واشنتن ئێران بە هێرشکردنەسەر بنکەیەکی سەربازی وڵاتەکەی لە عێراق تۆمەتبار دەکات

- 12/7/2019 12:00:00 PM 2115 جار خوێندراوەتەوە

خەندان-

بەرپرسێکی وەزارەتی دەرەوەی ئەمریکا رایگەیاند، ئەگەری ئەوە هەیە ئێران بەرپرسیاری هێرشەکەی سەر بنکەی سەربازی بەلەد بێت، کە هێزە ئاسمانییەکانی ئەمریکای تێدایە و ئێوارەی 5ی ئەم مانگە بە دو موشەکە بە ئامانج گیراوە.

دەیڤ شینکەر، یاریدەدەری وەزیری دەرەوەی ئەمریکا بۆ کاروباری رۆژهەڵاتی نزیک بە رۆژنامەنوسانی راگەیاندوە، "ئێمە چاوەڕوانی هەمو بەڵگەکان دەکەین، بەڵام ئەگەرێکی بەهێزیش هەیە کە ئێران لەو روداوە بەرپرسیار بێت".

ئێوارەی رۆژی پێنجی ئەم مانگە، دو موشەک ئاڕاستەی بنکەی سەربازی بەلەد کرا، کە هێزە ئاسمانییەکانی ئەمریکای تیادایە و دەکەوێتە دوری 80 کیلۆمەتر لە باکوری بەغدا، تائێستاش نازانرێت زیانە گیانی  ومادییەکانی هێرشەکە چەند بون.

رۆژی سێ شەممەی رابردوش پێنج موشەکە ئاڕاستەی بنکەی سەربازی عەین ئەسەد لە پارێزگای ئەنبار کرا، کە یەکێکە لە سەرەکیترین بنکەکانی هێزەکانی ئەمریکا لە عێراق و سوریادا، بەڵام هێرشەکە هیچ زیانێکی گیانی نەبو.


Copyright © 2016 Xendan.org all rights reserved

designed and developed by AVESTA GROUP