"گەورەترین فریودان بە" وەن كۆین
پاش قۆرخكردنی چوار ملیار دۆلار، هەژدیهای پارە ئەلیكترۆنیەكان هەڵدێت

- 11/24/2019 10:15:00 PM 116443 جار خوێندراوەتەوە

خەندان-

سەبارەت بە پارە ئەلیكترۆنییەكان، كە لە ئێستادا باوترینیان وەن كۆین و هاوشێوەكانیەتی لە رۆژهەڵاتی ناوەڕاست و بە سیستمی هەڕەمی كاردەكەن، گومانەكان بونەتە هۆی دروستبونی مشتومڕێكی زۆر لەسەر قۆرخكردن و دیارنەمانی سەرچاوەكانی ئەو دراوە.

لەمدواییانەدا، ژنێك بەناوی دكتۆرە روجا، كە بە "هەژدیهای قۆرخكار"ی پارە ئەلیكترۆنیەكان ناسرابو توانیویەتی چوار ملیار دۆلار لە وەبەرهێنە جیهانییەكان بكێشێتەوە و قۆرخی بكات بۆ خۆی، هەندێكیش دەڵێن ئەو بڕە لە راستیدا نزیكەی 15 ملیار دۆلار-ە.

دكتۆرە رۆجا-ی تەمەن 39ساڵ، كە لەدایكبو و دانیشتوی بولگاریا-یە و كاری لەسەر پارەی ئەلیكترۆنی وەن كۆین كردوە، كە ئەو پارەیە بە سیستەمی هەڕەمی دەڕوات بەڕێوە و پێویستە بۆ زیادكردنی بڕی پارەكە كەسانی دیكە رابكێشیتە نو سیستەمەكە، لەو رێگەیەشەوە ژمارەیەكی زۆر وەبەرهێنەری جیهانی لەخشتەبردوە.

بەگوێرەی تۆڕی هەواڵی بی بی سی بریتانی، رۆجا توانیویەتی ژمارەیەك وەبەرهێنەر لە سەرتاسەری جیهان رازیبكات بە پێشكەشكردنی بڕە پارەیەك كە كۆی گشتی دەگاتە چوار ملیار دۆلار، بەپێێ هەندێكی دیكەش ئەو پارەیە گەیشتوەتە 15 ملیار دۆلار.

رۆجا لەرێگەی ژمارەیەك چلالاكی  كە لە سەرتاسەری جیهاندا ئەنجامیداوە توانیویەتی ژمارەیەكی زۆر خەڵك لەخۆی كۆبكاتەوە، یەكێك لەو چالاكیانەش لە گۆڕەپانی وێمبڵی لە لەندەن ساڵی 2016 ئەنجامیدا و تێیدا ئاماژەی بەوەكرد "وەن كۆین بێسنوردەبێت و رێگەیەكی سەلامەت و ئاسانە بۆ بەكارهێنان".

بی بی سی دەڵێت "وەن كۆین لە نزیكەی 175 وڵات خەڵكی لەخۆی كۆكردوەتەوە خەڵكی ئەو وڵاتانە پارەكەیان خستوەتە ناو ئەو سیستمەوە، لەكاتێكدا زۆرینەی پارەكان لەكاتی شەش مانگی ساڵی 2016دا كۆوبەتەوە كە رۆجا گەشتی تێداكردوە بۆ وڵاتانی دی.

بەڵام ساڵی 2017 رۆجا دیارنەما و لەوكاتەوە تا ئێستا كەس نەیبینوە،دوای ئەوەی دەستیكرد بە بەكارهێنانی ئەو پارەیەی لە رێگەی وەن كۆین-ەوە دەستی كەوتوە، بە بڕی چەندین ملیۆن دۆلار باڵەخانەی لە بولگاریا كڕیوە.

لە ویلایەتە یەكگرتوەكانی ئەمریكاش بە تۆمەتی قۆرخكردن و رفاندنی پارە لە ئامادەنەبونیدا دادگا  بڕیاری دەستگیركردنی دكتۆرە رۆجا-یدا ، وەزارەتی داد-یش لەوبارەیەوە رایگەیاند "وەن كۆین بێجگە لەوەی كارێكی باوە لە دزین و قۆرخكاری، هیچ شتێكی دیكە نیە".


Copyright © 2016 Xendan.org all rights reserved

designed and developed by AVESTA GROUP