پوتین: فراوانبونی ناتۆ هەڕەشە بۆسەر روسیا دروستدەکات

- 12/3/2019 4:09:00 PM 3647 جار خوێندراوەتەوە

خەندان-

کەمێک بەرلەئێستا ڤلادمیر پوتینی سەرۆکی روسیا رایگەیاند، فراوانبونی ناتۆ هەڕەشە بۆسەر روسیا دروستدەکات.
بەپێی هەواڵێکی ئاژانسی روسیا تودەی، ڤیلادمیر پوتینی سەرۆکی روسیا، رایگەیاندوە فراوانبونی رێکخراوی ناتۆ و نزیکبونەوەی لەسنورەکانی روسیا هەڕەشەیەکی جدییە بۆ روسیا.

لەمیانەی پێشکەشکردنی وتارێک لەسۆشی لەگەڵ ژمارەیەک بەرپرسی سەربازی وڵاتەکەی، پوتین راشیگەیاند، " پێش ئەوەی ئێمە کارەکانمان دەستپێبکەین، ئەم دو رۆژە چاودێری کۆبونەوەی لوتکەی رێکخراوی ناتۆ دەکەم کە لەلەندەن سازدەکرێت بەبۆنەی 70-هەمین ساڵیادی هاوپەیمانێتییەکە." 
  
پوتین ئاماژەی بەوەشکرد، پێشتر رێکخراوی ناتۆ دژ بە یەکێتی سۆڤیەت دروستکرا، بەڵام ئێستا نە سۆڤیەت ماوە و نە پەیماننامەی واۆشۆش کاری پێدەکرێت کە هاوپەیمانێتییەک بو وەک وەڵامدانەوەیەک بۆ ناتۆ پێکهێنرا.

سەرۆکی روسیا لەبارەی ناتۆ وە راشیگەیاند، لەئیستادا ئەو هاوپەیمانێتییە 29 ئەندامی هەیە و 12 وڵاتی دیکەی بۆ زیادکراوە، جگەلەوە زیاتر لەسەدا 70-ی کۆی خەرجی سەربازی هەمو جیهان بۆ ئەو هاوپەیمانێتییە خەرجدەکرێت.

جەختیشی کردوە لەئێستادا کە گۆڕانکاری گەورە بەسەر جیهاندا هاتوە و پێشکەوتنەکان خێراترن، ناتوانرێت پشت بەبیرۆکەی بەستنی هاوپەیمانێتی ببەسترێت بۆ پێشخستنی بڕیارەکان.

لەکۆتایدا سەرۆکی روسیا وتیشی، " چەندین جار جەختمان کردۆتەوە کە ئامادەی هاوکاری و هەماهەنگین لەگەڵ ناتۆ، بەڵام وەڵامی پێویستی هەڕەشەکانیشی دەدەینەوە." 
 



Copyright © 2016 Xendan.org all rights reserved

designed and developed by AVESTA GROUP