بەپەلە

سەرۆکی پەرلەمانی ئێران: پێویستیمان بە ئارامی هەیە بۆ ئەوەی بڕیاری دروستبدەین

- 11/17/2019 12:40:00 PM 1454 جار خوێندراوەتەوە

خەندان-

سەرۆکی پەرلەمانی ئێران رایگەیاند، بۆ ئەوەی بتوانن بڕیاری "راست و دادپەروەرانە" بدەن، پێوستیان بە رەخساندنی ئارامی  و ئاسایشی وڵات هەیە.
 ترسی خەڵکی لە بەرزبونەوەی نرخی بەنزین پەیوەندی بەوەوە هەیە کە نرخی مادە خۆراکییەکانیش بەرزببێتەوە

 

لە دواین لێدوانیدا سەبارەت بە ناڕەزاییەکانی چەند رۆژی رابردوی ئێران، عەلی لاریجانی سەرۆکی پەرلەمانی ئێران رایگەیاند، ترسی خەڵکی لە بەرزبونەوەی نرخی بەنزین پەیوەندی بەوەوە هەیە کە نرخی مادە خۆراکییەکانیش بەرزببێتەوە، ئەمڕۆش لە کۆبونەوەی پەرلەماندا ئەمینداری ئەنجومەنی ئاسایشی نەتەوەیی ئێران ئامادەی کۆبونەوەیەکی داخراو دەبێت و بیروبۆچونەکان تاوتوێ دەکەن.

لای خۆیەوە وتەبێژی سەرۆکایەتی پەرلەمانی ئێران رایگەیاند، دوای لێدوانەکەی عەلی خامنەیی، رابەری باڵای ئێران سەبارەت بە هێشتنەوەی نرخی بەنزین وەکو خۆی، پڕۆژە یاسای دابەزاندنی بەهاکان لە بەرنامەی کاردا لابرا.
پێویستە پلانی بەرزکردنەوەی نرخی بەنزین وەکو خۆی جێبەجێبکرێت

 

ئەمڕۆش رابەری باڵای کۆماری ئیسلامی ئێران رایگەیاند، پێویستە پلانی بەرزکردنەوەی نرخی بەنزین وەکو خۆی جێبەجێبکرێت، بەرپرسیاریەتی "هەمو کارێکی تێکدەرانە"شی خستە ئەستۆی "نەیارانی شۆڕش و دوژمانان"ه ئێران.

لێدوانەکەی رابەری ئێران لە کاتێکدابو عەبدولرەزا رەحمانی، وەزیری ناوخۆی ئێران رایگەیاندبو، بەهۆی خۆپیشاندانەکانی چەند رۆژی رابردوەوە کە بەهۆی گرانبونی نرخی بەنزین بۆ دو بەرامبەر دەستیپێکردوە چەندین کوژراون و برینداربون.

ئاژانسی هەواڵی ئێرنا دوێنێ شەممە لە راگەیەندراوێکدا باسی لەوەکرد، بەهۆی بڕیاری حکومەتی ئێران بۆ بەرزکردنەوەی نرخی بەنزین بۆ دو بەرامبەر ( هەزار و 500 تمەن بۆ سێ هەزار 500 تمەن)، هاوڵاتیانی چەند شارێکی ئەو وڵاتە ناڕەزاییان دەربڕی و لە هەندێ شاریش روبەڕوبونەوە لەگەڵ پۆلسیدا رویداوە.
لە شارەکانی شیراز و بەندەرعەباس و چەند شارێکی دیکە خۆپیشاندانی ناوبەناو بەڕێوەدەچێت و بەشێک لە شۆفێران وەکو ناڕەزاییەکان بۆ گرانبونی بەنزین ئۆتۆمبێلەکانیان لەسەر شەقامەکان راگرتوە

 

ئەوەشی خستبوەڕو، لە شارەکانی شیراز و بەندەرعەباس و چەند شارێکی دیکە خۆپیشاندانی ناوبەناو بەڕێوەدەچێت و بەشێک لە شۆفێران وەکو ناڕەزاییەکان بۆ گرانبونی بەنزین ئۆتۆمبێلەکانیان لەسەر شەقامەکان راگرتوە، ئەوەش هاتوچۆی لە نێوان شەقامەکانی ئەو شارەی باشوری ئێران پەکخستوە.

هاوڵاتیانی ئێران دەڵێن، "رێژەی گشتی داهاتەكانیان 200 دۆلار تێناپەڕێنێت و ناتوانن ئەو بڕە پارە زیادەیەی بەنزین دابین بكەن"، ئەوەش لەپاڵ بەرزبونەوەی نرخەكانی خۆراك كە لە سەرەتای سەپاندنی سزاكانی ئەمریكا بەسەر وڵاتەكەدا دروستبوە و بەرزبونەوەی نرخەكانیش بەردەوامی هەیە.
بەرزکردنەوەی نرخی بەنزین لە ئێران ساڵانە 31 ترلیۆن تمەن (زیاتر لە 736 ملیۆن دۆلار) داهات بۆ دەوڵەت دەگەڕێنێتەوە

 

لای خۆیەوە بێژەن زەنگەنە، وەزیری نەوتی ئێران رایگەیاند، بەرزکردنەوەی نرخی بەنزین لە ئێران ساڵانە 31 ترلیۆن تمەن (زیاتر لە 736 ملیۆن دۆلار) داهات بۆ دەوڵەت دەگەڕێنێتەوە کە لە بەرژوەندی خەڵکی هەژار و کەمدەرامەت بەکاردەهێنرێتەوە.

هاوکات رێکخراوی پلاندانان و بودجەی ئێران ئاماژەی بەوەکردوە، بەرزکردنەوەی نرخی بەنزین بە بەهای 30 ترلیۆن تمەن دەتوانێت پشتیوانی دارایی بۆ 60 ملیۆن هاوڵاتی کەمدەرامەت و هەژاری ئێران دابین بکات.


Copyright © 2016 Xendan.org all rights reserved

designed and developed by AVESTA GROUP