هەواڵی ئەمڕۆ

ڤیدیۆ؛ مەراسیمی یادی رۆژی شەهیدانی یەکێتی بەڕێوەدەچێت

- 11/21/2019 2:47:00 PM 2303 جار خوێندراوەتەوە

خەندان-

مەراسیمی یادی رۆژی شەهیدانی یەکێتی لە شاری سلێمانی بە ئامادەبونی د. بەرهەم ساڵح، سەرۆک کۆماری عێراق بەڕێوەدەچێت.

مەراسیمی یادی شەهیدی یەکێتی لە تەلاری هونەر لە سلێمانی بە ئامادەبونی بەرپرسانی حزبی و حکومی و کەسوکاری شەهیدان و هاوڵاتیان و لایەنگرانی یەکێتی بەڕێوەچو، هاوکات د. بەرهەم ساڵح، سەرۆک کۆماری عێراق لەمەراسیمەکەدا بەشداربو. 

یەکێک لە شانازییەکانی یەکێتی ئەو روبارە خوێنەیە کە بەم میلەتەی بەخشیوەو بەهۆی ئەوەوەیە یەکێتی بە حزبە شەهیدان دەناسرێت

 

لە سەرەتای مەراسیمەکەدا پەیامی کۆسرەت رەسوڵ، جێگری سکرتێری گشتی یەکێتی بۆ رۆژی شەهیدی یەکێتی پێشکەشکرا و تیایدا هاتبو، "یەکێک لە شانازییەکانی یەکێتی ئەو روبارە خوێنەیە کە بەم میلەتەی بەخشیوەو بەهۆی ئەوەوەیە یەکێتی بە حزبە شەهیدان دەناسرێت".

گرنگە لەم بۆنەیەدا سەرجەم لایەنەکان بەتایبەت یەکێتی ئامادەکاری بۆ یەکریزی و رێکخستنەوەی نێو ماڵی خۆی بکات و لەرێگای حکومەتی هەرێمەوە کار بۆ باشترکردنی ژیانی کەسوکاری شەهیدان بکرێت

 

ئاماژەی بەوەشکرد، "گرنگە لەم بۆنەیەدا سەرجەم لایەنەکان بەتایبەت یەکێتی ئامادەکاری بۆ یەکریزی و رێکخستنەوەی نێو ماڵی خۆی بکات و لەرێگای حکومەتی هەرێمەوە کار بۆ باشترکردنی ژیانی کەسوکاری شەهیدان بکرێت لەوەی هەتا ئێستا کراوە دەکرێ کاری زیاتر بکرێت ، کاری جدیش بکرێت بۆ بەستنی کۆنگرەو نوێکردنەوەی یەکێتی، چونکە کوردستان پێویستی بە یەکێتییەکەمان هەیە".

21ی تشرینی دوه‌م هاوکاتە لەگەڵ رۆژی له‌ سێداره‌دانی شیھابی شێخ نوری، جه‌عفه‌ر عه‌بدولواحید و ئه‌نوه‌ر زۆراب، کە سێ سەرکردەی دیاری یەکێتی نیشتیمانی بون.

یادکردنەوەی رۆژی شەهیدانی یەکێتی لە کاتێکدایە بڕیارە رۆژی حەوتی كانونی یەكەمی ئەمساڵ، ئەو حزبە  چوارەمین كۆنگرەی خۆی ئەنجامبدات.

بۆ ئەومەبەستەش یەکێتی كۆنفرانسی كۆمیتەكانی لە سنوری سەرجەم مەڵبەندەكاندا ئەنجامداوە، بڕیاریشە هەفتەی لە هەفتەی ئایندەوە كۆنفرانسی مەكتەبەكان و مەڵبەندەكانی دەستپێبكات.



Copyright © 2016 Xendan.org all rights reserved

designed and developed by AVESTA GROUP