وێنە و ڤیدیۆ..چالاکوانانی ژینگەیی لە سنوری ئیدارەی راپەرین شەش هەزار نەمام دەچێنن

- 12/6/2019 9:04:00 PM 1589 جار خوێندراوەتەوە

خەندان-

بەشێک لە چالاکوانان لە سنوری ئیدارەی راپەرین هەڵمەتێکیان بۆ چاندنی شەش هەزار نەمام لەسەر چیای ماکۆک لە سنوری حاجیاوا ئەنجامدا، بەشێک لە هاوڵاتیانیش بەردەوامیی هەڵمەتەکە بە ئامانجی زیادکردنی رێژەی سەوزایی بە پێویست دەزانن.

لەوبارەیەوە ئاکام عەزیز، یەکێک لە بەشداربوانی هەڵمەتەکە لە هەژماری فەرمی حاجیاوانیوز لە فەیسبوك رایگەیاند، "ئەمڕۆ هەینی بە بەشداری زۆربەی چین و توێژە جیاوازەکانی سنورەکە هەڵمەتێکی ژینگەیی بۆ رواندنی شەش هەزار نەمام لە جۆری (دار بەرو) لەسەر چیای ماکۆک لە حاجیاوا بەڕێوەچو".

ئاماژەی بەوەشکرد، بەردەوامی هەڵمەتەکانی سەوزکردن و هاوکاری هاوڵاتیان نیشانەی ژینگەدۆستی هاوڵاتیانی سنورەکەیە و دەبێتەهۆی بەرزکردنەوەی رێژەیی سەوزایی کە لە رابردو بە هۆکاری جیاواز ناوچەکە زیانی ژینگەیی پێگەشتوە. 

هاوڵاتیانیش لە تۆڕەکۆمەڵایەتییەکان سەبارەت بە هەڵمەتەکە رای خۆیان نوسیوە، هاوڵاتییەک بەناوی شاخەوان بیتوێنی نوسیویەتی، هەڵمەتەکە جێگای دەستخۆشیە و هیوادارن شارەوانی جگە لەوەی گرنگی بەو دارانە بدات کە چێندراون، هاوکات رێگری لە بڵاوبونەوەی ئاژەڵەکانیش بکرێت لەوەی زیان بە درەختەکان بگەیەنن بە تایبەت کە چیای ماکۆک لە ناوچەی دانیشتوان زۆر نزیکە.

چیای ماکۆک دەکەوێتە سنوری ئیدارەی ڕاپەرین و نزیک شارۆچکەی حاجیاوا، لە هەر چوار وەرزەکەی ساڵدا خەڵکێکی زۆر بە مەبەستی گەشتکردن و بەسەربردنی کاتێکی خۆش ڕوی تیدەکەن، لە ماوەی رابردوشدا بەهۆکاری ئاگرکەوتنەوە بەشێک لە ناوچەکانی سەوزایی لەسەر چیاکە سوتان.



Copyright © 2016 Xendan.org all rights reserved

designed and developed by AVESTA GROUP