ئەگەری دەستلەکارکێشانەوەی بەکۆمەڵی پەرلەمانتارانی هەدەپە لە ئارادایە

- 11/16/2019 7:27:00 PM 4080 جار خوێندراوەتەوە

خەندان-

بەگوێرەی راپۆرتێکی BBCی تورکی، پەرلەمانتارانی هەدەپە لە ئێستادا تاوتوێی دەستلەکارکێشانەوەی بەکۆمەڵ دەکەن لە پەرلەمانی ئەو وڵاتەدا، ئەوەش بەهۆی شەپۆلی بەردەوامی "پاکتاوی سیاسی" حکومەتی ئەو وڵاتە لە بەرامبەر ئەندام و لایەنگرانیاندا.
 
دوای ئەوەی هەفتەی رابردو، چوار سەرۆکشارەوانی هەدەپە بە پاساو و تۆمەتی تێرۆر لەکارەکانیان دورخرانەوە، ئەمرۆ شەممە حکومەتی تورکیا، جێگای  سەرۆکشارەوانیە هەڵبژێردراوەکانی هەدەپەی بە قەیوم پڕ کردەوە کە سەر جەمیان سەر بە پارتی داد و گەشە پێدانن.

ماڵپەڕی BBC ی تورکی لە راپۆرتێکیدا ئاماژەی بە دەستلەکارکێشانەوەی بەکۆمەڵی پەرلەمانتارانی هەدەپە کردوە وەک دەڕبرینی نارەزایی لە دژی ئەو سیاسەتە تاكرەویانەی ئاکەپە، ئاماژە بەوەشدراوە شەپۆلی دەستلەکارکێشانەوەکە تەنها لەلایەن پەرلەمانتاران نیە، بەڵکو سەرجەم سەرۆکشارەوانی و بەرپرسە حکومیە هەڵبژێرداروەکانیش ملکەچی ئەو بڕیارە دەبن و لە حکومەت دێنە دەرەوە.

حکومەتی تورکیا دەستوبردی لە پرۆسەی  جینۆسایدی سیاسی بەرامبەر کوردەکانی ئەو وڵاتەی  خێراتر کردوە، لە ماوەی تەنها دو رۆژدا 36 کەسایەتی سیاسی و نوێنەری حکومی هەڵبژێردراو، لەلایەن هێزە ئەمنیەکانی تورکیا بەپاساوی بێ بنەما دەستبەسەرکراون.

دوێنێ 15/11 پەرلەمانتارانی هەدەپە ئەندام لە لیژنەی مافەکانی مرۆڤی پەرلەمانی تورکیا داوای ئازادکردنی ئەندامە دەستبەسەرکراوەکانیان کردوە، مەتین نورولا سازاک، پەرلەمانتار لە پارتی مەهەپە پێی وتون" وەک تێرۆرست و ڕەوە سەگ وان"، ئەوەش پەرلەمانتارانی هەدەپەی توڕە کردوە.

ئەو وتانەی سازاک لەمیانی کۆبونەوەی لیژنەی مافەکانی مرۆڤی پەرلەمانی تورکیادا بو، هاوکات پەرلەمانتارانی هەدەپەی بە تێرۆرستیش ناوبرد، لەکاردانەوەی ئەوەشدا پەرلەمناتارانی هەدەپە هۆڵی کۆبونەوەکەیان بەجێهێشت و لە نامەیەکدا داوا دەستلەکارکێشانەوەی دەکەن لە ئەندامێتی پەرلەمان.

دوای کۆبونەوەکە، پەرلەمانتارانی هەدەپە داوان لە سازاک کردوە لەبەرامبەر ئەو وتە نەشیاوانەیدا داوای لێبوردن بکات، بەڵام ناوبراو رەتیکردوەتەوە داوای لێبوردن بکات.


Copyright © 2016 Xendan.org all rights reserved

designed and developed by AVESTA GROUP