بەپەلە

ئێران: رێگە بەکاری ئاژاوەگێڕی و وێرانکاری بۆ سەر دامەزراوە گشتی و تایبەتیەکان نادەین

- 11/16/2019 11:21:00 PM 3809 جار خوێندراوەتەوە

خەندان-

وەزیری ناوخۆی ئێران  رایدەگەیەنێت، حکومەتی ولاتەکەی رێگە بە تێکدان و لەناوبردنی دامەزراوە گشتی و تایبەتەکان نادات.

 

ئەو پەیامە هەرەشە ئامێزەی وەزارەتی ناوخۆی ئێران دوای ئەوە دێت، دوانیوەڕۆی ئەمڕۆ خۆپیشاندەرانی تارانی پایتەختی کۆماری ئیسلامی ئێران رێگا سەرەکییەکانی ئەو شارەیان گرت و بەهۆیانەوە کێشە بۆ هاتوچۆی شارەکە دروستبوە.

 لەلایەکی دیکەوە، بۆ کەمکردنەوە و دامکرکاندنەوەی خۆپیشاندانەکان، حکومەتی تاران هێڵی ئینتەرنێتی لە چەندین شار و شارۆچکە پچراندوە، لە ئێستاشدا ماڵپەری سەرجەم رۆژنامەکانی ئەو وڵاتە بە رۆژنامەکانی زمانحاڵی حکومەتیشەوە لەکارکەوتون.

هەفتەی رابردو، سەرۆک کۆماری ئێران بڕیاری بەرزکردنەوەی نرخی بەنزینی لە وڵاتەکەیان بەڕێژەی 200% راگەیاند، لە چەندین شاری وەک بەهابەهاو مەشهەد و ئەسفەهان و چەند شارێكی دیکەی ئێران خۆپیشاندان لەدژی ئەو بڕیارە دەستیپێکرد.

هاوڵاتیانی ئێران دەڵێن "رێژەی گشتی داهاتەكانیان 200 دۆلار تێناپەڕێنێت و ناتوانن ئەو بڕە پارە زیادەیەی بەنزین دابین بكەن"، ئەوەش لەپاڵ بەرزبونەوەی نرخەكانی خۆراك كە لە سەرەتای سەپاندنی سزاكانی ئەمریكا بەسەر وڵاتەكەدا دروستبوە و بەرزبونەوەی نرخەكانیش بەردەوامی هەیە.



Copyright © 2016 Xendan.org all rights reserved

designed and developed by AVESTA GROUP