بەپەلە

بەر لێبوردنی گشتی خامنەئی كەوتون
دوای زیاتر لە 25 ساڵ دو كوردی رۆژهەڵات لە زیندان ئازادكران

- 11/21/2019 9:24:00 PM 7251 جار خوێندراوەتەوە

خەندان-

ڕێکخراوی هەنگاو بۆ مافەکانی مرۆڤ رایگەیاند،"دو بەندکراوی سیاسی کە بە تۆمەتی هاوکاری لەگەڵ حزبی دیموکراتی کوردستانی ئێران نزیک بە سێ دەیە لە بەندیخانەبون، ئازاد کران".

ڕێکخراوی هەنگاو بۆ مافەکانی مرۆڤ رایگەیاند،"ئێوارەی ئەمڕۆ پێنجشەممە (21ی نۆڤەمبەری 2019) عوسمان مستەفاپور، بەندکراوی سیاسی خەڵکی پیرانشار دوای 28 ساڵ بەندکران و محەمەد نەزەری بەندکراوی سیاسی خەڵکی سایین قەڵا دوای 25 ساڵ بەندکران لە بەندیخانەی ناوەندی ئورمیە ئازاد کران".

ئاماژەی بەوەشكردوە، ئەو دو بەندکراوە بەر فەرمانی لێبوردنی گشتی ڕێبەری ئێران (خامنەیی) کەوتون.

ئەوەشخراوەتەرو،ئەو دوبەندکراوە لە ماوەی زیندانیان لە مافی مەرەخەسی(بینین و چونە دەرەوەی كاتی لە زیندان) بێبەری بون و تەنانەت رێگەی بەشداری لە ڕێوڕەسمی پرسەو سەرەخۆشی ئەندامانی بنەماڵەی خۆیانیان نەبوە.

بەگوێرەی رێكخراوەكە،"عوسمان مستەفاپور تەمەن 53 ساڵ و خەڵکی پیرانشار، ڕێکەوتی  13 ی حوزەیرانی 1991 دوای پێكدادانی چەکداری نێوان پێشمەرگەکانی حزبی دیموکرات و هێزەکانی سوپای پاسداران لە ناوچەی تەرگەوەڕی ئورمیە بەدیلگیراوە. هەمان ساڵ حوکمی سێدارەی بەسەردا سەپا و ساڵی 2000 حوکمەکەی هەڵوەشاوەتەوە و بۆ 10 ساڵ بەندکران کەمکراوەتەوە. هە ر ئەو ساڵە لەلایەن لقی 3ی دادگای شۆڕشی ئورمیە بە تۆمەتی ئەندامێتی لە حزبی دیموکراتی کوردستانی ئێران حوکمی 25 ساڵ بەندکرانی بە سەردا سەپا و سەرجەم حوکمەکەی بو بە 35 ساڵ بەندکران.

هەروەها محەمەد نەزەری لەدایکبوی شاری سایین قەڵای پارێزگای ئورمیەیە لە تەمەنی 23 ساڵیدا بە تۆمەتی ئەندامەتی لە حزبی دیموکراتی کوردستانی ئێران (حدکا) دەستبەسەر و حوکمی سێدارەی بەسەردا سەپا. ئەو حوکمە دواتر هەڵوەشایەوە و گۆڕا بۆ بەندکرانی هەتاهەتایی.


Copyright © 2016 Xendan.org all rights reserved

designed and developed by AVESTA GROUP