لە ماوەی پێنج خولەكدا كەسێكی نادیار گرانترین كاتژمێری دەستی جیهانی كڕی

- 11/14/2019 9:31:00 PM 25730 جار خوێندراوەتەوە

 خەندان-

لەمیانی بەڕێوەچونی مەزادێكی كراوەدا، كاتژمێرێكی دەستی لە ماوەی پێنج خولەكدا بە گرانترین نرخ فرۆشرا، كڕیاری كاتژمێرەكەش نەناسراوە.

لە مەزادی كراوەی ئۆنڵی واچ، كە خانەی كریستیز لە شاری جنێف-ی سویسرا بەڕێوەیبرد و بە مەبەستی كاری خێرخوازی بەڕێوەچو،  ماركەی Patek Philippe نازناوی گرانترین كاتژمێری جیهانی وەرگرت پاش ئەوەی جۆری Grandmaster Chime-ی ئەو ماركەیە بە 31 ملیۆن دۆلار فرۆشرا.

بێئەوەی شوناسی خۆی ئاشكرا بكات كاتژمێرەكەی كڕی

مەزادە كراوەكە بۆ ئەو كاتژمێرە سویسریە تەنها پێنج خولەكی خایاند، كڕیارەكەش تا ئێستا نادیارە و لەمیانی بەڕێوەچونی مەزادەكەدا لەڕێگەی تەلەفۆنەوە و بێئەوەی شوناسی خۆی ئاشكرا بكات كاتژمێرەكەی كڕی.

گرانی نرخی كاتژمێرەكە دەگەڕێتەوە بۆ بێهاوتا بونی و تەنها یەكجار لە ساڵی 2014دا خراوەتە بازاڕەكانەوە، هاوكات دروستكردنی كاتژمێرەكە كە بە دەست دروستكراوە، زیاتر لە 100 هەزار كاتژمێری ویستوە.

لەناو دیزاینەكەدا، پۆڵای بێخەوش و ئاڵتونی سپی بەكارهێنراوە

لەناو دیزاینەكەدا، پۆڵای بێخەوش و ئاڵتونی سپی بەكارهێنراوە، لە هەمانكاتدا دو دیوی هەیە كە یەكێكیان رەنگی پەمەیی ئاڵتونیە و ئەوی دیكەیان رەنگی رەشە و لە تەختەی ئەبانۆس دروستكراوە.
 
ئەوە یەكەمینجار نیە كە ماركەی سویسری Patek Philippe ئەو نازناوە بەدەستبهێنێت، پێشتریش لە ساڵی 2014دا یەكێك لە كاتژمێرەكانی كە مێژوەكەی دەگەڕایەوە بۆ ساڵی 1933 بە بڕی 24 ملیۆن دۆلار فرۆشرا.




Copyright © 2016 Xendan.org all rights reserved

designed and developed by AVESTA GROUP