بەغدا؛ خۆپیشاندەرێك بە گوللـەی هێزە ئەمنیەكان كوژرا

- 11/22/2019 1:52:00 PM 1348 جار خوێندراوەتەوە

خەندان-

ئەمڕۆ لە خۆپیشاندانەكانی شاری بەغداد، خۆپیشاندەرێك بە گوللـەی هێزە ئەمنیەكان كوژرا، هاوكات بەندەری ئوم قەسەر لە پارێزگای بەسرە بە زەبری هێزە ئەمنیەكان بە خۆپیشاندەران چۆڵكراو بەندەرەكە كرایەوە.

بەگوێرەی هەواڵێكی سكای نیوزی عەرەبی، لە خۆپیشاندانەكانی ئەمڕۆ هەینی لە شەقامی رەشیدی شاری بەغداد، خۆپیشاندەرێك بە گوللـەی هێزە ئەمنیەكان كوژراوە.

ئەمڕۆ هەینی هێزە ئەمنییەكان توانیویانە دوای بڵاوەپێكردنی خۆپیشاندەران بەزەبری هێز، بەندەری ئوم قەسر بكەنەوە

 

لەلایەكی دیكەوە ئاژانسی رۆیتەرز لەزاری چەند بەرپرسێكی بەندەری "ئوم قەسر"ەوە بڵاویكردەوە، ئەمڕۆ هەینی هێزە ئەمنییەكان توانیویانە دوای بڵاوەپێكردنی خۆپیشاندەران بەزەبری هێز، بەندەری ئوم قەسر بكەنەوە.

ئاژانسەكە لەزاری ئەو بەرپرسانەی بەندەرەكەوە بڵاویكردۆتەوە كە كارمەندان توانیویانە بچنە نێو بەندەری ئوم قەسر كە لە رۆژی دوشەممەوە لەلایەن خۆپیشاندەرانەوە داخرابو.

خۆپیشاندانەکانی عێراق لە 25ی ئۆکتۆبەری ئەمساڵەوە بەردەوامی هەیە، داوا دەکەن خزمەتگوزارییە تەندروستی و پەروەردەییەکان و پرۆژەی ئاوەدانکردنەوە زیاتر بکرێن، لەگەڵ ئەوەشدا داواکارن دەستەی نەزاهە لێپرسینەوە لە گەندەڵکاران بکات.

لە چوارچێوەی روبەڕوبونەوەی گەندەڵی دەستەی دەستپاکی عێراق فەرمانی دەستگیرکردن بۆ دەیان پەرلەمانتار، وەزیری پێشو، پارێزگاری ئێستا و پێشو، بەڕێوەبەری گشتی ئێستا وپێشوی عێراق دەرکردوە و زۆرینەشیان بە تۆمەتی گەندەڵی و خراپ بەکارهێنانی پۆستەکانیان دەستگیر دەکرێن. 

تا ئێستا بەڵێنەکانی حکومەت خۆپیشاندەرانیان رازینەکردوە و بەردەوامن لە خۆپیشاندان، بەپێی دواین زانیارییەکانیش زیاتر 235 کەس کوژران و زیاتر لە 15 هەزار کەسیش برینداربون.



Copyright © 2016 Xendan.org all rights reserved

designed and developed by AVESTA GROUP