ترەمپ: نامەوێت دەستوەردان لەهەڵبژاردنەکانی بریتانیا بکەم، بەڵام جۆنسن کەسێکی بەتوانایە

- 12/3/2019 5:29:00 PM 1288 جار خوێندراوەتەوە



خەندان -                      

سەرۆکی ویلایەتە یەکگرتوەکانی ئەمریکا رایگەیاند، ئەو نایەوێت دەستوەردان لەهەڵبژاردنەکانی ئەم مانگەی بریتانیادا بکات، بەڵام بەبڕوای ئەو بۆریس جۆنسن، سەرۆک وەزیرانی بریتانیا کەسێکی بەتوانایە و کاری باش ئەنجامدەدات.
من نامەوێت دەستوەردەم لە هەڵبژرادنەکانی بریتانیا، بەڵام بۆریس جۆنسن، کەسێکی لێهاتوە و دەتوانێت لەداهاتودا کاری باش ئەنجامبدات

ئەمڕۆ دۆناڵد ترەمپ، سەرۆکی ویلایەتە یەکگرتوەکانی ئەمریکا لە لەندەنی پایتەختی بریتانیا، کە بۆ بەشداریکردن لەکۆبونەوەی لوتکەی وڵاتانی ناتۆ ئامادەبو، رایگەیاند"من نامەوێت دەستوەردەم لە هەڵبژرادنەکانی بریتانیا، بەڵام بۆریس جۆنسن، سەرۆکی پارتی پارێزگارانی بریتانیا کەسێکی لێهاتوە و دەتوانێت لەداهاتودا کاری باش ئەنجامبدات".
پشتگیری خۆشی بۆ دەرچونی بریتانیا لە یەکێتی ئەوروپا دوپاتکردەوە

هاوکات ترەمپ پشتگیری خۆشی بۆ دەرچونی بریتانیا لە یەکێتی ئەوروپا دوپاتکردەوە، کە ئامانجی سەرەکی  بانگەشەی هەڵبژاردنەکانی جۆنسنە، بۆ هەڵبژاردنەکانی 12ی ئەم مانگە.

ئەمە لەکاتێکدایە سەرەتای ئەم هەفتەیە سەرۆک وەزیرانی بریتانیا رایگەیاند، باشتروایە کاتێک دۆناڵد ترەمپ، سەرۆکی ویلایەتە یەکگرتوەکانی ئەمریکا سەردانی لەندەن دەکات لەم هەفتەیەدا بۆ بەشداری لە کۆبونەوەی لوتکەی هاوپەیمانی باکوری ئەتڵەسی(ناتۆ)، دەستوەرنەدات لەهەڵبژارنەکانی بریتانیا.

جۆنسن وتیشی، "یەکێک لە باشترین ئەو شتانەی کە وڵاتەکەمان هەیەتی بونی هاوپەیمان و هاوڕێی وەک ویلایەتە یەکگرتوەکانی ئەمریکایە، بەڵام ئەوەی پێویستە ئێمە بیکەن ئەوەیە دەست لەهەڵبژاردنەکانی وڵاتانی هاوپەیمانمان وەرنەدەین".

بەرپرسانی پارتی پارێزگارانی بریتانیا نیگەرانی ئەوەن، ترەمپ ببێت بەهۆکارێک بۆ ئەوەی رایی گشتی والێبکات، کە پێیان وابێت بەدڵنیاییەوە پارتەکەیان براوەی هەڵبژاردنەکانی 12ی دیسەمبەر نەبێت.


Copyright © 2016 Xendan.org all rights reserved

designed and developed by AVESTA GROUP