کۆتایی ئەمساڵ پارتێکی سیاسی نوێ لە هەناوی ئاکپارتیدا دروستدەبێت

- 11/27/2019 10:09:00 AM 5481 جار خوێندراوەتەوە

خەندان-

وەزیری پێشوی دارایی تورکیا و کەسایەتی دیاری پارتی دادوگەشەپێدان کە رەجەب تەیب ئەردگان سەرۆکایەتی دەکات رایگەیاند، لە کۆتایی ئەمساڵدا پارتێکی سیاسی نوێ دادمەزرێنێت و سەرۆک کۆماری پێشوی تورکیاش پشتیوانی دەکات.
باباجان، وەزیری پێشوی دارایی تورکیا کە بە روخساری سەرکەوتنی ئابوری تورکیا دادەنرێت

 

عەلی باباجان، وەزیری پێشوی دارایی تورکیا کە بە روخساری "سەرکەوتنی ئابوری تورکیا" دادەنرێت لەو کاتەی وەزیری دارایی و دواتریش وەکو جێگری سەرۆک وەزیرانی بۆ کاروباری ئابوری کاریکردوە تاوەکو ساڵی 2015، سەبارەت پارتە نوێیەکەی رایگەیاند، لە ئێستادا لە گفتوگۆ و دانانی رێکاری ستراتیژین لەگەڵ سەرکردەکانی دیکەی پارتە نوێیەکە بۆ "روانگەیەکی نوێی" تورکیا.
کاتی دیاریکراو بۆ راگەیاندنی پارتەکەی کۆتایی ئەمساڵە و تائێستا بڕیاریان لە ناوی پارتەکەیان نەداوە

 

باباجان (تەمەن 52) ساڵ بە کەناڵی خەبەری تورکی وڵاتەکەی راگەیاندوە، کاتی دیاریکراو بۆ راگەیاندنی پارتەکەی کۆتایی ئەمساڵە و تائێستا بڕیاریان لە ناوی پارتەکەیان نەداوە، بەڵام یەکێک دەبێت لە جوڵانەوە سەرەکییەکانی تورکیا.
ئەوان و گویل بیروڕاکانیان لە یەکتری نزیکە و لەسەر زۆر تەوەردا هاوڕان، بەڵام گویل نابێتە بەشێک لەو پارتە نوێیە

 

سەبارەت بە بەشداریکردنی عەبدوڵا گویل، سەرۆک کۆماری پێشوی تورکیا لەو پارتەدا کە بڕیارە رایبگەیەنن عەلی باباجان رونیکردوەتەوە، ئەوان و گویل بیروڕاکانیان لە یەکتری نزیکە و لەسەر زۆر تەوەردا هاوڕان، بەڵام گویل نابێتە بەشێک لەو پارتە نوێیە "بەڕێز گویل لە دەرەوەی حزب بە ئەزمونی دەوڵەمەندی سیاسی پشتیوانی ئێمە دەکات".
دوای 17 ساڵ لە حکومڕانیکردن پێشبینی دەکرێت بۆ هەڵبژاردنەکانی پەرلەمان و سەرۆکایەتی تورکیا لە ساڵی 2023دا دو پارتی نوێ لە هەناوی ئاکپارتیدا دروستببن

 

ئەوەش لە کاتێکدایە بۆ یەکەمجار و دوای 17 ساڵ لە حکومڕانیکردن پێشبینی دەکرێت بۆ هەڵبژاردنەکانی پەرلەمان و سەرۆکایەتی تورکیا لە ساڵی 2023دا دو پارتی نوێ لە هەناوی ئاکپارتیدا دروستببن، کە یەکێکیان ئەحمەد داود ئۆغلۆ، سەرۆک وەزیرانی پێشوتری تورکیا سەرۆکایەتی دەکات.

پارتی دوەمیش عەلی باباجان و عەبدوڵا گویل رابەرایەتی دەکەن، ئەو سێ سەرکردەیەش لە دامەزرێنەرانی ئاکپارتین و بە گوێرە راپرسییەکان بەشێکی دەنگدەرانی ئاکپارتیان لەگەڵدایە.


Copyright © 2016 Xendan.org all rights reserved

designed and developed by AVESTA GROUP