یەکێتی ئەوروپا: پاراستنی رێککەوتننامە ئەتۆمیەکەی 2015 ئەرکی سەرشانی هەمو لایەکە

- 12/8/2019 3:28:00 PM 983 جار خوێندراوەتەوە

خەندان - 

بەرپرسی سیاسی کاروبارەکانی دەرەوەی یەکێتی ئەوروپا رایگەیاند، پاراستنی رێککەوتننامە ئەتۆمیەکەی ساڵی 2015 -ی نێوان ئێران و وڵاتانی کاریگەری جیهان، بەرپرسیاریەتیەکە کە پێویستە هەمو لایەنەکان لەئەستۆی خۆیانی بگرن.
زۆر گرنگە رێگری بکەین لە بڵاوبونەوەی چەکی ئەتۆمی بۆ پاراستنی ئاسایشی جیهان

جۆسپ بۆڕل، بەرپرسی سیاسی کاروبارەکانی دەرەوەی یەکێتی ئەوروپا لەتویتێکدا لەهەژماری تایبەتی خۆی لەتۆڕی کۆمەڵایەتی تویتەر بڵاویکردەوە"زۆر گرنگە رێگری بکەین لە بڵاوبونەوەی چەکی ئەتۆمی بۆ پاراستنی ئاسایشی جیهان، هەمو لایەیەکیش بەرپرسن لە پارێزگاریکردنی ئەو رێککەوتنە ئەتۆمیەی ساڵی 2015، کە لەگەڵ ئێراندا واژۆی لەسەرکراوە".
من وەک رێکخەری سیاسی کاروباری دەرەوەی یەکێتی ئەوروپا داوا لە هەمو لایەنەکان دەکەم، بەتەواوەتی پابەندبن بە رێککەوتنەکەوە

وتیشی"من وەک رێکخەری سیاسی کاروباری دەرەوەی یەکێتی ئەوروپا داوا لە هەمو لایەنەکان دەکەم، بەتەواوەتی پابەندبن بە رێککەوتنەکەوە، پاڵپشتی هەر هەنگاوێک دەکەم کە دەبێتە هۆی کەمکردنەوەی رێوشوێنە نەرێنیەکان لەو بارەیەوە.

شەشی ئەم مانگە لیژنەی هاوبەشی رێککەوتننامە ئەتۆمیەکە کۆبونەوەی چواردەهەمینی خۆی لە ڤییەنا سازکرد، بۆ جێبەجێکردنی بەندەکانی ئەو رێککەوتننامەیە.

لەکۆتایی کۆبونەوەکەدا لیژنە هاوبەشەکە لە راگەیەنراوێکدا رایگەیاند"هەمو لایەنەکانی رێککەوتننامەکە بەرپرسیارن لەپاراستنی رێککەوتننامە ئەتۆمیەکە، داواش لەهەمو بەشداربوانی کۆبونەوەکە کرا هەوڵەکانیان چڕبکەنەوە بۆ ئەو مەبەستە".

ساڵی رابردو ئەمریکا لە رێککەوتنامەی ئەتۆمی ساڵی 2015 لەگەڵ ئێران کشایەوە و دوبارە بە چەند قۆناغێک سەپاندنی سزاکانی بەسەر ئەو وڵاتەدا دەستپێکردەوە، لەبەرامبەریشدا تاران بەچوار قۆناغ پابەنیەکانی وڵاتەکەی بەرێککەوتننامە ئەتۆمیەکەوە کەمکردۆتەوە.


Copyright © 2016 Xendan.org all rights reserved

designed and developed by AVESTA GROUP