بەڕێوەبەرایەتی خۆسەر وەڵامی روسیای دایەوە

- 11/15/2019 11:51:00 AM 9116 جار خوێندراوەتەوە

خەندان- 

بەڕێوەبەرایەتی خۆسەر وەڵامی روسیای دایەوە و رایگەیاند،"لەم قۆناغەدا پێویستیمان بە پشتیوانی دیالۆگ و رێکەوتنێکی ناوخۆیی هەیە، بۆ ئەوەی سوریا بەرەو فیتنەی ناوخۆیی و پرۆژەی پارچەبونەوە نەڕوات و رێخستنە تیرۆرسییەکان لە لایەن تورکیا و چەتەکانیەوە گەورەتر نەکرێن".

وەزارەتی دەرەوەی روسیا و سێرگی لاڤرۆڤ وەزیری دەرەوەی روسیا رایانگەیاندبو كە پێویستە هەڵوێستی بەڕێوەبەرایەتی خۆسەر بۆ بەشداریکردن لە دیالۆگە سیاسیەکان بۆ قەیرانی سوریا ئاشکرا بن، و رایانگەیاندبو كە دوای بڕیاری مانەوەی ئەمریكا لە ناوچەكە بەڕێوەبەرایەتی خۆسەر هەڵوێستەكانی دواكەوتوە.

لە وەڵامدا بەڕێوەبەرایەتی خۆسەر رایگەیاند،"رون و ئاشکرایە کە بەرێوەبەرایەتی خۆسەر لە سەرەتاوە تا ئێستاشی لەگەڵدا بێت، دیالۆگ بە بنەما دەزانێت و ئەم هەڵوێستەمان لە هەمو کات و ساتێکدا خستوەتە بواری جێبەجێكردنەوە و جێبەجێشمان کردوە. دەوڵەتی روسیای فیدڕاڵیش ئاگاداری وردەکارییەکانی ئەم بابەتەیە. بەرێوەبەرایەتی خۆسەر لە ساڵێک پێش ئێستاوە کە نەخشەرێگای چارەسەری ئامادە کردوە، سوربونی خۆی بۆ چارەسەری و دیالۆگ ئاشکرا کردوە و پێشکەشی لایەنی روسی کردوە".

بەڕێوەبەرایەتی خۆسەر لە پەیامەكەیدا نوسیویەتی،"وەکو بەڕێوەبەرایەتی خۆسەری باکور و رۆژهەڵاتی سوریا پشتڕاستی دەکەینەوە کە هەوڵی چارەسەری سیاسی لە ئارادا هەیە، بەڵام تا ئێستا لە روی جێبەجێكردنەوە هیچ هەنگاوێک نەنراوە. ئەوەی لە ئێستادا لە روی جێبەجێكردنەوە لە ئارادایە، تەنها بواری سەربازییە. سەرکەوتنی هەر پڕۆسەیەک بەستراوە بە دو لایەنی سەرەکییەوە کە یەکێکیان جددیەتە لە روی هەڵوێستەوە کە لەم روەوە بەڕێوەبەرایەتی خۆسەر هەڵوێستی خۆی ئاشکرا کردوەو ئامادەیە لەگەڵ دیمەشق دیالۆگ بکات. دوهەمیشیان رۆڵ و خەباتی هێزە ئەکتیڤ و گرنگەکانە لە سوریادا کە لە سەروی هەموشیانەوە رۆڵی روسیایە".

ئاماژەی بەوەشكردوە،"ئێمە تا ئێستاش بڕوامان بە دیالۆگ هەیە و ئامادەین بۆ هەر خەباتێک کە خزمەتی گەلی سوریا بکات و دواڕۆژێکی دیموکراتیکی بۆ مسۆگەر بکات. ئێمە چاوەڕێی هەنگاوە پراکتیکییەکانی لایەنەکانی تر دەکەین. بەو هەڵوێست و گۆڕانکارییانەی لە گۆڕەپانەکەدا رودەدەن، ئێمە ناگۆڕێین. هەبون و گەڕانەوەی ئەمریکا بەستراوەتەوە بە زۆرێک لە فاکتەر و حسابی نێودەوڵەتیەوەو هیچ کات کاریگەری لەسەر هەوڵەکانمان بۆ دیالۆگ دروست ناکات. هەڵوێستمان بەستراوە بە بەرپرسیارێتیمان بەرامبەر بە نیشتیمان و بڕیارەکانی گەلەکەمانەوە".

لە كۆتایشدا بەڕێوەبەرایەتی خۆسەر،"بە پێویستی زانیوە دەوڵەتە ئەکتیڤەکان کە بڕوایان بە دیالۆگ هەیە بۆ پرسی سوریا، پشتیوانی ئەم هەڵوێستە بکەن و پەرەی پێ بدەن. لەم قۆناغەدا پێویستیمان بە پشتیوانی دیالۆگ و رێکەوتنێکی ناوخۆیی هەیە، بۆ ئەوەی سوریا بەرەو فیتنەی ناوخۆیی و پرۆژەی پارچەبونەوە نەڕوات و رێخستنە تیرۆرسییەکان لە لایەن تورکیا و چەتەکانیەوە گەورەتر نەکرێن کە رۆژانە خوێنی هاوڵاتیان دەڕژێنن و گوند و موڵکیان وێران دەکەن بۆ ئەوەی بەرژەوەندییەکانیان جێبەجێ بکەن."









Copyright © 2016 Xendan.org all rights reserved

designed and developed by AVESTA GROUP