جێفری: شانازی دەكەین بە قوربانیدانی کورد بەرامبەر داعش
مەسرور بارزانی: ئەمریکا پابەندە بەو دۆستایەتیە مێژویەی لەگەڵ هەرێم هەیەتی

- 12/7/2019 12:39:00 PM 1768 جار خوێندراوەتەوە

خەندان-

کۆبونەوەی مەسرور بارزانی، سەرۆکی ئەنجومەنی وەزیرانی هەرێمی کوردستان و جەیمس جێفری، نێردەی تایبەتی ئەمریکا بۆ کاروباری سوریا کۆتاییهات، دوای کۆبونەوەکەش لە لێدوانێکدا بۆ رۆژنامەنوسان باسیان لە ناوەڕۆکی کۆبونەوەکەیان کرد.

مەسرور بارزانی، سەرۆکی ئەنجومەنی وەزیرانی هەرێمی کوردستان رایگەیاند، "حکومەتی ئەمریکا پابەندە بەو دۆستایەتیە مێژویەی لەگەڵ هەرێمی کوردستان هەیەتی".

هاوکات جەیمس جێفری بەرۆژنامەنوسانی راگەیاند، "خۆشحاڵم كە لەگەڵ ھاوڕێیانم لە كوردستانی عێراق كۆدەبمەوە، شانازی دەكەین بە قوربانیدانی ئێوە بەرامبەر داعش، ھیوادارم بەردەوام بین لە ھاوكاریی و ھەماھەنگی لەگەڵ یەكتر، نەك ھەر لە عێراق بەڵكو لە تەواوی ناچەكە".

ئاماژەی بەوەشکرد، "لە كۆبونەوەكەماندا بە ئامادەبونی چەند فەرماندەیەك باسمان لەوە كرد كە ھاوكارییەكانمان بۆ شەڕی دژی داعش بەردەوام دەبێت".

پێنجی ئەم مانگە، جەیمس جێفری، نێردەی تایبەتی ئەمریکا بۆ سوریا سەردانی کۆشکی سەلام-ی کرد لە بەغدای پایتەخت و لەگەڵ د. بەرھەم ساڵح، سەرۆک کۆماری عێراق کۆبوەوە.

بەگوێرەی راگەیەندراوی کۆبونەوەکە، سەرۆک بەرهەم و نێردەی تایبەتی ئەمریکا بۆ سوریا باسیان لە پشتیوانی نێودەوڵەتی بۆ سەقامگیری و ئاسایشی عێراق و جێبەجێکردنی چاکسازییەکان کردوە.

ئاماژە بەوەشکراوە، جەخت لە گرنگی بەرەوپێشبردنی پەیوەندییە دو قۆڵییەکان و فراوانکردنی ئاسۆی ھاریکاری و ئاڵۆگۆڕی بازرگانی لە نێوان ھەردو وڵاتدا، بەجۆرێک کە خزمەت بە بەرژەوەندییە ھاوبەشەکان بکات.

لە راگەیەندراوەکەدا ئەوەش خراوەتەڕو، ھەروەھا گفتوگۆکراوە لە بارەی دوا پێشھاتە سیاسییەکانی سوریا و ناوچەکە و پێویستی بەرجەستەکردنی ئاشتی و سەقامگیری لە جیھاندا.



Copyright © 2016 Xendan.org all rights reserved

designed and developed by AVESTA GROUP