه‌ت

 

هەر لەو بەیاننامەكەدا، ئەو حزبە كە نوری مالیكی، سەرۆكایەتی دەكات، نیگه‌رانی خۆشی بۆ زیانه‌ گیانی و مادیه‌كان ده‌ربڕیوه‌و ئه‌وه‌شیخستۆته‌ڕو، به‌داخه‌وه‌ به‌شێك له‌خۆپیشانده‌ران ڕێگه‌وبانه‌كانیان داخستوه‌و بۆته‌ هۆی په‌ككه‌وتنی داموده‌زگاكانی ده‌وڵه‌ت و كه‌رتی تایبه‌ت، ڕاگرتنی ده‌وامی فه‌رمانگه‌كان به‌تایبه‌ت خوێندنگه‌كان و ناوه‌نده‌كانی په‌روه‌رده‌ قبوڵ نه‌كراوه‌ به‌هه‌ر بیانویه‌ك بێت.

حزبی ده‌عوه‌ داواش له‌خۆپیشانده‌رانی پارێزگاكانی عێراق ده‌كات، هۆكاربن بۆ كردنه‌وه‌ی ناوه‌نده‌كانی زانكۆو په‌روه‌رده‌ و ڕاشیگه‌یاندوه‌، ئه‌و ناوه‌ندانه‌ به‌دوربگرن له‌ململانێ و ده‌رگاكانیان دامه‌خه‌ن، ئه‌و ناوه‌ندانه‌ موڵكی گشتیین و ناوه‌ندێكن بۆ دروستكردنی نه‌وه‌ی داهاتو، به‌به‌رده‌وامی ده‌وامكردنیشیان ده‌یسه‌لمێنێت كه‌ خۆپیشانداران له‌به‌رپرسیارێتیدان و هۆشیارییان هه‌یه‌ به‌رامبه‌ر به‌زانست و ڕۆشنبیری.



Copyright © 2016 Xendan.org all rights reserved

designed and developed by AVESTA GROUP